പട്ന: നിയമസഭാ തെരഞ്ഞെടുപ്പ് പ്രഖ്യാപിച്ചില്ലെങ്കിലും പ്രചാരണച്ചൂടിലാണ് ബിഹാറിലെ ഭരണ-പ്രതിപക്ഷ പാര്‍ട്ടികള്‍. വോട്ടുമോഷണം ആരോപിച്ച് തെരഞ്ഞെടുപ്പ് കമ്മിഷനെ പ്രതിക്കൂട്ടിലാക്കി ലോക്സഭാ പ്രതിപക്ഷ നേതാവ് രാഹുല്‍ ഗാന്ധി നയിച്ച വോട്ടര്‍ അധികാര്‍ യാത്ര സമാപിച്ചതിനു പിന്നാലെ ബദലായി നിയമസഭാ മണ്ഡലങ്ങളില്‍ പൊതുസമ്മേളനങ്ങള്‍ നടത്താന്‍ എന്‍.ഡി.എ സഖ്യം തീരുമാനിച്ചു. ഫലത്തില്‍ തെരഞ്ഞെടുപ്പ് പ്രഖ്യാപനത്തിന് മുമ്പായി ബിഹാറില്‍ പ്രചാരണം തുടങ്ങിക്കഴിഞ്ഞു. 

രാഹുലിന്റെ യാത്രയ്ക്ക് ലഭിച്ച വലിയ സ്വീകാര്യതയും ജനപങ്കാളിത്തവും എന്‍.ഡി.എ സഖ്യത്തെ അലോസരപ്പെടുത്തുന്നുണ്ട്. തങ്ങളുടെ സ്വാധീനമേഖലയില്‍ ഉള്‍പ്പെടെ രാഹുലിനെ കാണാനും യാത്രയില്‍ പങ്കുചേരാനും ഒഴുകിയെത്തിയ ജനക്കൂട്ടമാണ് ബി.ജെ.പി-ജെ.ഡി.യു നേതൃത്വത്തെ അസ്വസ്ഥമാക്കുന്നത്. വോട്ട് മോഷ്ടിക്കപ്പെട്ടുവെന്ന വികാരം ബിഹാറിലെ ഗ്രാമ-നഗര വ്യത്യാസമില്ലതെ ജനങ്ങളില്‍ പ്രകടമാണ്. അഞ്ചുവീടുകളില്‍ ഒരിടത്തെങ്കിലും വോട്ട് നഷ്ടപ്പെട്ടവരുണ്ടെന്നാണ് ഗ്രാമവാസികള്‍ പറയുന്നത്. 

ALSO READ: 'ബീഡിയും ബിഹാറും' വിവാദം; കോണ്‍ഗ്രസ് കേരള ഘടകത്തിന്റെ പരാമര്‍ശം തെറ്റ്; മാപ്പ് പറയണമെന്ന് തേജസ്വി യാദവ്

വോട്ടര്‍ പട്ടികയിലെ പേര് ഇല്ലാതായത് മാത്രമല്ല, തുടര്‍ന്ന് പൗരത്വം വരെ നഷ്ടമായേക്കുമെന്ന ആധിയും ജനങ്ങള്‍ക്കുണ്ട്. ജനങ്ങളുടെ ചോദ്യങ്ങളോട് പ്രതികരിക്കാന്‍ പോലും കഴിയാത്ത അവസ്ഥയിലാണ് എന്‍.ഡി.എ നേതാക്കളും പ്രവര്‍ത്തകരും. വോട്ട് മോഷണ ആരോപണം സജീവമായി നിലനിര്‍ത്തുകയും സര്‍ക്കാരിനെതിരായ മറ്റ് വിഷയങ്ങള്‍ ചര്‍ച്ചയാവുകയും ചെയ്താല്‍ വലിയ തോതിലുള്ള തിരിച്ചടി നേരിടേണ്ടിവരുമെന്ന ആശങ്ക ഭരണസഖ്യത്തിനുണ്ട്. 

വോട്ട് മോഷണം മാത്രമല്ല, ക്രമസമാധാന തകര്‍ച്ച, വിലക്കയറ്റം, സ്ത്രീകള്‍ക്കും കുട്ടികള്‍ക്കും എതിരായ അതിക്രമം, തീവ്രഹിന്ദുത്വ പ്രവര്‍ത്തകരുടെ ആക്രമണം, തൊഴിലില്ലായ്മ, അഴിമതി തുടങ്ങിയ വിഷയങ്ങളില്‍ നിതീഷ് കുമാര്‍ സര്‍ക്കാര്‍ കനത്ത ജനരോഷം നേരിടുകയാണ്. അടിസ്ഥാന സൗകര്യമേഖലകളിലെ ശോച്യാവസ്ഥ, അടുത്തിടെയുണ്ടായ പാലങ്ങളുടെ തകര്‍ച്ച എന്നിവയും സര്‍ക്കാരിനെതിരായ വികാരം രൂക്ഷമാക്കുന്നു. 

