റാസല്‍ഖൈമ: റാസല്‍ഖൈമ നഗരത്തിലെ ഗതാഗതക്കുരുക്ക് ലഘൂകരിക്കാനായി ശൈഖ് മുഹമ്മദ് ബിന്‍ സാലം റോഡ് (ഇ 11) വികസിപ്പിക്കാന്‍ റാസല്‍ഖൈമ പൊതു സേവന വകുപ്പ് തീരുമാനിച്ചു. ഈ പ്രധാന അടിസ്ഥാന സൗകര്യ വികസന പദ്ധതി നഗരത്തിലെ ഗതാഗത പ്രവാഹം മെച്ചപ്പെടുത്താനും യാത്രക്കാര്‍ക്ക് കൂടുതല്‍ സൗകര്യങ്ങള്‍ ഒരുക്കാനും ലക്ഷ്യമിടുന്നു. 
അല്‍ ഹംറ റൗണ്ട് എബൗട്ട് മുതല്‍ ശൈഖ് മുഹമ്മദ് ബിന്‍ സായിദ് റോഡ് (ഇ 311) വരെയുള്ള ഭാഗങ്ങളിലാണ് റോഡ് വികസിപ്പിക്കുന്നത്. റോഡ് ശൃംഖല വിപുലീകരിക്കാനുള്ള സമഗ്ര പദ്ധതിയുടെ ഭാഗമാണിത്. സെപ്തംബര്‍ ഒന്നിന് നിര്‍മാണ പ്രവര്‍ത്തനങ്ങള്‍ ആരംഭിക്കുമെന്നും അധികൃതര്‍ അറിയിച്ചു.

ഒന്നാം ഘട്ടത്തില്‍ റോഡ് വീതി കൂട്ടി ഇരു വശത്തും നാല് വരികളാക്കും. അതോടൊപ്പം, ഗതാഗതം സുഗമമാക്കാന്‍ പ്രത്യേക സര്‍വിസ് റോഡ് നിര്‍മിക്കുകയും ചെയ്യും. വൈദ്യുതി, ടെലികമ്യൂണിക്കേഷന്‍, ജലസേചനം, മഴവെള്ളം ഒഴുക്കി വിടാനുള്ള ഓടകള്‍ തുടങ്ങി അവശ്യ പൊതു ഉപയുക്തതാ ശൃംഖലകള്‍ വികസിപ്പിക്കുകയും അത്യാധുനിക എല്‍.ഇ.ഡി വിളക്കു കാലുകള്‍ സ്ഥാപിക്കുകയും ചെയ്യും. ഈ ഘട്ടത്തില്‍ അല്‍ ഹംറ റൗണ്ട് എബൗട്ടിലെ ഇ 11 ഭാഗങ്ങളില്‍ ഗതാഗതം വഴിതിരിച്ചു വിടുന്നതാണ്. ഇതിനായി ഏകദേശം 2 കിലോമീറ്റര്‍ നീളമുള്ള താല്‍ക്കാലിക റോഡും നിര്‍മിക്കും.
പദ്ധതിയുടെ രണ്ടാം ഘട്ടത്തില്‍, റോഡ് വീതി കൂട്ടുന്ന പ്രവര്‍ത്തനങ്ങള്‍ പൂര്‍ത്തിയാക്കും. അതോടൊപ്പം, ഡോള്‍ഫിന്‍ ജങ്ഷന്‍ (എസ് 4), ഇ 11ഇ, 311 ജങ്ഷന്‍ (ഡി 1), റെഡ് ടണല്‍ (എസ് 3), മിനാ അല്‍ അറബ് ടണല്‍ (എഫ് 1/എഫ് 2) എന്നിവിടങ്ങളില്‍ പുതിയ പാലങ്ങളും തുരങ്കങ്ങളും നിര്‍മിക്കും. ഗതാഗത കുരുക്ക് ഒഴിവാക്കാന്‍ പുതിയ പാതകളും കൂട്ടിച്ചേര്‍ക്കുന്നതാണ്. ഈ ഘട്ടത്തിലും ഗതാഗതം ബദല്‍ പാതകളിലേക്ക് വഴിതിരിച്ചു വിടുന്നതുമാണ്. റാസല്‍ഖൈമയിലെ വര്‍ധിച്ചു വരുന്ന ജനസംഖ്യയുടെ ആവശ്യങ്ങള്‍ നിറവേറ്റാനും എമിറേറ്റിന്റെ ദീര്‍ഘ കാല വികസനം ലക്ഷ്യമിട്ടുമാണ് ഈ പദ്ധതി. ആധുനികവും കാര്യക്ഷമവുമായ റോഡ് ശൃംഖല സൃഷ്ടിക്കുന്നതിലൂടെ എമിറേറ്റിന്റെ വളര്‍ച്ചയ്ക്ക് ഇത് വലിയ സംഭാവന നല്‍കുമെന്ന് അധികൃതര്‍ വ്യക്തമാക്കി.

