തിരുവനന്തപുരം: വനം-വന്യജീവി നിയമഭേദഗതി ബിൽ സഭയിലവതരിപ്പിച്ചു. ചർച്ചകൾക്ക് ശേഷം ബിൽ സബ്ജക്ട് കമ്മിറ്റിയുടെ പരിഗണനയ്ക്ക് വിട്ടു. വന്യജീവി സംരക്ഷണം (കേരള ഭേദഗതി) ബില്ലും കേരള വന (ഭേദഗതി) ബില്ലും വനം മന്ത്രി എ.കെ ശശീന്ദ്രനാണ് സഭയിൽ അവതരിപ്പിച്ചത്.

1972ലെ കേന്ദ്ര വന്യജീവി സംരക്ഷണ നിയമമാണ് കേരളം ഭേദഗതി ചെയ്യുന്നത്. സബ്ജക്ട് കമ്മിറ്റിയുടെ പരിശോധനയ്ക്കും മറ്റു ഭേദഗതി നിർദേശങ്ങൾക്കും ശേഷം ബിൽ വീണ്ടും സഭയുടെ പരിഗണനയ്‌ക്കെത്തും. രണ്ട് ബില്ലുകളാണ് സഭയിൽ അവതരിപ്പിച്ച് ചർച്ചയ്ക്ക് വിധേയമായത്. ഇതിൽ ജനവാസ മേഖലയിലിറങ്ങുന്ന അക്രമകാരികളായ വന്യജീവികളെ വകവരുത്തുന്നതിനുള്ള അനുമതിയാണ് പ്രധാനമായും ലക്ഷ്യം വയ്ക്കുന്നത്. മലയോര മേഖലയിലെ കർഷകരുൾപ്പെടെയുള്ള ജനങ്ങളുടെ പൊതു ആവശ്യമായിക്കണ്ട് പ്രതിപക്ഷവും ബില്ലിനെ പിന്തുണച്ചു. എന്നാൽ, തെരഞ്ഞെടുപ്പ് കാലം വരെ ബിൽ അവതരിപ്പിക്കാൻ കാത്തിരുന്ന ഇടതു സർക്കാരിന്റെ മനസിലിരുപ്പിനെ പ്രതിപക്ഷം വിമർശിച്ചു. തെരഞ്ഞെടുപ്പ് അടുത്തിരിക്കെ നടപ്പാക്കാനാവില്ലെന്നറിഞ്ഞിട്ടും ബില്ല് കൊണ്ടുവന്നത് ദുരുദ്ദേശ്യപരമാണെന്ന് എ.പി അനിൽകുമാർ ആരോപിച്ചു. ബിൽ നിയമമാകുമെന്ന് പ്രതീക്ഷയില്ലെന്ന് മഞ്ഞളാംകുഴി അലി പറഞ്ഞു. ബില്ലുകളുടെ പ്രായോഗികതയും ആത്മാർത്ഥതയും കേരളം ചർച്ച ചെയ്യുമെന്ന് സജിവ് ജോസഫ് പറഞ്ഞു. 
ALSO READ: ദോഹയിലെ ഇസ്‌റാഈല്‍ ആക്രമണം: ഖത്തര്‍ ലോക കോടതിയില്‍ 

ശശീന്ദ്രനെ പിന്തുണച്ച മന്ത്രി രാജീവ് പ്രതിപക്ഷം പിന്തുണച്ചാൽ നിയമാകാനുള്ള സാധ്യത ചൂണ്ടിക്കാട്ടിയെങ്കിലും കേന്ദ്രനിയമത്തെ മറികടക്കാനാകില്ലെന്ന് അറിഞ്ഞുകൊണ്ടാണ് ബിൽ അവതരിപ്പിക്കുന്നതെന്ന് പ്രതിപക്ഷ നേതാവ് വി.ഡി സതീശനും പറഞ്ഞു. തുടർന്ന് സബ്ജക്ട് കമ്മിറ്റി പരിശോധിച്ച് ആവശ്യമായ മാറ്റം വരുത്തുമെന്ന് സഭയ്ക്ക് ഉറപ്പ് നൽകി മന്ത്രി രണ്ടു ബില്ലുകളും കമ്മിറ്റിക്ക് വിടുകയായിരുന്നു.

The Forest and Wildlife Amendment Bill was presented in the Assembly. After discussions, the bill was referred to the Subject Committee for review.