കോഴിക്കോട്: സ്ഥിരം ഷെഡ്യൂളിൽ നിന്ന് മാറി വിമാനം പറന്നതോടെ യാത്രക്കാർ പെരുവഴിയിലായി. എയർ ഇന്ത്യ എക്സ്പ്രസ്സ് വിമാനമാണ് സമയക്രമത്തിൽ മാറ്റം വരുത്തി വിമാനം നാലര മണിക്കൂർ മുൻപേ പറന്നത്. സമയം മാറ്റിയത് അറിയിച്ചില്ലെന്നു പറഞ്ഞ് യാത്രക്കാർ വിമാനത്താവളത്തിൽ ബഹളം വച്ചു. എന്നാൽ സമയമാറ്റം അറിയിച്ചെന്നാണ് വിമാനകമ്പനിയുടെ വിശദീകരണം.

ബെംഗളൂരുവിലേക്ക് കരിപ്പൂർ വിമാനത്താവളത്തിൽ നിന്ന് ഇന്നലെ രാത്രി 8.30നുള്ള എയർഇന്ത്യ എക്സ്പ്രസ് വിമാനമാണ് വൈകിട്ട് നാല് മണിക്ക് പുറപ്പെട്ടത്. ഇതറിയാതെ എത്തിയ യാത്രക്കാരാണ് പ്രതിഷേധവുമായി രംഗത്ത് വന്നത്. സമയമാറ്റം അറിയിച്ചിരുന്നില്ലെന്ന് ഇവർ പറഞ്ഞു. 

അതേസമയം, യാത്രക്കാരെ വിവരമറിയിച്ചിരുന്നുവെന്നാണ് എയർ ഇന്ത്യ എക്സ്പ്രസ്സ് അധികൃതർ നൽകുന്ന വിശദീകരണം. ടിക്കറ്റ് തുക തിരിച്ചുനൽകാമെന്ന് പിന്നീട് വിമാനക്കമ്പനി അധികൃതർ അറിയിച്ചതായി യാത്രക്കാർ പറഞ്ഞു