കൽപറ്റ: വായനാട്ടിലേക്കുള്ള പ്രധാന കവാടമായ താമരശ്ശേരി ചുരത്തിൽ വീണ്ടും നിയന്ത്രണം. ഓണത്തിരക്ക് പ്രമാണിച്ചാണ് മൂന്ന് ദിവസത്തെ നിയന്ത്രണം പൊലിസ് ഏർപ്പെടുത്തിയത്. ചുരത്തിൽ, വ്യൂ പോയിന്റിൽ ഉൾപ്പെടെ വാഹനങ്ങൾ പാർക്ക് ചെയ്യരുത്. വ്യൂ പോയിൻറിൽ കൂട്ടം കൂടി നിൽക്കരുത് എന്ന് പൊലിസ് സന്ദർശകർക്ക് കർശന നിർദേശം നൽകി. 

കഴിഞ്ഞ ദിവസം താമരശ്ശേരി ചുരത്തിൽ മണ്ണിടിച്ചിലുണ്ടായി റോഡ് പൂർണമായും അടഞ്ഞ നിലയിലായിരുന്നു. തുടർന്ന് ഏതാനും ദിവസങ്ങളിൽ വാഹനങ്ങൾക്ക് നിയന്ത്രണം ഏർപ്പെടുത്തിയിരുന്നു. പിന്നീട് മണ്ണുമാറ്റി ആദ്യം ചെറുവാഹനങ്ങളും ഓഗസ്റ്റ് 31 ന് മൾട്ടിആക്‌സിൽ വാഹനങ്ങൾക്കും പ്രവേശനാനുമതി നൽകിയിരുന്നു. എന്നാൽ ചുരത്തിൽ ഒറ്റവരിയായുള്ള ഗതാഗത നിയന്ത്രണം തുടരുമെന്നും പൊലിസ് അറിയിച്ചിരുന്നു.

ഇതിനിടെ കഴിഞ്ഞ ദിവസം ഒരു കണ്ടെയ്‌നർ ലോറി ചുരത്തിൽ കുടുങ്ങിയത് വീണ്ടും ഗതാഗത തടസം സൃഷ്ട്ടിച്ചു. ഇതിന് പിന്നാലെയാണ് മൂന്ന് ദിവസത്തേക്ക് കൂടി നിയന്ത്രണം വരുന്നത്. ഓണമായതിനാൽ വയനാട്ടിലേക്ക് വിനോദ സഞ്ചാരത്തിനായി എത്തുന്നവരുടെ എണ്ണം വർധിക്കുന്ന സാഹചര്യത്തിലാണ് പുതിയ നടപടി.