ഗസ്സ: അൽ ഖസ്സാം വക്താവ് അബൂ ഉബൈദയെ വധിച്ചെന്ന് ഇസ്‌റാഈൽ മാധ്യമങ്ങൾ. Ynet News ആണ് ഫലസ്തീൻ, ഇസ്‌റാഈൽ വൃത്തങ്ങളെ ഉദ്ധരിച്ച് വാർത്ത പുറത്തുവിട്ടത്. ഗസ്സ സിറ്റിയിലെ റിമാൽ മേഖലയിൽ ഇസ്‌റാഈൽ ശനിയാഴ്ച നടത്തിയ  വ്യോമാക്രമണത്തിൽ കൊല്ലപ്പെട്ടെന്നാണ് റിപ്പോർട്ട്. 

എന്നാൽ അബു ഉബൈദയുടെ മരണം സംബന്ധിച്ച് യാതൊരു സ്ഥിരീകരണവും ഹമാസിന്റെയോ അൽ ഖസ്സാമിന്റെയോ ഭാഗത്ത് നിന്ന് ഇതുവരെ വന്നിട്ടില്ല. ആക്രമണം നടത്തിയ ഇസ്‌റാഈൽ പ്രതിരോധ സേനയും ഇക്കാര്യത്തിൽ പ്രതികരിച്ചിട്ടില്ല. 

ഒരു അപ്പാർട്ട്മെന്റിൽ നടന്ന ഇസ്‌റാഈൽ ആക്രമണത്തിൽ എല്ലാ താമസക്കാരും കൊല്ലപ്പെട്ടതായി ഒരു ഫലസ്തീൻ വൃത്തത്തെ ഉദ്ധരിച്ച് സഊദി  വാർത്താ മാധ്യമമായ അൽ-അറേബ്യ റിപ്പോർട്ട് ചെയ്തു. ഇക്കാര്യത്തിലും സ്ഥിരീകരണം ഉണ്ടായിട്ടില്ല. ഇസ്രായേൽ പ്രതിരോധ സേന (ഐഡിഎഫ്) അബു ഉബൈദ താമസിച്ചിരുന്ന അപ്പാർട്ട്മെന്റിൽ ആക്രമണം നടത്തി അദ്ദേഹത്തെയും അതിനുള്ളിലെ എല്ലാവരെയും കൊന്നതായി പലസ്തീൻ വൃത്തങ്ങൾ അൽ അറബിയയോട് പറഞ്ഞു എന്നാണ് റിപ്പോർട്ട് വ്യക്തമാക്കുന്നത്.

ഗസ്സ നഗരത്തിലെ ഒരു മുതിർന്ന 'ഹമാസ് തീവ്രവാദി' യെ ലക്ഷ്യമിട്ടാണ് ആക്രമണം നടത്തിയതെന്ന് ഐഡിഎഫും ഷി ബെറ്റും പറയുന്നുണ്ടെങ്കിലും അത് അബു ഉബൈദ ആണെന്ന് പറഞ്ഞിട്ടില്ല. ആക്രമണങ്ങളിൽ കൃത്യതയുള്ള യുദ്ധോപകരണങ്ങൾ, വ്യോമ നിരീക്ഷണം, അധിക ഇന്റലിജൻസ് എന്നിവ ഉപയോഗിച്ചതായി ഇസ്‌റാഈൽ സൈന്യം അറിയിച്ചു. അബു ഉബൈദയെയാണ് വ്യോമാക്രമണത്തിന്റെ ലക്ഷ്യമെന്ന് ഇസ്‌റാഈലിന്റെ ചാനൽ 13 റിപ്പോർട്ട് ചെയ്തു.

അബു ഉബൈദ എന്ന നാമത്തിൽ അറിയപ്പെടുന്ന ഹുദൈഫ സമീർ അബ്ദുല്ല അൽ-കഹ്‌ലൗത്ത് ഫലസ്തീന്റെ പോരാട്ടത്തിലെ ഏറ്റവും പ്രധാനപ്പെട്ട വ്യക്തിയാണ്. 2002 ലാണ് മുതിർന്ന ഫീൽഡ് ഓപ്പറേറ്റീവായി അദ്ദേഹം ഉയർന്നുവന്നത്. നിരവധി പോരാട്ടങ്ങളുടെ ഭാഗമായിരുന്നു അദ്ദേഹം. 2005 ൽ ഇസ്‌റാഈൽ ഗസ്സയിൽ നിന്ന് പിന്മാറിയതിനെത്തുടർന്ന് ഫലസ്തീന്റെ ഔദ്യോഗിക ശബ്ദമായി മാറി. ഔദ്യോഗിക വക്താവായി തങ്ങളുടെ നിലപാടുകൾ എന്നും ലോകത്തോട് വിളിച്ചുപറഞ്ഞ വ്യക്തികൂടിയായിരുന്നു അബു ഉബൈദ.

ഇതാദ്യമായല്ല അബു ഉബൈദയെ ഇല്ലാതാക്കാൻ വേണ്ടി ഐഡിഎഫ് ആക്രമണം നടത്തുന്നത്. എന്നാൽ അപ്പോഴെല്ലാം തിരിച്ചുവന്ന് തന്നെ തൊടാൻ ഇസ്‌റാഈൽ സൈന്യത്തിന് സാധിച്ചില്ലെന്ന് പറഞ്ഞ വ്യക്തിയാണ് അബു ഉബൈദ എന്ന ഹുദൈഫ സമീർ അബ്ദുല്ല അൽ-കഹ്‌ലൗത്ത്. ഇത്തവണയും അദ്ദേഹം തിരിച്ചെത്തുമെന്ന പ്രതീക്ഷയിലാണ് ഫലസ്തീനിലെ അനുയായികൾ.