തിരുവനന്തപുരം: കോടികൾ തട്ടിയെടുത്ത ടോട്ടൽ ഫോർ യു തട്ടിപ്പ് കേസിലെ പ്രതി ശബരീനാഥിന്റെ ജാമ്യം റദ്ദാക്കാൻ നടപടികളുമായി പൊലിസ്. ജാമ്യത്തിലിറങ്ങി വീണ്ടും തട്ടിപ്പ് നടത്തിയ സംഭവത്തെ തുടർന്നാണ് പൊലിസ് നടപടി. ജാമ്യം റദ്ദാക്കാൻ നടപടി സ്വീകരിക്കണമെന്ന് വഞ്ചിയൂർ പൊലിസ് വിവിധ സ്റ്റേഷനുകളിലെ ഉദ്യോഗസ്ഥർക്ക് നിർദേശം നൽകി. വൈകാതെ കോടതിയെ സമീപിക്കും.

തിരുവനന്തപുരത്തുള്ള അഭിഭാഷകനിൽ നിന്ന് ശബരീനാഥ് 34 ലക്ഷം രൂപ തട്ടിയെടുത്തിരുന്നു. ഓൺലൈൻ ട്രേഡിങ്ങിലൂടെ സാമ്പത്തിക ലാഭമുണ്ടാക്കി നൽകാമെന്ന് വിശ്വസിപ്പിച്ചാണ് ശബരീനാഥ്‌ പണം കൈപ്പറ്റിയത്. 2024 ജനുവരി മുതലാണ് പണം വാങ്ങി തുടങ്ങിയത്. എന്നാൽ മുടക്കിയ തുകയോ ട്രേഡിങിലൂടെയുള്ള ലാഭമോ നൽകിയില്ല. ഈ കൊമേഴ്സ് ബിസിനസ് എന്നപേരിൽ ഒരു സ്ഥാപനം ഇതിനായി ശബരീനാഥ് തുടങ്ങിയിരുന്നു. എന്നാൽ തുടർനടപടികളിലേക്ക് പോകാതെ വന്നതോടെയാണ് അഭിഭാഷകനായ സഞ്ജയ് പരാതി നൽകിയത്.

സംഭവത്തിൽ കോടതിയെ സമീപിച്ച് ശബരീനാഥിന്റെ ജാമ്യം റദ്ദാക്കാൻ കോടതിയെ സമീപിക്കാനൊരുങ്ങുകയാണ് പൊലിസ്. ഇതിന് മുന്നോടിയായി ശബരീനാഥിനായുള്ള അന്വേഷണം പൊലിസ് ഊർജ്ജിതമാക്കി. 

ALSO READ: മോദിയുടെ 'ബിരുദം' രഹസ്യമായി തുടരും; ഡിഗ്രി സര്‍ട്ടിഫിക്കറ്റ് പരസ്യമാക്കേണ്ടതില്ലെന്ന് ഡല്‍ഹി ഹൈക്കോടതി, വിവരാവകാശ കമ്മീഷന്റെ ഉത്തരവ് തള്ളി 

ടോട്ടൽ ഫോർ യു തട്ടിപ്പ് കേസ് 

Total4U എന്ന പേരിൽ തുടങ്ങിയ സ്ഥാപനം വഴി നിക്ഷേപകരെ ആകർഷിച്ച് ഉയർന്ന തുക തിരിച്ച് നൽകാമെന്ന് വാഗ്ദാനം ചെയ്ത് പണം തട്ടിയ കേസാണ് ടോട്ടൽ ഫോർ യു തട്ടിപ്പ് കേസ്. 2007 - 08 കാലഘട്ടത്തിൽ നടന്ന സംഭവത്തിൽ ശബരീനാഥ്‌ തട്ടിയെടുത്തത് 50 മുതൽ 200 കോടി രൂപവരെയാണ്. ഈ സംഭവം നടക്കുമ്പോൾ കേവലം 18 വയസു മാത്രമായിരുന്നു ശബരിനാഥിന് ഉണ്ടായിരുന്നത്. എന്നാൽ ഇയാളെ വിശ്വസിച്ച് കോടികൾ നിക്ഷേപിച്ചവരുടെ കൂട്ടത്തിൽ ബിസിനസുകാരും സിനിമ പ്രവർത്തകരും രാഷ്ട്രീയക്കാരും എല്ലാം ഉണ്ടായിരുന്നു. 

Centurion Bank-ന്റെ 50 കോടി രൂപയുടെ വ്യാജ ഫിക്സഡ് ഡെപ്പോസിറ്റ് സർട്ടിഫിക്കറ്റ് കാണിച്ചാണ് ശബരീനാഥ്‌ നിക്ഷേപകരെ വഞ്ചിച്ചത്. നിക്ഷേപമായി ലഭിച്ച പണം മുഴുവൻ ധൂർത്തടിക്കാനും വ്യക്തിഗത കാര്യങ്ങൾക്കുമാണ് ഇയാൾ ഉപയോഗിച്ചത്. 21 ആഡംബര കാറുകളും കോടികളുടെ ഭൂമിയും ഇയാൾ സ്വന്തമാക്കി. സംഭവത്തിലെ തട്ടിപ്പ് പുറത്തുവന്നതോടെ നാടുവിട്ട ഇയാളെ 2008 ഓഗസ്റ്റ് 1 ന് നാഗർകോവിലിൽ നിന്ന് പൊലിസ് അറസ്റ്റ് ചെയ്തു.

പിന്നീട് 2011 ൽ ജാമ്യം കിട്ടായ ശബരിനാഥ്‌ വൈകാതെ ഒളിവിൽ പോയി. പിന്നീട് മൂന്ന് വർഷത്തെ ഒലിവ് ജീവിതത്തിന് ശേഷം 2014 ഏപ്രിൽ 21 ഇയാൾ കോടതിയിൽ കീഴടങ്ങി. 2016 സെപ്റ്റംബർ 29 ന് രണ്ട് കേസുകളിൽ ശബരിനാഥിന് 20 വർഷം തടവും 8.28 കോടി രൂപ പിഴയും കോടതി വിധിച്ചു. എന്നാൽ, ശിക്ഷകൾ ഒരേസമയം അനുഭവിക്കാമെന്ന് വിധിയിൽ പറഞ്ഞതിനാൽ ജയിലിൽ കഴിഞ്ഞ കാലവും കണക്കാക്കി കുറഞ്ഞ ശിക്ഷ മാത്രമേ ബാക്കി ഉണ്ടായിരുന്നൊള്ളു.

ശബരിനാഥിനെതിരെ 34 കേസുകൾ രജിസ്റ്റർ ചെയ്തു, ഇതിൽ 33 എണ്ണത്തിന്റെ അന്വേഷണം പൂർത്തിയായി. ഈ കേസിൽ ജാമ്യത്തിൽ ഇരിക്കെയാണ് പുതിയ സംഭവം.