ദുബൈ: സർക്കാർ സ്‌കൂളുകളിലെ ഔദ്യോഗിക സമയം മാറ്റുമെന്ന് സൂചിപ്പിച്ച് സമൂഹ മാധ്യമങ്ങളിൽ പ്രചരിക്കുന്ന വാർത്തകൾ തള്ളി യുഎഇ വിദ്യാഭ്യാസ മന്ത്രാലയം. കിന്റർഗാർട്ടനുകൾ ഉൾപ്പെടെ ഒരു തരത്തിലും സ്‌കൂൾ സമയം മാറ്റാൻ തീരുമാനം എടുത്തിട്ടില്ലെന്ന് വിദ്യാഭ്യാസ മന്ത്രാലയം പുറത്തിറക്കിയ പ്രസ്താവനയിൽ പറയുന്നു. ഓൺലൈൻ വഴി പ്രചരിക്കുന്ന വാർത്തകൾ വാസ്തവിരുദ്ധമാണെന്നും മന്ത്രാലയം പറഞ്ഞു. 

ALSO READ: യുഎഇയില്‍ അധ്യയനാരംഭം മറ്റന്നാള്‍; ബാക്ക് ടു സ്‌കൂള്‍ ബോധവല്‍ക്കരണ പദ്ധതി പ്രഖ്യാപിച്ച് ദുബൈ പൊലിസ് 

ഈ വിഷയത്തിൽ ഔദ്യോഗിക സംവിധാനങ്ങൾ വഴി യാതൊരു തരത്തിലുള്ള പ്രഖ്യാപനവും നടത്തിയിട്ടില്ലെന്നും മന്ത്രാലയം വ്യക്തമാക്കി. വിശ്വസനീയവും കൃത്യവുമായ അപ്‌ഡേറ്റുകൾക്ക് വിദ്യാഭ്യാസ മന്ത്രാലയത്തിന്റെ സോഷ്യൽ മീഡിയാ അക്കൗണ്ടുകളെ ആശ്രയിക്കാൻ അധികൃതർ അഭ്യർത്ഥിച്ചു.

അതേസമയം 'സ്‌കൂൾ സുരക്ഷാ' സംരംഭത്തിലൂടെ 2025- 26 അധ്യയന വർഷത്തിൽ വിദ്യാർത്ഥികളെ ക്ലാസ് മുറികളിലേക്ക് തിരികെ സ്വാഗതം ചെയ്യാനായി (Back to School) ദുബൈ പൊലിസ് സമഗ്ര സുരക്ഷാ പദ്ധതി അവതരിപ്പിച്ചു. ഗതാഗത പ്രവാഹമുള്ള സുപ്രധാന സ്ഥലങ്ങൾ നിരീക്ഷിക്കുന്നതിന് ഒമ്പത് ഡ്രോണുകൾ, ആറ് ആഡംബര പട്രോൾ കാറുകൾ, നാല് മൗണ്ട് പൊലിസ് യൂണിറ്റുകൾ, ഫീൽഡ് സാന്നിധ്യം വർധിപ്പിക്കാൻ 60 സൈക്കിളുകൾ എന്നിവയുടെ പിന്തുണയോടെ സ്‌കൂൾ സോണുകൾ സുരക്ഷിതമാക്കാൻ 250 സുരക്ഷാ, ട്രാഫിക് പട്രോളിംഗുകൾ വിന്യസിക്കുന്നത് ഈ വർഷത്തെ പദ്ധതിയിൽ ഉൾപ്പെടുന്നു. കൂടാതെ, 15 പാർട്ണർ സംഘടനകളുടെ പങ്കാളിത്തത്തോടെയുള്ള 28 ബോധവൽക്കരണ പരിപാടികൾക്കൊപ്പം 300 കുട്ടികൾ 'സുരക്ഷാ അംബാസഡർമാർ' പ്രോഗ്രാമിൽ പങ്കെടുക്കും. 750ലധികം മുതിർന്ന ഉദ്യോഗസ്ഥരും പൊലിസ് ഉദ്യോഗസ്ഥരും ഈ സംരംഭത്തിന്റെ ഭാഗമായി വിദ്യാർത്ഥികളുമായി നേരിട്ട് ഇടപഴകും.

