വൈകി ഉണര്‍ന്നും തിരിക്കുപിടിച്ച ദിവസങ്ങളിലും നമ്മള്‍ സൗകര്യ പൂര്‍വം ഒഴിവാക്കുന്ന ഒന്നാണ് ബ്രേക്ക്ഫാസ്റ്റ്. ഒരു ദിവസത്തെ ഏറ്റവും പ്രധാനപ്പെട്ട ഭക്ഷണമാണ് പ്രഭാതഭക്ഷണമെന്ന് നമുക്കറിയാത്തതു കൊണ്ടുമല്ല. എന്നാലും ബ്രേക്ക്ഫാസ്റ്റ് ഒഴിവാക്കുന്നവര്‍ ധാരാളമാണ്. ഇത് ആരോഗ്യത്തിന് നല്ലതല്ലെന്നും നിരവധി ആരോഗ്യസങ്കീര്‍ണതകള്‍ക്ക് കാരണമാകുമെന്നുണ്ടെന്നും ആരോഗ്യ വിദഗ്ധര്‍ പറയാറുമുണ്ട്.

ബ്രേക്ക്ഫാസ്റ്റ് ഒഴിവാക്കുന്നത് മൂലം നിങ്ങളുടെ പല്ലുകളെ പോലും ഇതു ബാധിച്ചേക്കാമെന്നാണ് വിദഗ്ധര്‍ മുന്നറിയിപ്പ് നല്‍കുന്നത്. ബ്രേക്ക്ഫാസ്റ്റ് ഒഴിവാക്കുന്നതുമൂലം വയര്‍ ഒഴിഞ്ഞിരിക്കുന്ന സമയം വീണ്ടും കൂടുകയാണ്. ഇത് ശരീരത്തിന്റെ ആന്തരിക താളത്തെ തന്നെ മാറ്റിമറിക്കും.

ഗ്യാസ്ട്രിക് ആസിഡ് ഉല്‍പാദനം വര്‍ധിക്കുകയും ഗാസ്‌ട്രോ ഈസോഫേഷ്യല്‍ റിഫ്‌ലക്‌സ് ഡിസീസ് ലക്ഷണങ്ങള്‍ കൂടുകയും ചെയ്യുന്നതാണ്. ദീര്‍ഘനേരം കഴിക്കാതിരിക്കുമ്പോള്‍ സ്വാഭാവികമായും ചവയ്ക്കുക എന്ന പ്രക്രിയയും നടക്കുന്നില്ല. അതിന്റെ ഫലമായി ഉമിനീര്‍ ഉത്പാദനവും കുറയുന്നു.

ഉമിനീര്‍ ഒരു ലൂബ്രിക്കന്റ് മാത്രമല്ല അത് ശരീരത്തിലെ ആസിഡിനെ നിര്‍വീര്യമാക്കാന്‍ സഹായിക്കുന്ന സ്വാഭാവിക ഘടകം കൂടിയാണ്. അതില്‍ ബൈകാര്‍ബണേറ്റുകളും എന്‍സൈമുകളും അടങ്ങിയിട്ടുണ്ട്. ബ്രേക്ക്ഫാസ്റ്റ് ഒഴിവാക്കിയാല്‍ ആമാശയത്തില്‍ അസിഡിറ്റി ഉണ്ടാകുന്നതാണ്. അസിഡിറ്റി ആമാശയത്തെ മാത്രമല്ല, അത് ദന്താരോഗ്യത്തെയും ബാധിക്കും.

ALSO READ: വെള്ളം കുടിക്കുമ്പോള്‍ ഈ തെറ്റുകള്‍ ചെയ്യുന്നവരാണോ..?  ശ്രദ്ധിക്കുക

വായയുടെ ഉള്‍ഭാഗത്ത് സാധാരണയായി ആറു മുതല്‍ ഏഴു വരെയുള്ള ന്യൂട്രല്‍ പിഎച്ച് ആണ് ഉള്ളത്. എന്നാല്‍ അസിഡിറ്റി മൂലം അതില്‍ വലിയ കുറവു വരുന്നത് ഡീമിനറലൈസേഷന്‍ എന്ന പ്രക്രിയയിലൂടെ ഇനാമലിന്റെ നാശത്തിന് കാരണമാകുന്നതാണ്. ഇങ്ങനെ പല്ലുകളില്‍ പോടുകള്‍ രൂപപ്പെടുകയും പുളിപ്പ് ഉണ്ടാകുകയും ചെയ്യുന്നു.

അതുകൊണ്ട് തന്നെ യാതൊരു കാരണവശാലും പ്രഭാതഭക്ഷണം കഴിക്കാതിരിക്കരുത്. പരമാവധി കഴിക്കാന്‍ ശ്രമിക്കുക. ഇത് ഉമിനീര്‍ ഉല്‍പാദനത്തെ ഉത്തേജിപ്പിക്കുകയും രാവിലത്തെ ആസിഡിനെ പ്രതിരോധിക്കുകയും ഗാസ്‌ട്രോ ഈസോഫേഷ്യല്‍ റിഫ്‌ലക്‌സ് ഡിസീസ് നിയന്ത്രിക്കുകയും ചെയ്യും.

രാവിലെ അസിഡിറ്റി ഒഴിവാക്കുന്നതിന് വെള്ളം കുടിച്ച് ആരംഭിക്കുന്നതാണ് ഏറെ നല്ലത്. കാപ്പി പോലുള്ളവ വെറും വയറ്റില്‍ കുടിക്കുന്നതും പരമാവധി ഒഴിവാക്കുക.

While many people conveniently skip breakfast—especially on rushed or lazy mornings—health experts strongly advise against it. Breakfast is not just another meal; it plays a crucial role in maintaining metabolic balance, oral health, and digestive well-being.