ന്യൂഡൽഹി: കേന്ദ്ര വിദ്യാഭ്യാസ മന്ത്രാലയം NIRF ഇന്ത്യ റാങ്കിംഗ് 2025 പുറത്തിറക്കി. രാജ്യത്തുടനീളമുള്ള മികച്ച പ്രകടനം കാഴ്ചവച്ച സർവകലാശാലകൾ, കോളേജുകൾ, സ്പെഷ്യലൈസ്ഡ് സ്ഥാപനങ്ങൾ എന്നിവയെ പട്ടികപ്പെടുത്തുന്നു. ഇന്ത്യയിലെ ഉന്നത വിദ്യാഭ്യാസ സ്ഥാപനങ്ങളെ വിലയിരുത്തുന്നതിനുള്ള ഒരു പ്രധാന മാനദണ്ഡമാണ് NIRF റാങ്കിംഗ്. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി മദ്രാസ് വീണ്ടും NIRF റാങ്കിംഗിൽ ഒന്നാം സ്ഥാനത്തെത്തി. ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (ഐഐഎസ്‌സി) ബെംഗളൂരു ആണ് രണ്ടാം സ്ഥാനത്ത്. 

ആദ്യപത്തിൽ എത്തിയ മറ്റു സ്ഥാപനങ്ങൾ 

1 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) മദ്രാസ്
2 - ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (ഐഐഎസ്‌സി) ബെംഗളൂരു
3 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) ബോംബെ
4 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) ഡൽഹി
5 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) കാൺപൂർ
6 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) ഖരഗ്പൂർൾ
7 - ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) റൂർക്കി
8 - ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എയിംസ്), ന്യൂഡൽഹി 
9 - ജവഹർലാൽ നെഹ്‌റു സർവകലാശാല, ന്യൂഡൽഹി
10 - ബനാറസ് ഹിന്ദു സർവകലാശാല, വാരണാസി

നാഷണൽ ഇൻസ്റ്റിറ്റ്യൂഷണൽ റാങ്കിംഗ് ഫ്രെയിംവർക്ക് (NIRF) പ്രകാരം വർഷം തോറും നടത്തുന്ന ഇന്ത്യ റാങ്കിംഗ്, രാജ്യത്തുടനീളമുള്ള ഉന്നത വിദ്യാഭ്യാസ സ്ഥാപനങ്ങളെ വിലയിരുത്തുന്നതിനും പട്ടികപ്പെടുത്തുന്നതിനും വേണ്ടിയുള്ളതാണ്. ഈ ലിസ്റ്റിംഗിന്റെ പത്താം പതിപ്പാണ് ഇത്തവണത്തേത്. ഓവറോൾ, സർവകലാശാലകൾ, കോളേജുകൾ, ഗവേഷണ സ്ഥാപനങ്ങൾ, ഇന്നൊവേഷൻ, സംസ്ഥാന പൊതു സർവകലാശാലകൾ, ഓപ്പൺ സർവകലാശാലകൾ, നൈപുണ്യ സർവകലാശാലകൾ, സുസ്ഥിര വികസന ലക്ഷ്യങ്ങൾ (SDG-കൾ) എന്നിങ്ങനെ ഒമ്പത് വിഭാഗങ്ങൾ ഉൾപ്പെടുന്നു. കൂടാതെ, എഞ്ചിനീയറിംഗ്, മാനേജ്മെന്റ്, ഫാർമസി, മെഡിക്കൽ, ആർക്കിടെക്ചർ & പ്ലാനിംഗ്, നിയമം, ഡെന്റൽ, കൃഷി & അനുബന്ധ ശാസ്ത്രങ്ങൾ എന്നിങ്ങനെ എട്ട് വിഷയ-നിർദ്ദിഷ്ട മേഖലകളിലെ സ്ഥാപനങ്ങളെ ഇത് വിലയിരുത്തുന്നു.

വിദ്യാഭ്യാസ മേഖലയിലെ അദ്ധ്യാപനം, ഗവേഷണം, നവീകരണം എന്നിവയുടെ നിലവാരം ഉയർത്തിക്കാട്ടുന്ന ഈ റാങ്കിംഗുകൾ, വിദ്യാർഥികൾക്ക് മികച്ച സ്ഥാപനങ്ങളെ തിരഞ്ഞെടുക്കാനും ഗവേഷണം നടത്താനും സഹായകരമാണ്.