വളര്‍ച്ചയ്ക്ക് കരുത്ത് പകര്‍ന്ന് പ്രോപര്‍ട്ടി, റിയല്‍ എസ്റ്റേറ്റ് മേഖലകള്‍
അനുദിനം വളര്‍ന്നു കൊണ്ടിരിക്കുന്ന എമിറേറ്റാണ് റാസല്‍ഖൈമ. 3.9 ബില്യണ്‍ ഡോളര്‍ വിലമതിക്കുന്ന വെയ്ന്‍ അല്‍ മര്‍ജാന്‍ ഐലന്‍ഡ് റിസോര്‍ട്ട് പോലുള്ള ഹോട്ടല്‍ പദ്ധതികളും പ്രോപര്‍ട്ടി വികസനങ്ങളും ഈ വളര്‍ച്ചയ്ക്ക് കരുത്ത് പകരുന്നു.

അബൂദബിയിലെ അല്‍ദാര്‍ പ്രോപര്‍ടീസ്, ദുബൈ ഇന്‍വെസ്റ്റ്‌മെന്റ്‌സ്, ദാര്‍ ഗ്ലോബല്‍, ഡമാക് പ്രോപര്‍ടീസ് എന്നിവയുള്‍പ്പെടെയുള്ള ഡെവലപര്‍മാരും പദ്ധതികള്‍ തയാറാക്കുന്നു. റാസല്‍ഖൈമയിലെ ജനസംഖ്യ ഏകദേശം 400,000 ആണെന്നും, അത് വര്‍ധിച്ചു കൊണ്ടിരിക്കുന്നുവെന്നും റാസല്‍ഖൈമ മീഡിയ ഓഫിസ് പറയുന്നു.

2030 അവസാനത്തോടെ ഇവിടത്തെ റെസിഡന്‍ഷ്യല്‍ സ്റ്റോക്ക് ഇരട്ടിയാകുമെന്നും, 11000ത്തിലധികം യൂണിറ്റുകള്‍ പൂര്‍ത്തിയാകുമെന്നും, ആഗോള റിയല്‍ എസ്റ്റേറ്റ് കണ്‍സള്‍ട്ടന്‍സി സാവില്‍സിന്റെ സമീപ കാല റിപ്പോര്‍ട്ട് സൂചിപ്പിക്കുന്നു.
പ്രോപര്‍ടി വില്‍പനയിലും ടൂറിസത്തിലുമുള്ള വളര്‍ച്ചയ്ക്ക് കൂടുതല്‍ സന്ദര്‍ശകര്‍, പ്രോപര്‍ടി ലോഞ്ചുകള്‍, വെയ്ന്‍ റിസോര്‍ട്ട് പോലുള്ള പദ്ധതികള്‍ എന്നിവ കാരണമാകുമെന്ന് സാവില്‍സ് അഭിപ്രായപ്പെട്ടു.

ALSO READ: പ്രവാസി എഴുത്തുകാരന്‍ ബാലചന്ദ്രന്‍ തെക്കന്മാര്‍ ഷാര്‍ജയില്‍ അന്തരിച്ചു

Ras Al Khaimah has unveiled plans for a massive infrastructure project to expand and upgrade Sheikh Mohammed bin Salem Road (E11), a key coastal artery running from Al Hamra Roundabout to its intersection with Sheikh Mohammed bin Zayed Road (E311).