ഹിസോർ: സെൻട്രൽ ഏഷ്യൻ ഫുട്ബോൾ അസോസിയേഷൻ നാഷൻസ് കപ്പിൽ ഇന്ത്യ മൂന്നാം സ്ഥാനം നേടി. ശക്തരായ ഒമാനെ പെനാൽറ്റി ഷൂട്ടൗട്ടിൽ കീഴടക്കിയാണ് ഇന്ത്യ വെങ്കല മെഡൽ സ്വന്തമാക്കിയത്. നിശ്ചിത സമയത്തും അധിക സമയത്തും മത്സരം 1-1 എന്ന സ്കോറിൽ സമനിലയിൽ മത്സരം അവസാനിച്ചതോടെ  പെനാൽറ്റി ഷൂട്ടൗട്ടിലേക്ക് കളി നീങ്ങുകയായിരുന്നു. ഫിഫ റാങ്കിംഗിൽ 79-ാം സ്ഥാനത്തുള്ള ഒമാനെ 133-ാം റാങ്കുള്ള ഇന്ത്യ പരാജയപ്പെടുത്തിയ ഈ വിജയം ടീമിന്റെ റാങ്കിംഗ് മെച്ചപ്പെടുത്തുമെന്ന് മാത്രമല്ല, ഭാവി മത്സരങ്ങൾക്ക് ആത്മവിശ്വാസം പകരുമെന്നുള്ളതും ഉറപ്പാണ്.

ആദ്യ പകുതി ഗോൾരഹിതമായിരുന്നു. 55-ാം മിനിറ്റിൽ ജമീൽ അൽ യഹ്മദിയുടെ ഗോളിലൂടെ ഒമാൻ മുന്നിലെത്തി. തുടർന്ന് ഇന്ത്യ തിരിച്ചടിക്കാനുള്ള ശ്രമങ്ങൾ നടത്തിയെങ്കിലും നിരവധി സുവർണാവസരങ്ങൾ നഷ്ടപ്പെടുത്തിയത് ഇന്ത്യൻ ആരാധകർക്ക് നിരാശയേകി. എന്നാൽ, 80-ാം മിനിറ്റിൽ പകരക്കാരനായി ഇറങ്ങിയ ഉദാന്ത സിംഗ് നേടിയ ഗോളിലൂടെ ഇന്ത്യ സമനില പിടിച്ചു. അധിക സമയത്ത് ഇരു ടീമുകൾക്കും ഗോൾ നേടാനായില്ല.

പെനാൽറ്റി ഷൂട്ടൗട്ടിൽ ഒമാൻ ആദ്യ രണ്ട് കിക്കുകൾ പാഴാക്കി. ഇന്ത്യയ്ക്ക് വേണ്ടി അൻവർ അലിയും ഉദാന്തയും കിക്കുകൾ നഷ്ടപ്പെടുത്തിയെങ്കിലും, ഒമാൻ താരത്തിന്റെ അവസാന കിക്ക് തടുത്ത ഗോൾകീപ്പർ ഗുർപ്രീത് സിംഗ് സന്ധു ഇന്ത്യക്ക് വിജയം സമ്മാനിക്കുകയായിരുന്നു.

ഇന്ത്യൻ ഫുട്ബോൾ ടീമിന്റേ പുതിയ പരിശീലകനായ ഖാലിദ് ജമീലിന്റേ തന്ത്രങ്ങൾ ഇന്ത്യൻ ഫുട്ബോളിന്റേ തലവരമാറ്റും എന്ന പ്രത്യാശ ഈ വിജയം ഇന്ത്യൻ ആരാധകരിൽ ഇരട്ടിപ്പിച്ചിരിക്കുകയാണ്.ലോക വേദികളിൽ ഇന്ത്യൻ ഫുട്ബോളിൻ്റേ പുതു ചരിത്രം പിറക്കും എന്ന പ്രതീഷയിലാണ് ഓരോ ഇന്ത്യൻ ഫുട്ബോൾ ആരാധകനും.