ദുബൈ: ക്ലാസ് മുറികളില്‍ മൊബൈല്‍ ഫോണിന് വിലക്ക് ഏര്‍പ്പെടുത്തി എമിറേറ്റ്‌സ് ഇന്റര്‍നാഷണല്‍ സ്‌കൂള്‍. സ്‌കൂള്‍ ഉടമയും യുഎഇയിലെ ശതകോടീശ്വരനുമായ ഖലാഫ് അഹമ്മദ് അല്‍ ഹബ്തൂറാണ് ഇക്കാര്യം അറിയിച്ചത്. പുതിയ അധ്യയന വര്‍ഷം ആരംഭിക്കുന്നതിന് രണ്ട് ദിവസം മുമ്പാണ് സ്‌കൂളിന്റെ തീരുമാനം. കുട്ടികളുടെ പഠനത്തിലെ ശ്രദ്ധയും ചിട്ടയും ഉറപ്പാക്കുന്നതിനായാണ് നീക്കം.

ALSO READ: യുഎഇയില്‍ അധ്യയനാരംഭം മറ്റന്നാള്‍; ബാക്ക് ടു സ്‌കൂള്‍ ബോധവല്‍ക്കരണ പദ്ധതി പ്രഖ്യാപിച്ച് ദുബൈ പൊലിസ് 

അഥവാ കുട്ടികള്‍ സ്‌കൂളുകളിലേക്ക് ഫോണ്‍ കൊണ്ടുവരികയാണെങ്കില്‍ അധികൃതരെ ഏല്‍പ്പിക്കണം. ക്ലാസുകള്‍ കഴിയുന്നതു വരെ വിദ്യാര്‍ത്ഥികളെ ഫോണ്‍ ഉപയോഗിക്കാന്‍ അനുവദിക്കില്ല. ക്ലാസ് കഴിഞ്ഞ ശേഷം അധികൃതര്‍ ഫോണ്‍ തിരികെ നല്‍കും. ഈ അധ്യയന വര്‍ഷം അറബി ഭാഷയ്ക്ക് അധിക പ്രാധാന്യം നല്‍കുമെന്നും ഖലാഫ് അഹമ്മദ് പറഞ്ഞു.

രാജ്യത്തെ സ്‌കൂളുകളില്‍ വിദ്യാര്‍ത്ഥികള്‍ സ്‌കൂളുകളിലേക്ക് ഫോണ്‍ കൊണ്ടുവരുന്നതില്‍ വ്യത്യസ്തമായ നിയമങ്ങളാണ് നിലവിലുള്ളത്. ചില സ്‌കൂളുകള്‍ കര്‍ശന നടപടികള്‍ സ്വീകരിക്കുമ്പോള്‍ മറ്റു ചില സ്‌കൂളുകളില്‍ അത്ര കര്‍ശനമല്ലാത്ത നിയമങ്ങളാണുള്ളത്. ചില സ്‌കൂളുകളില്‍ പൂര്‍ണമായ നിരോധനമുണ്ട്. വിദ്യാര്‍ത്ഥികളുടെ സുരക്ഷയും സ്വകാര്യതയും ഉറപ്പാക്കാനാണ് സര്‍ക്കാര്‍ സ്‌കൂളുകളില്‍ കുട്ടികള്‍ മൊബൈല്‍ ഫോണ്‍ കൊണ്ടുവരുന്നതിന് വിലക്ക് ഏര്‍പ്പെടുത്തിയിരിക്കുന്നത്. നിയമം തെറ്റിച്ച് ഫോണ്‍ കൊണ്ടുവന്നാല്‍ കണ്ടുകെട്ടും. തെറ്റ് ആവര്‍ത്തിച്ചാല്‍ അധ്യയന വര്‍ഷം അവസാനിക്കുന്നതു വരെ മൊബൈല്‍ ഫോണ്‍ പിടിച്ചുവയ്ക്കും. 

ALSO READ: സ്കൂൾ സമയമാറ്റത്തെ കുറിച്ചുള്ള അഭ്യൂഹങ്ങൾ നിഷേധിച്ച് യുഎഇ വിദ്യാഭ്യാസ മന്ത്രാലയം; സമയമാറ്റമില്ലെന്ന് വിശദീകരണം 

ചില സ്വകാര്യ സ്‌കൂളുകള്‍ ഇതിനകം തന്നെ ഈ നിയമങ്ങള്‍ പിന്തുടരുന്നുണ്ട്. രാജ്യത്തെ എല്ലാ സ്‌കൂളുകളും എമിറേറ്റ്‌സ് ഇന്റര്‍നാഷണല്‍ സ്‌കൂള്‍ ഏര്‍പ്പെടുത്തിയ നിയന്ത്രണങ്ങള്‍ പിന്തുടരണമെന്ന് ഖലാഫ് അഹമ്മദ് പറഞ്ഞു. 

വിദ്യാഭ്യാസം ഒരു ഉത്തരവാദിത്തവും വിശ്വാസവുമാണെന്നും സാങ്കേതിക വിദ്യയും അറിവും സ്വത്വവും തമ്മില്‍ എങ്ങനെ ഒരുമിച്ച് കൊണ്ടുപോകണമെന്നതിനെ സംബന്ധിച്ച് വ്യക്തമായ അറിവുള്ള ഒരു തലമുറയെ വാര്‍ത്തെടുക്കുന്നതില്‍ നമ്മള്‍ പങ്കാളികളാണെന്നും അദ്ദേഹം കൂട്ടിച്ചേര്‍ത്തു.

എമിറേറ്റ്‌സ് ഇന്റര്‍നാഷണല്‍ സ്‌കൂളിന് ദുബൈയില്‍ രണ്ട് ശാഖകളാണ് ഉള്ളത്. ഒന്ന് ജുമൈറയിലും മറ്റൊന്ന് മെഡോസിലുമാണുള്ളത്. അല്‍ ഹബ്തൂര്‍ ഗ്രൂപ്പിന്റെ കമ്മ്യൂണിറ്റി സേവനത്തിന്റെ ഭാഗമായി 1991ലാണ് എമിറേറ്റ്‌സ് ഇന്റര്‍നാഷണല്‍ സ്‌കൂള്‍ സ്ഥാപിതമായത്. സ്‌കൂളിന്റെ സ്ഥാപക ചെയര്‍മാന്‍ കൂടിയാണ് അല്‍ ഹബ്തൂര്‍.

Emirates International School in Dubai has implemented a strict ban on mobile phone use in classrooms, promoting a more focused and disciplined educational environment. Learn more about the school's decision and its potential impact on students.