ALSO READ: 400 ഗ്രാം ആര്‍.ഡി.എക്‌സുമായി നഗരത്തില്‍ 34 മനുഷ്യബോംബുകള്‍; ലഷ്കര്‍ ഇ ജിഹാദി എന്ന പേരില്‍ ഭീഷണി സന്ദേശമയച്ചത് അശ്വിന്‍ കുമാര്‍, അറസ്റ്റ് ചെയ്ത് മുംബൈ പൊലിസ്
രാഹുലിന്റെ യാത്രയോടെ സര്‍ക്കാരിനെതിരായ ജനരോഷം ശക്തിപ്പെട്ടുവെന്നും പ്രതിപക്ഷത്തിനുള്ള സ്വീകാര്യത കൂടിയെന്നും ബിഹാറില്‍ നിന്നുള്ള രാഷ്ട്രീയ നിരീക്ഷകര്‍ അഭിപ്രായപ്പെടുന്നുണ്ട്. ഈ സാഹചര്യത്തില്‍ എത്രയും വേഗം മുഖം മിനുക്കല്‍ നടപടികളിലേക്ക് കടക്കാനാണ് എന്‍.ഡി.എ തീരുമാനം. നിയമസഭാ മണ്ഡലങ്ങള്‍ കേന്ദ്രീകരിച്ച് നടത്തുന്ന പൊതുസമ്മേളനങ്ങളിലൂടെ കേന്ദ്ര-സംസ്ഥാന സര്‍ക്കാരുകളുടെ വികസന പദ്ധതി പ്രഖ്യാപനങ്ങള്‍ നടത്താനും ജനവിശ്വാസം വീണ്ടെടുക്കാനുമാണ് എന്‍.ഡി.എ നീക്കം. 

വോട്ടുമോഷണം എന്ന മുദ്രാവാക്യമുയര്‍ത്തി രാഹുല്‍ ഗാന്ധി നയിച്ച വോട്ടര്‍ അധികാര്‍ യാത്ര ബിഹാറില്‍ പുതിയൊരു രാഷ്ട്രീയ മുന്നേറ്റത്തിന് കാരണമായെന്നാണ് വിലയിരുത്തല്‍. 16 ദിവസമെടുത്ത് 1300 കിലോമീറ്റര്‍ സഞ്ചരിച്ച യാത്രയിലുടനീളം ജനങ്ങളുമായി നേരിട്ട് സംവദിക്കാനാണ് രാഹുല്‍ സമയം കണ്ടെത്തിയത്. ഇതുവഴി ഒരുപരിധിവരെ തങ്ങളില്‍ നിന്ന് ചോര്‍ന്നുപോയ സ്വാധീനം തിരികെ പിടിക്കാന്‍ കഴിഞ്ഞുവെന്നാണ് കോണ്‍ഗ്രസ് കരുതുന്നത്. തുടര്‍ന്നും രാഹുലിന്റെ സന്ദര്‍ശനങ്ങളിലൂടെ അത് വര്‍ധിപ്പിക്കാനാകുമെന്നും പാര്‍ട്ടി നേതാക്കള്‍ പറയുന്നു. 

ഏറെ ദുര്‍ബലമായ സംഘടനാ സംവിധാനം പുനരുജ്ജീവിപ്പിച്ച്, യുവാക്കളെയും കഴിവുള്ളവരെയും നേതൃത്വത്തില്‍ എത്തിച്ചാല്‍ പാര്‍ട്ടി കരുത്താര്‍ജിക്കുമെന്നും നേതാക്കള്‍ ആത്മവിശ്വാസം പ്രകടിപ്പിക്കുന്നു. പ്രതിപക്ഷ സഖ്യത്തിനും രാഹുലിന്റെ യാത്ര കൂടുതല്‍ കരുത്ത് പകര്‍ന്നിട്ടുണ്ട്. യാത്രയിലുടനീളം തേജസ്വി യാദവിനെ ഒപ്പം നിര്‍ത്തുക വഴി മഹാഗഡ്ബന്ധനില്‍ കൂട്ടായ നേതൃത്വമെന്ന കാഴ്ചപ്പാട് പ്രകടിപ്പിക്കാനും രാഹുലിന് കഴിഞ്ഞു. ആര്‍.ജെ.ഡി, ഇടതുപാര്‍ട്ടികള്‍, ജെ.എം.എം, വികാസ്ശീല്‍ ഇന്‍സാന്‍ പാര്‍ട്ടി എന്നിവയുള്‍പ്പെടുന്ന ഇന്‍ഡ്യാ സഖ്യത്തിനൊപ്പം മറ്റു ചില പ്രാദേശിക പാര്‍ട്ടികള്‍ കൂടി വരാന്‍ സാധ്യതയുണ്ട്.

even before the election date is announced, bihar heats up politically as mahagathbandhan gains confidence from rahul gandhi's yatra success, while nda shows concern over rising anti-incumbency sentiment.