ബീജിങ്: ഇന്ത്യൻ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷീ ജിൻപിങുമായി നടത്തിയ കൂടിക്കാഴ്ച അവസാനിച്ചു. 40 മിനുട്ട് നീണ്ടുനിന്ന നിർണായക ചർച്ച ലോകം ഏറെ ആകാംക്ഷയോടെയാണ് നോക്കിക്കണ്ടത്. പരസ്പരവിശ്വാസത്തോടെ ബന്ധം മുന്നോട്ട് കൊണ്ടുപോകുന്നതിൽ ഇന്ത്യയും ചൈനയും പ്രതിജ്ഞാബദ്ധരാണെന്ന് മോദി കൂടികാഴ്ചക്കിടെ പരാമർശിച്ചു. ഏഴ് വർഷത്തിന് ശേഷമാണ് ഇരുരാജ്യ തലവന്മാരും ചൈനയിൽവെച്ച് കൂടിക്കാഴ്ച നടത്തുന്നത്.

അമേരിക്കയുടെ തീരുവ ഭീഷണിക്കിടെയാണ് ഇന്ത്യ–ചൈന ചർച്ച നടന്നത്. ദേശീയ സുരക്ഷാ ഉപദേഷ്ടാവ് അജിത് ഡോവലും വിദേശകാര്യ സെക്രട്ടറി വിക്രം മിസ്രിയും മോദിയ്‌ക്കൊപ്പം ഇന്ത്യയുടെ ഭാഗത്ത് നിന്ന് ചർച്ചയിൽ പങ്കെടുത്തു. അതിർത്തിയുടെ മാനേജ്മെന്റിനായി ഒരു കരാറിലെത്തിയെന്നും ചർച്ചയ്ക്ക് ശേഷം പ്രധാനമന്ത്രി പറഞ്ഞു.

ഇരു രാജ്യങ്ങളും തമ്മിലുള്ള ബന്ധത്തിൽ പുരോഗതി ഉണ്ടായെന്നും ചർച്ച വിലയിരുത്തലുണ്ടായി. മാനവരാശിയുടെ ആകെ പുരോഗതിക്ക് ഇന്ത്യ-ചൈന ബന്ധം അനിവാര്യമാണ് എന്ന് പ്രധാനമന്ത്രി നരേന്ദ്ര മോദി പറഞ്ഞു. റഷ്യയിലെ കസാനിൽ 10 മാസം മുൻപ് ഉണ്ടാക്കിയ ധാരണ നന്നായി മുന്നോട്ടു കൊണ്ടു പോകാനായെന്നും അദ്ദേഹം പറഞ്ഞു. അതിർത്തി തർക്കം പരിഹരിക്കാനുള്ള സംഭാഷണം ഷി ജിൻപിങുമായി നടന്നെന്നും മോദി പറഞ്ഞു. 

ALSO READ: ഇന്ത്യ - ചൈന ബന്ധം ശക്തമാകുമോ? മോദി - ഷി ജിൻപിങ് കൂടിക്കാഴ്ച്ച ഇന്ന്, ഉറ്റുനോക്കി അമേരിക്ക

ഇന്ത്യ-ചൈന അതിർത്തിയിൽ നിലവിൽ ശാന്തമായ അന്തരീക്ഷമാണെന്നും മോദി വ്യക്തമാക്കി. ഇന്ത്യയ്ക്കും ചൈനയ്ക്കും ഇടയിൽ നേരിട്ടുള്ള വിമാന വൈകാതെ ആരംഭിക്കുമെന്നും അദ്ദേഹം പറഞ്ഞു. ഇരു രാജ്യങ്ങളും ബന്ധം നന്നാക്കേണ്ടത് 280 കോടി ജനങ്ങളുടെ ക്ഷേമത്തിന് പ്രധാനമെന്നും അദ്ദേഹം കൂട്ടിച്ചേർത്തു. .

എസ്.സി.ഒയുടെ ചെയർമാൻ സ്ഥാനം വഹിക്കുന്ന ഷീ ജിങ്പിങ്ങിനെ പ്രധാനമന്ത്രി അഭിനന്ദിച്ചു. ഷീ ജിൻപിങിന്റെ ക്ഷണത്തിന് നന്ദി അറിയിക്കുകയാണെന്നും നരേന്ദ്ര മോദി കൂട്ടിച്ചേർത്തു. 

ഏഴ് വർഷത്തിന് ​ശേഷമാണ് ചൈനയിൽ പ്രധാനമന്ത്രി നരേന്ദ്ര മോദി സന്ദർശനം നടത്തുന്നത്. എസ്.സി.ഒ സമ്മേളനത്തിൽ പ​ങ്കെടുക്കുന്നതിനും ചൈനീസ് പ്രസിഡന്റുമായി കുടിക്കാഴ്ച നടത്തുന്നതിനുമായാണ് മോദി ഇന്നലെ ചൈനയിൽ എത്തിയത്.