തിരുവനന്തപുരം: അമീബിക് മസ്തിഷ്‌ക ജ്വരം ബാധിച്ച് തിരുവനന്തപുരം മെഡിക്കൽ കോളജിൽ ചികിത്സയിലായിരുന്ന കൗമാരക്കാരൻ രോഗവിമുക്തനായി. 17 വയസ്സുകാരനായ കൗമാരക്കാനാണ് രോഗം ഭേദമായത്. അമീബയും ഫംഗസും രോഗിയുടെ തലച്ചോറിനെ ബാധിച്ചിരുന്നു. കൃത്യമായ ചികിത്സയിലൂടെയാണ് രോഗിയെ ജീവിതത്തിലേക്ക് തിരിച്ചു കൊണ്ടുവന്നതെന്ന് ആരോഗ്യമന്ത്രി വീണ ജോർജ് പറഞ്ഞു. 

ലോകത്ത് തന്നെ ഇത്തരം തിരിച്ചുവരവ് അപൂർവ്വമാണെന്നും ആരോഗ്യ മന്ത്രി അറിയിച്ചു. സംസ്ഥാനത്ത് നിലവിൽ 22 പേരാണ് രോഗം ബാധിച്ച് ചികിത്സയിലുള്ളത്. ഇതിൽ ആദ്യമായാണ് ഇത്തരം ഒരു തിരിച്ചുവരവ് ഉണ്ടായിരിക്കുന്നത്. രോഗമുക്തനായെങ്കിലും നിരീക്ഷണത്തിൽ തുടരും.

ALSO READ: അമീബിക് മസ്തിഷ്‌ക ജ്വരം: കോഴിക്കോട് മൂന്ന് മാസം പ്രായമുള്ള കുഞ്ഞും വീട്ടമ്മയും മരിച്ചു

അതേസമയം, കേരളത്തിൽ അമീബിക് മസ്തിഷ്‌ക ജ്വരം ബാധിച്ച് രോകംഉത്തരാകുന്ന ആദ്യത്തെ സംഭവമല്ല ഇത്. തിരുവനന്തപുരം മെഡിക്കൽ കോളജിൽ ചികിത്സയിലായിരുന്ന 10 പേർ കഴിഞ്ഞവർഷം ആശുപത്രി വിട്ടിരുന്നു. ലോകത്താകമാനം ഈ രോഗം പിടിപെട്ടതിൽ രോഗമുക്തി നേടിയത് 25 പേർ മാത്രമാണ്. ഇതിൽ 14 പേരും കേരളത്തിൽ നിന്നുള്ളവരാണെന്നത് ആരോഗ്യ മേഖലയ്ക്ക് ചരിത്ര നേട്ടമാണ്.

ആഗോള തലത്തിൽ 97 ശതമാനമാണ് രോഗത്തിന്റെ മരണ നിരക്ക്. എന്നാൽ കേരളത്തിലിത് 26 ശതമാനമായി കുറയ്ക്കാൻ സാധിച്ചു. ഏകോപനത്തിനും ചികിത്സയ്ക്കും നേതൃത്വം നൽകിയ മെഡിക്കൽ കോളജിലേയും ആരോഗ്യവകുപ്പിലെയും മുഴുവൻ ടീമിനേയും ആരോഗ്യ മന്ത്രി വീണ ജോർജ് അന്ന് അഭിനന്ദിച്ചിരുന്നു.