കോഴിക്കോട്: കോഴിക്കോട് കുന്ദമംഗലത്തും പൊലിസ് മര്‍ദ്ദനം. കുന്ദമംഗലം പന്തീര്‍പ്പാടം സ്വദേശി സലീമാണ് മര്‍ദ്ദനമേറ്റെന്ന ആരോപണവുമായി രംഗത്തെത്തിയത്. 2015ലാണ് തനിക്ക് നേരെ പൊലിസ് മര്‍ദ്ദനമുണ്ടായതെന്നും അന്ന് തന്നെ മര്‍ദ്ദിച്ചവര്‍ക്കെതിരെ നടപടി എടുക്കമമെന്ന് ആവശ്യപ്പെട്ട് നല്‍കിയ പരാതി സ്വീകരിക്കാന്‍ പോലും പൊലിസ് തയ്യാറായില്ലെന്നും ഇയാള്‍ ആരോപിക്കുന്നു.  

2015ല്‍ കുന്ദമംഗലത്തുണ്ടായ ഒരു രാഷ്ട്രീയ സംഘര്‍ഷവുമായി ബന്ധപ്പെട്ടാണ് തന്നെ കസ്റ്റഡിയിലെടുത്തത്. അന്നത്തെ കുന്ദമംഗലം സിഐയാണ് തന്നെ വണ്ടിയിലേക്ക് പിടിച്ചുകയറ്റിയത്. വണ്ടിയില്‍വെച്ച് ലാത്തി കൊണ്ട് കാലില്‍ അടിച്ചു. ബൂട്ടിട്ട് തന്നെ ചവിട്ടി.  തങ്ങളുടെ സ്റ്റേഷന്‍ പരിധിയല്ലാത്ത ചേവായൂരിലേക്കാണ്  കൊണ്ടുപോയത്. ഒരുതുള്ളി വെള്ളം പോലും നല്‍കരുതെന്നും ആരു വന്നാലും കാണിക്കരുതെന്നും അവിടെയുള്ള ഉദ്യോഗസ്ഥന് നിര്‍ദേശം നല്‍കി. ഒന്ന് മൂത്രമൊഴിക്കാന്‍ പോലും അവിടെ വെച്ച് അനുവദിച്ചില്ല. പിറ്റേദിവസമാണ് കുന്ദമംഗലം കോടതയില്‍  ഹാജരാക്കിയത്. കിട്ടുന്ന എല്ലാ വകുപ്പും ചുമത്തി 25 ദിവസത്തോളം ജയിലില്‍ കിടത്തുകയും ചെയ്തു. പൊലിസിനെതിരെ പരാതി നല്‍കിയിട്ടും അത് സ്വീകരിക്കാന്‍ പോലും തയ്യാറായില്ല'. സലീം സ്വകാര്യ ചാനലിനോട് പറഞ്ഞു.

ALSO READ: വീണ്ടും 'ഇടിമുറിക്കഥ'; ലോക്കപ്പില്‍ നേരിട്ട ക്രൂരമര്‍ദ്ദനം പങ്കുവെച്ച് എസ്.എഫ്.ഐ മുന്‍ നേതാവ്; ചെവിയുടെ ഡയഫ്രം അടിച്ച് പൊട്ടിച്ചു, കണ്ണിലും ദേഹത്തും മുളക് സ്‌പ്രേ

കുന്നംകുളം കസ്റ്റഡി മര്‍ദനത്തിനു പിന്നാലെ പൊലിസിന്റെ ക്രൂരത വെളിപെടുത്തുന്ന ഓരോരോ അനുഭവങ്ങളായി പുറത്തു വരികയാണ്. എസ്.എഫ്.ഐ മുന്‍ നേതാവും തനിക്കുണ്ടായ അനുഭവം പങ്കുവെച്ച് കഴിഞ്ഞ ദിവസം രംഗത്ത് വന്നിരുന്നു. ജയകൃഷ്ണന്‍ തണ്ണിത്തോട് ആണ് യു.ഡി.എഫ് ഭരണകാലത്ത് അന്നത്തെ കോന്നി സി.ഐ മധുബാബു തന്നെ ലോക്കപ്പ് മര്‍ദനത്തിനും മൂന്നാംമുറക്കും വിധേയമാക്കിയെന്ന വെളിപെടുത്തലുമായി രംഗത്തെത്തിയിരിക്കുന്നത്. ഫേസ്ബുക്ക് വഴിയാണ് അദ്ദേഹം തനിക്കുണ്ടായ ദുരനുഭവം പങ്കുവെച്ചത്.

ൃകാലിന്റെ വെള്ള അടിച്ച് പൊട്ടിച്ചു, ചെവിയുടെ ഡയഫ്രം അടിച്ച് പൊട്ടിച്ചു ,കണ്ണിലും ദേഹത്തും മുളക് സ്പ്രേ ചെയ്തതടക്കം പറഞ്ഞാല്‍ 10 പേജില്‍ അധികം വരും- താന്‍ അനുഭവിച്ച കൊടുംക്രൂരത അദ്ദേഹം വിവരിക്കുന്നതിങ്ങനെ. ആറുമാസം മെഡിക്കല്‍ കോളജില്‍ ചികിത്സ തേടിയെന്നും എസ്.എഫ്.ഐ പത്തനംതിട്ട മുന്‍ ജില്ലാ പ്രസിഡന്റായിരുന്നു ജയകൃഷ്ണന്‍ പോസ്റ്റില്‍ പറയുന്നു.

കഴിഞ്ഞ 14 വര്‍ഷമായി കേസ് നടത്തുകയാണ്. അന്ന് പത്തനംതിട്ട എസ്.പി ഹരിശങ്കര്‍ കേസ് അന്വേഷിച്ചു കുറ്റക്കാരനായ മധു ബാബുവിനെതിരെ കടുത്ത അച്ചടക്ക നടപടിക്ക് ശുപാര്‍ശ ചെയ്തെങ്കിലും തുടര്‍ നടപടിയുണ്ടായില്ല. പൊലീസ് ക്രിമിനല്‍സിനെതിരായ പോരാട്ടം തുടരുമെന്നും ഹൈകോടതിയെ സമീപിക്കുമെന്നും ജയകൃഷ്ണന്‍ പറഞ്ഞു.

Victims in Kunnamangalam, Kozhikode allege police brutality including lathi charge and boot-stomping. Complaint reportedly not accepted by authorities. Full details on the incident.