കോഴിക്കോട്: രാഹുൽ മാങ്കൂട്ടത്തിൽ എംഎൽഎക്കെതിരായ ആരോപണങ്ങളിൽ പ്രതികരിച്ച് ഷാഫി പറമ്പിൽ എംപി. താൻ എങ്ങോട്ടും മുങ്ങിയിട്ടില്ലെന്ന് പറഞ്ഞ ഷാഫി പറമ്പിൽ രാഹുലിനെതിരെ ഒരു പരാതിയും ഇല്ലെന്ന് പറഞ്ഞു. ആരോപണം വന്നപ്പോൾ തന്നെ രാഹുൽ രാജിവെച്ചെന്നും വിമർശിക്കുന്നവർ സ്വന്തം പാർട്ടിയിലേക്ക് ഒന്ന് തിരിഞ്ഞുനോക്കട്ടെ എന്നും ഷാഫി പറഞ്ഞു. ഇപ്പോഴുള്ള ആരോപണങ്ങളിൽ കോൺഗ്രസ് നിർവീര്യമാകില്ലെന്നും അദ്ദേഹം വടകരയിൽ പറഞ്ഞു.

രാഹുൽ മാങ്കൂട്ടത്തിലിന്റെ കൂടെ നിൽക്കാറുള്ള ഷാഫി പറമ്പിൽ ബിഹാറിലേക്ക് ഒളിച്ചോടി എന്ന ആരോപണം പ്രതിപക്ഷം ഉൾപ്പെടെ ഉയർത്തുന്ന സാഹചര്യത്തിൽ ഇന്ന് രാവിലെയാണ് ഷാഫി കണ്ണൂർ വിമാനത്താവളത്തിൽ തിരിച്ചെത്തിയത്. പിന്നാലെ വടകര മണ്ഡലത്തിൽ ഒരു പരിപാടിയിൽ പങ്കെടുക്കാൻ എത്തുകയും ചെയ്തിയിരുന്നു. ബിഹാറിലേക്ക് മുങ്ങി എന്ന പ്രചാരണം തെറ്റാണെന്നും ഷാഫി പിന്നാലെ പ്രതികരിച്ചു. ബിഹാറിൽ രാഹുൽ ഗാന്ധിയുടെ നേതൃത്വത്തിൽ നടക്കുന്ന വോട്ട് അധികാർ യാത്രയിൽ പങ്കെടുക്കാനായിരുന്നു പോയതെന്നും അദ്ദേഹം വ്യക്തമാക്കി. നേരത്തെ നിശ്ചയിച്ച പരിപാടി ആയിരുന്നെന്നും അദ്ദേഹം അറിയിച്ചു.

രാഹുൽ മാങ്കൂട്ടത്തിലിനെതിരെ കോടതി വിധിയോ എഫ്ഐആറോ ഒരു പരാതിയോ ലഭിക്കുന്നതിന് മുൻപു തന്നെ പാർട്ടി നേതൃത്വവുമായി ആലോചിച്ച് രാഹുൽ മാങ്കൂട്ടത്തിൽ രാജി അറിയിച്ചെന്നും ഷാഫി പറമ്പിൽ പറഞ്ഞു. ആരോപണങ്ങളുടെ അടിസ്ഥാനത്തിൽ രാഹുൽ യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാജിവെച്ചു. പിന്നീടും കോണ്‍ഗ്രസ് എന്തു ചെയ്തു എന്ന ചോദ്യം ഉയർത്തുന്നത് എന്തടിസ്ഥാനത്തിലാണെന്നു ഷാഫി പറമ്പിൽ മാധ്യമങ്ങളോട് ചോദിച്ചു. ആരോപണങ്ങളുമായി ബന്ധപ്പെട്ട് രാഹുലിന്റെ രാജി പ്രധാനമായ ചുവട് തന്നെയാണ് എന്നും അദ്ദേഹം വ്യക്തമാക്കി.

അതേസമയം, കോൺഗ്രസിനെ നിർവീര്യമാക്കാനും സർക്കാരിന്റെ പ്രവർത്തികൾ ജനങ്ങളുടെ മുന്‍പിൽ മറച്ചുവയ്ക്കാനുമുള്ള ശ്രമങ്ങളാണോ ഈ ആരോപണങ്ങളും പ്രതിഷേധങ്ങളും കൊണ്ട് പലരും ലക്ഷ്യമിടുന്നതെന്നും ഷാഫി പറമ്പിൽ ചോദിച്ചു. ആരോപണങ്ങളിൽ കോൺഗ്രസ് നിർവീര്യമാകില്ലെന്നും അദ്ദേഹം അറിയിച്ചു