ഷിംല: ഹിമാചൽ പ്രദേശിലെ ചമ്പ ജില്ലയിൽ ഇരട്ട ഭൂകമ്പം. ബുധനാഴ്ച പുലർച്ചെയാണ് ഒരു മണിക്കൂർ ഇടവേളയിൽ രണ്ട് ഭൂകമ്പമുണ്ടായത്. പുലർച്ചെ 3:27 ന് ആദ്യ ഭൂകമ്പവും 4:39 ന് രണ്ടാമത് ഭൂകമ്പവുമുണ്ടായി. 3.3 തീവ്രത രേഖപ്പെടുത്തിയ ആദ്യ സംഭവത്തിന് പിന്നാലെ 4.0 തീവ്രത രേഖപ്പെടുത്തിയ മറ്റൊരു ഭൂകമ്പം ഉണ്ടായി. നാഷണൽ സെന്റർ ഫോർ സീസ്മോളജി (എൻസിഎസ്) അനുസരിച്ച്, രണ്ട് ഭൂകമ്പങ്ങളും യഥാക്രമം 10 കിലോമീറ്ററും 20 കിലോമീറ്ററും ആഴത്തിൽ നിന്ന് ഉള്ളതായിരുന്നു.

ഹിമാചൽ പ്രദേശിൽ കാലവർഷം ശക്തി പ്രാപിക്കുന്നതിനിടെയാണ് പുതിയ ഭൂകമ്പം ഉണ്ടായത്. ഹിമാചൽ പ്രദേശ് സംസ്ഥാന ദുരന്ത നിവാരണ അതോറിറ്റി (HPSDMA) പ്രകാരം ജൂൺ 20 മുതൽ മഴക്കാലവുമായി ബന്ധപ്പെട്ട പ്രശ്നങ്ങൾ കാരണം സംസ്ഥാനത്ത് 276 പേർ മരിച്ചു. ഇതിൽ 143 പേർ മണ്ണിടിച്ചിൽ, പെട്ടെന്നുള്ള വെള്ളപ്പൊക്കം, മേഘസ്ഫോടനം, മുങ്ങിമരണങ്ങൾ തുടങ്ങിയ മഴയുമായി ബന്ധപ്പെട്ട ദുരന്തങ്ങളിലാണ് മരിച്ചത്. തുടർച്ചയായ മഴയും സുരക്ഷിതമല്ലാത്ത സാഹചര്യങ്ങളും മൂലമുണ്ടായ റോഡപകടത്തെ തുടർന്നാണ് 133 പേർ മരിച്ചത്.

ALSO READ: ജനത്തിരക്കിനെ തുടർന്ന് മുംബൈ മോണോറെയിൽ തകരാറിലായി യാത്രക്കാർ അകത്ത് കുടുങ്ങി; മൂന്ന് മണിക്കൂറിനു ശേഷം രക്ഷപ്പെടുത്തി, ഒഴിവായത് വൻദുരന്തം

പൊതു, സ്വകാര്യ സ്വത്തുക്കൾ, കൃഷി, പൂന്തോട്ടപരിപാലനം, അടിസ്ഥാന സൗകര്യങ്ങൾ എന്നിവയ്ക്കുണ്ടായ നാശനഷ്ടങ്ങൾ മൂലം സംസ്ഥാനത്തിന് 2,211.64 കോടി രൂപയുടെ സാമ്പത്തിക നഷ്ടം സംഭവിച്ചതായി ദുരന്ത നിവാരണ അതോറിറ്റി റിപ്പോർട്ട് പറയുന്നു. 

അതേസമയം, ബുധനാഴ്ച പുലർച്ചെ പാകിസ്ഥാനിലും ഭൂചലനമുണ്ടയി. 3.7 തീവ്രത രേഖപ്പെടുത്തിയ ഭൂകമ്പം ഉണ്ടായതായി നാഷണൽ സെന്റർ ഫോർ സീസ്മോളജി അറിയിച്ചു. ചൊവ്വാഴ്ച രാവിലെയും പാകിസ്ഥാനിലെ നിരവധി ജില്ലകളിൽ ഭൂകമ്പം റിപ്പോർട്ട് ചെയ്യപ്പെട്ടിരുന്നു. റിക്ടർ സ്കെയിലിൽ 5.2 തീവ്രത രേഖപ്പെടുത്തിയ ഭൂചലനത്തിന്റെ പ്രകമ്പനം ഇസ്ലാമാബാദ്, റാവൽപിണ്ടി, ഖൈബർ സ്വാത്, അബോട്ടാബാദ് എന്നിവിടങ്ങളിലെ നിരവധി ഭാഗങ്ങളിൽ അനുഭവപ്പെട്ടു.