ന്യൂഡൽഹി: പൗരത്വം തെളിയിക്കുന്നതിനുള്ള മതിയായ രേഖയായി ആധാർ കാർഡ് പരിഗണിക്കാനാകില്ലെന്ന് ആവർത്തിച്ച് സുപ്രിംകോടതി. ബിഹാറിലെ വിവാദമായ കരട് വോട്ടർപട്ടികയിൽ ആളുകളെ ചേർക്കാൻ സഹായിക്കുന്നതിന് ആധാർ കാർഡ് പൗരത്വത്തിന്റെ തെളിവായി സ്വീകരിക്കണമെന്ന് തെരഞ്ഞെടുപ്പ് കമ്മിഷന് നിർദേശം നൽകണമെന്ന രാഷ്ട്രീയ പാർട്ടികളുടെ ആവശ്യം തള്ളിയാണ് കോടതി ഇക്കാര്യം ആവർത്തിച്ചത്.

കോടതി ഉത്തരവുകൾ ഉണ്ടായിരുന്നിട്ടും കരട് വോട്ടർപട്ടികയിൽ നിന്ന് നീക്കംചെയ്ത 65 ലക്ഷം വ്യക്തികൾക്കുള്ള തിരിച്ചറിയൽ രേഖയായി തെരഞ്ഞെടുപ്പ് കമ്മിഷൻ ആധാറിനെ പരിഗണിക്കുന്നില്ലെന്ന് ഹരജിക്കാരിലൊരാളായ ആർ.ജെ.ഡിയുടെ അഭിഭാഷകൻ പ്രശാന്ത് ഭൂഷൺ ചൂണ്ടിക്കാട്ടി.

ALSO READ: സെപ്റ്റംബറിൽ ഈ തീയതികൾ ശ്രദ്ധിച്ചുവെയ്ക്കുക; ആധാർ അപ്‌ഡേറ്റ് മുതൽ യുപിഎസ് പദ്ധതിയിലേക്ക് മാറാനുള്ള അവസരം വരെ

എന്നാൽ ആധാർ ആക്ട് പ്രകാരം ആധാറിന് നൽകിയതിനപ്പുറം ആധാറിന്റെ പദവി ഉയർത്താൻ തങ്ങൾക്ക് കഴിയില്ലെന്നും  ആധാർ നിയമം ശരിവച്ച പുട്ടസ്വാമി വിധിയിൽ അഞ്ചംഗ ഭരണഘടനാ ബെഞ്ച് പുറപ്പെടുവിച്ചതിനപ്പുറം ഈ കോടതിക്ക് പോകാനാകില്ലെന്നും ജസ്റ്റിസുമാരായ സൂര്യ കാന്ത്, ജോയ്മല്യ ബാഗ്ചി എന്നിവരടങ്ങിയ രണ്ടംഗ ബെഞ്ച് പ്രതികരിച്ചു. നിയമം അനുശാസിക്കുന്നതിന് അപ്പുറത്തേക്കുള്ള പദവിയിലേക്ക് ആധാർ കാർഡിനെ ഉയർത്താനാകില്ലെങ്കിലും വോട്ടർ പട്ടികയിൽ പേരുൾപ്പെടുത്തുന്നതിനുള്ള തിരിച്ചറിയൽ രേഖയായി മറ്റുരേഖകൾക്കൊപ്പം ആധാർ കാർഡിനെയും പരിഗണിക്കാവുന്നതാണെന്നും  ബെഞ്ച് അറിയിച്ചു.
 
ബയോമെട്രിക് തെളിവുൾപ്പെടുന്ന തിരിച്ചറിയൽ രേഖയിൽ നിന്ന് വോട്ടവകാശത്തിനുള്ള പൗരത്വരേഖയായി ആധാറിന്റ പദവി ഉയർത്തണമെന്നാണ് ഹരജിക്കാർ ആവശ്യപ്പെട്ടത്. എന്നാൽ ഈയാവശ്യം ചോദ്യംചെയ്ത കോടതി, എന്തിനാണ് ആധാറിന് ഇത്രയധികം പ്രാധാന്യം നൽകുന്നതെന്ന് ചോദിച്ചു.

ALSO READ: ആധാർ പൗരത്വത്തിന്റെ നിർണായക തെളിവായി കണക്കാക്കാനാവില്ല; തിരഞ്ഞെടുപ്പ് കമ്മിഷന്റെ നിലപാട് അം​ഗീകരിച്ച് സുപ്രീം കോടതി

പൗരത്വത്തിന്റെ അന്തിമ തെളിവ് ആധാർ ആണെന്ന ഉത്തരവ് തങ്ങൾ പുറപ്പെടുവിക്കില്ലെന്ന നിലപാട് കോടതി ആവർത്തിച്ചു. പൗരത്വത്തിനുള്ള അവകാശമോ പൗരത്വം തെളിയിക്കുന്നതിനുള്ള രേഖയോ ആയി ആധാറിനെ കണക്കാക്കാനാകില്ലെന്ന് ആധാർ ആക്ടിന്റെ ഒൻപതാം വകുപ്പ് അനുശാസിക്കുന്നതായി 2018 സെപ്റ്റംബറിലെ പുട്ടസ്വാമി കേസിലെ ഉത്തരവ് പരാമർശിച്ച് രണ്ടംഗ ബെഞ്ച് വ്യക്തമാക്കി.