തിരുവനന്തപുരം: പാലക്കാട് എംഎൽഎയും യൂത്ത് കോൺഗ്രസ് സംസ്ഥാന അധ്യക്ഷനുമായ രാഹുൽ മാങ്കൂട്ടത്തിലിനെതിരെ നടപടിയെടുക്കുമെന്ന് പ്രതിപക്ഷ നേതാവ് വി.ഡി സതീശൻ. രാഹുലിനെതിരെ ഉയർന്ന പരാതികൾ ഗുരുതരമെന്നും മുഖം നോക്കാതെ നടപടിയെടുക്കുമെന്നും വി.ഡി സതീശൻ മാധ്യമങ്ങളോട് പറഞ്ഞു. പാർട്ടിയിലെ ഏതെങ്കിലും നേതാക്കൾക്കെതിരെ ആരോപണം ഉയർന്നാൽ മുഖം നോക്കാതെ നടപടിയെടുക്കാൻ മടിക്കില്ലെന്നും അദ്ദേഹം പറഞ്ഞു

പരാതിയിൽ പറയുന്നത് പോലെയുള്ള സംഭവങ്ങൾ നടന്നിട്ടുണ്ടെങ്കിൽ നടപടിയെടുക്കുന്നതിന് താൻ മുൻ കൈയെടുക്കുമെന്ന് വി.ഡി സതീശൻ വ്യക്തമാക്കി. ആരോപണമുന്നയിച്ച പെൺകുട്ടിയായ റിനി തനിക്ക് മകളെപ്പോലെയാണ്. അങ്ങനെ കാണുന്ന ഒരു കുട്ടി വന്ന് പറഞ്ഞാൽ ഒരു പിതാവ് എന്ത് ചെയ്യും അത് താൻ ചെയ്തിട്ടുണ്ടെന്നും അദ്ദേഹം തിരുവനന്തപുരത്ത് മാധ്യമപ്രവർത്തകരോട് പ്രതികരിച്ചു. 

ALSO READ: രാഹുല്‍ മാങ്കൂട്ടത്തിലിനെതിരായ ആരോപണം; എഐസിസി നടപടിയെടുത്തേക്കും, യൂത്ത് കോണ്‍ഗ്രസ് സംസ്ഥാന കമ്മിറ്റിയുടെ വാട്‌സാപ്പ് ഗ്രൂപ്പിലും വിമര്‍ശനം

നേരത്തെ ഇതുമായി ബന്ധപ്പെട്ട് പാർട്ടിയുടെ മുന്നിലോ വ്യകതിപരമായോ പരാതിയൊന്നും ലഭിച്ചിട്ടില്ല എന്നും വി.ഡി സതീശൻ പറഞ്ഞു. പരാതി പാർട്ടി പരിശോധിക്കും. നടപടിക്ക് മുൻകൈയെടുക്കും. ആരോപണ വിധേയന് പറയാനുള്ളത് കൂടി കേട്ട ശേഷമാകും നടപടിയിലേക്ക് കടക്കുക. നടപടിയെടുക്കുന്നതിന് പാർട്ടിയിൽ ഒരു നടപടിക്രമമുണ്ട് എന്നും അദ്ദേഹം അറിയിച്ചു.