തിരുവനന്തപുരം: കേരള ക്രിക്കറ്റ് ലീഗിന്റെ  ഉദ്ഘാടന മത്സരത്തിൽ നിലവിലെ ചാമ്പ്യന്മാരായ ഏരീസ് കൊല്ലം സെയ്‌ലേഴ്‌സ്  ത്രില്ലിങ് വിജയം സ്വന്തമാക്കി. കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ കാലിക്കറ്റ് ഗ്ലോബ്സ്റ്റാർസിനെ ഒരു വിക്കറ്റിനാണ് സെയ്‌ലേഴ്‌സ് തോൽപ്പിച്ചത്. അവസാന ഓവറിൽ തുടർച്ചയായി രണ്ട് സിക്സറുകൾ പറത്തിയ വാലറ്റക്കാരനായ ബിജു നാരായണന്റേ (7 പന്തിൽ പുറത്താവാതെ 15) പ്രകടനമാണ് സെയ്‌ലേഴ്‌സിനെ വിജയത്തിലേക്ക് നയിച്ചത്. 139 റൺസ് വിജയലക്ഷ്യം പിന്തുടർന്ന സെയ്‌ലേഴ്‌സ് 19.5 ഓവറിൽ 9 വിക്കറ്റ് നഷ്ടത്തിൽ ലക്ഷ്യം മറികടന്നു. 41 റൺസ് നേടിയ വത്സൽ ഗോവിന്ദാണ് ടീമിന്റെ ടോപ് സ്കോറർ. കാലിക്കറ്റിനായി അഖിൽ സ്കറിയ 4 വിക്കറ്റും സുദേശൻ മിഥുൻ 3 വിക്കറ്റും വീഴ്ത്തി.

നേരത്തെ, ടോസ് നഷ്ടപ്പെട്ട് ബാറ്റിംഗിനിറങ്ങിയ കാലിക്കറ്റ് 18 ഓവറിൽ 138 റൺസിന് ഓൾഔട്ടായി . 4 വിക്കറ്റ് വീഴ്ത്തിയ ഷറഫുദ്ദീനും  3 വിക്കറ്റ് നേടിയ അമലുമാണ് കാലിക്കറ്റിന്റെ ബാറ്റിങ് നിരയെ എറിഞ്ഞിട്ടത്. കാലിക്കറ്റ് ക്യാപ്റ്റൻ രോഹൻ കുന്നുമ്മൽ 54 റൺസ് നേടി ടോപ് സ്കോററായി.

മറുപടി ബാറ്റിംഗിനിറങ്ങിയ സെയ്‌ലേഴ്‌സിന് ആദ്യ പന്തിൽ തന്നെ വിഷ്ണു വിനോദിനെ (0) നഷ്ടമായി. ഹരികൃഷ്ണന്റെ പന്തിൽ ബൗൾഡായാണ് വിഷ്ണു പുറത്തായത്. പുറകേ വന്ന അഭിഷേക് നായർ (21), സച്ചിൻ ബേബി (24) എന്നിവർ ചേർന്ന് 44 റൺസിന്റെ കൂട്ടുകെട്ടുണ്ടാക്കി. എന്നാൽ, സച്ചിൻ ബേബിയെ പുറത്താക്കി സുദേശൻ മിഥുൻ സെയ്‌ലേഴ്‌സിന് കളിയിലേക്ക് തിരിച്ചു കൊണ്ടു വന്നു. താമസിയാതെ അഭിഷേക് നായരും (റിട്ടേൺ ക്യാച്ചിൽ) പുറത്താവുകയായിരുന്നു. രാഹുൽ ശർമ (0), സജീവൻ അഖിൽ (3), ഷറഫുദ്ദീൻ (5), അമൽ (14), അഷിഖ് മുഹമ്മദ് (2) എന്നിവർ പുറകേ മടങ്ങി . 18-ാം ഓവറിൽ വത്സൽ ഗോവിന്ദും മടങ്ങിയതോടെ 17.5 ഓവറിൽ 9 വിക്കറ്റിന് 115 എന്ന സ്കോരിൽ  കളി കൈവിട്ട നിലയിലായിരുന്നു സെയ്‌ലേഴ്‌സ് .എന്നാൽ അവസാന 2 ഓവറിൽ 24 റൺസാണ് സെയ്‌ലേഴ്‌സിന് ജയിക്കാൻ ആവിശ്യമായിരുന്നത്. 19-ാം ഓവറിൽ 10 റൺസ് പിറന്നു. അവസാന ഓവറിൽ രണ്ട് സിക്സറുകൾ പറത്തി ബിജു നാരായണൻ്റേ തകർപ്പൻ പ്രകടനത്തിൽ കൊല്ലം സെയ്‌ലേഴ്‌സിന് ത്രില്ലിങ് ജയം ആദ്യ മത്സരത്തിൽ തന്നെ പിറന്നു.