കൊച്ചി:ഓൺലൈൻ ട്രേഡിങ് വാഗ്ദാനം ചെയ്ത് കൊച്ചിയിലെ ഒരു വ്യവസായിയെ കബളിപ്പിച്ച് 25 കോടി രൂപ തട്ടിയെടുത്ത സൈബർ തട്ടിപ്പിന് പിന്നിൽ കാലിഫോർണിയയിൽ രജിസ്റ്റർ ചെയ്ത ക്യാപിറ്റാലിക്സ് എന്ന കമ്പനിയാണെന്ന് പൊലിസ് കണ്ടെത്തി. 2023 മാർച്ച് മുതൽ 2025 വരെ പല ഘട്ടങ്ങളിലായാണ് 26 കോടി രൂപയോളം തട്ടിയെടുത്തത്. ഇന്ത്യയിലെ വിവിധ ബാങ്ക് അക്കൗണ്ടുകളിലേക്കാണ് ഈ തുക നിക്ഷേപിക്കപ്പെട്ടതെന്നും അന്വേഷണത്തിൽ പൊലിസ് കണ്ടെത്തി.

കേസിന്റെ വിശദാംശങ്ങൾ

‘ഡാനിയൽ’ എന്ന് പരിചയപ്പെടുത്തിയ ഒരു മലയാളി വ്യവസായിയുമായി ടെലഗ്രാം വഴി ആശയവിനിമയം നടത്തിയിരുന്നു. ഷെയർ ട്രേഡിങിനായി നൽകിയ ആപ്ലിക്കേഷൻ വ്യാജമായിരുന്നുവെന്നാണ് പൊലിസിൻ്റേ നിഗമനം. ക്യാപിറ്റാലിക്സ് എന്ന കമ്പനി മുൻപും രാജ്യാന്തര സൈബർ തട്ടിപ്പുകളിൽ പ്രതിസ്ഥാനത്ത് വന്നിട്ടുണ്ട്. ഈ കേസിൽ ‘ഡാനിയൽ’ എന്ന പേര് എഫ്ഐആറിൽ പ്രതിയായി ചേർത്തിട്ടുണ്ട്, എന്നാൽ ഇങ്ങനെയൊരാൾ യഥാർഥത്തിൽ നിലനിൽക്കുന്നുണ്ടോ എന്നതിൽ ഇതുവരെ ഒരു വ്യക്തതയില്ല.

ALSO READ: വ്യാജ ട്രേഡിങ് ആപ്പ് തട്ടിപ്പ്; ഇരട്ടി ലാഭം വാഗ്ദാനം ചെയ്ത് ഫാർമസ്യൂട്ടിക്കൽ കമ്പനി ഉടമയിൽ തട്ടിയെടുത്തത് 25 കോടി

തട്ടിപ്പിന്റെ രീതി

കൊച്ചി എളംകുളം കുമാരനാശാൻ നഗറിൽ താമസിക്കുന്ന ഒരു ഫാർമസ്യൂട്ടിക്കൽ കമ്പനി ഉടമയാണ് തട്ടിപ്പിനിരയായത്. www.capitalix.com എന്ന വെബ്സൈറ്റ് വഴി ട്രേഡിങ് നടത്തിയാൽ ഉയർന്ന ലാഭം ലഭിക്കുമെന്ന് വിശ്വസിപ്പിച്ചാണ് വ്യവസായിയെ തട്ടിപ്പിന് ഇരയാക്കിയത്. ഇതിനായി ‘ക്യാപിറ്റാലിക്സ് ബോട്ട്’ എന്ന ടെലഗ്രാം അക്കൗണ്ടും ഉപയോഗിച്ചിരുന്നു. മൂന്ന് ബാങ്കുകളിലായി 96 തവണകളിലാണ് ഇടപാടുകൾ നടന്നത്, ഇതിലൂടെ 25 കോടി രൂപ നഷ്ടമായി.

കേസിൽ പൊലിസ് അന്വേഷണം ഊർജിതമാക്കിയിട്ടുണ്ട്. കമ്പനി യഥാർഥമാണോ, ഇന്ത്യയിൽ രജിസ്റ്റർ ചെയ്തിട്ടുണ്ടോ, ഓൺലൈൻ ട്രേഡിങ് നടത്തുന്നുണ്ടോ എന്നി കാര്യങ്ങൾ പരിശോധിക്കേണ്ടതുണ്ടെന്ന് അന്വേഷണ സംഘം വ്യക്തമാക്കി. ഗൂഗിളിൽ ഒരു പരിശോധന നടത്തിയിരുന്നെങ്കിൽ തട്ടിപ്പിനെക്കുറിച്ച് വ്യക്തമായേനെ എന്നും പൊലിസ് ചൂണ്ടിക്കാട്ടുന്നു.

വെല്ലുവിളികൾ

സങ്കീർണമായ ഈ സൈബർ തട്ടിപ്പിന്റെ ചുരുളഴിക്കാൻ പ്രത്യേക അന്വേഷണ സംഘം രൂപീകരിച്ചിട്ടുണ്ട്. ഇന്ത്യയിലെ ബാങ്ക് അക്കൗണ്ടുകളിലേക്ക് പണം പോയതിന്റെ വിശദാംശങ്ങൾ രണ്ട് ദിവസത്തിനുള്ളിൽ ശേഖരിക്കാനാകുമെന്നാണ് പ്രതീക്ഷ. തട്ടിപ്പ് സംഘവുമായി ഫോൺ, സോഷ്യൽ മീഡിയ വഴി നടത്തിയ ആശയവിനിമയ വിവരങ്ങളും ശേഖരിക്കേണ്ടതുണ്ട്. രാജ്യം കണ്ട ഏറ്റവും വലിയ സൈബർ തട്ടിപ്പുകളിലൊന്നിന്റെ അന്വേഷണത്തിൽ പൊലിസിന് മുന്നിൽ വലിയ വെല്ലുവിളികളാണ് നിലനിൽക്കുന്നത്.