ALSO READ: ഇത്തിഹാദ് റെയിൽ നിർമ്മാണ പ്രവൃത്തികൾ പുരോഗമിക്കുന്നു; എമിറേറ്റ്‌സ് റോഡിലെ അൽ ബാദിയ പാലം താൽക്കാലികമായി അടച്ചിടും 

ദുബൈ പൊലിസ് അക്കാദമി ആക്ടിംഗ് ഡയരക്ടർ ബ്രിഗേഡിയർ നാസർ അൽ സാരി പങ്കെടുത്ത അൽ ജദ്ദാഫിലെ പൊലിസ് ഓഫിസേഴ്‌സ് ക്ലബ്ബിലെ പത്രസമ്മേളനത്തിലാണ് അധികൃതർ വിശദാംശങ്ങൾ വെളിപ്പെടുത്തിയത്. ഹിമായ കൗൺസിൽ സെക്രട്ടറി ജനറൽ ബ്രിഗേഡിയർ ഡോ. അബ്ദുൽ റഹ്മാൻ അൽ മഅമരി, ജനറൽ ഡിപാർട്‌മെന്റ് ഓഫ് ഹ്യൂമൻ റൈറ്റ്‌സിലെ ചൈൽഡ് ആൻഡ് വിമൻസ് പ്രൊട്ടക്ഷൻ ഡയരക്ടർ ലെഫ്റ്റനന്റ് കേണൽ ഡോ. അലി അൽ മത്രൂഷി, 'സ്‌കൂൾ സെക്യൂരിറ്റി' സംരംഭത്തിന്റെ തലവൻ ക്യാപ്റ്റൻ മജീദ് ബിൻ സഈദ് അൽ കഅബി, പോസിറ്റിവ് സ്പിരിറ്റ് കൗൺസിൽ ചെയർവുമൺ ഫാത്തിമ ബുജൈർ, ദുബൈയിലുടനീളമുള്ള സ്‌കൂൾ പ്രിൻസിപ്പൽമാർ, മുതിർന്ന ഉദ്യോഗസ്ഥർ എന്നിവർ പങ്കെടുത്തു.

ദുബൈ പൊലിസ് കമാൻഡർഇൻചീഫ് ലെഫ്റ്റനന്റ് ജനറൽ അബ്ദുല്ല ഖലീഫ അൽ മർറിയുടെ നിർദേശ പ്രകാരം, എമിറേറ്റിലുടനീളമുള്ള പൊതുസ്വകാര്യ സ്‌കൂളുകളെ ലക്ഷ്യം വച്ചുള്ള നൂതന സംരംഭങ്ങളിലൂടെയും ഫീൽഡ് പ്രോഗ്രാമുകളിലൂടെയും വിദ്യാഭ്യാസ അന്തരീക്ഷം സുരക്ഷിതവും കൂടുതൽ സംവേദനാത്മകവുമാക്കാൻ സേന പ്രതിജ്ഞാബദ്ധമാണെന്ന് ബ്രിഗേഡിയർ ഡോ. അൽ മഅമരി ഊന്നിപ്പറഞ്ഞു. സുരക്ഷയും സമൂഹ അവബോധവും വളർത്തുന്നതിനായി വിദ്യാർത്ഥികളുമായും രക്ഷിതാക്കളുമായും ഇടപഴകുന്നതിന് ഹിമായ സ്‌കൂളുകൾ ഉൾപ്പെടെ 71 വിദ്യാലയങ്ങൾ ഫീൽഡ് ടീമുകൾ സന്ദർശിക്കുമെന്ന് അദ്ദേഹം അഭിപ്രായപ്പെട്ടു.

The UAE Ministry of Education has officially denied rumors about changes to school timings, assuring parents and students that the current schedule remains in effect.