തിരുവനന്തപുരം: സൈബര്‍ ആക്രമണവുമായി ബന്ധപ്പെട്ട് സി.പി.എം നേതാവും എറണാകുളം ലോകസഭാ സ്ഥാനാര്‍ത്ഥിയുമായിരുന്ന കെ ജെ ഷൈനിന്റെ പരാതിയില്‍ പൊലിസ് കേസെടുത്തു. സമൂഹമാധ്യമത്തിലൂടെ സ്ത്രീത്വത്തെ അപമാനിക്കല്‍, ഐടി ആക്ട് വകുപ്പുകള്‍ പ്രകാരമാണ് ആലുവ റൂറല്‍ സൈബര്‍ പൊലിസ് കേസെടുത്തത്. എറണാകുളം റൂറല്‍ സൈബര്‍ പൊലിസാണ് കേസെടുത്തത്. 

അപകീര്‍ത്തികരമായ വാര്‍ത്ത പ്രസിദ്ധീകരിച്ച ഓണ്‍ലൈന്‍ ചാനലിനും പത്രത്തിനുമെതിരെയും കേസ് രജിസ്റ്റര്‍ ചെയ്തിട്ടുണ്ട്. അഞ്ച് കോണ്‍ഗ്രസ് അനുകൂല പോര്‍ട്ടലുകള്‍ക്കെതിരെയും കേസെടുത്തു. തനിക്കെതിരെ നടക്കുന്ന സൈബര്‍ ആക്രമങ്ങളില്‍ നടപടി ആവശ്യപ്പെട്ട് കെ.ജെ ഷൈന്‍ മുഖ്യമന്ത്രിക്കും ഡി.ജി.പിക്കും പരാതി നല്‍കിയിരുന്നു.

സിപിഎം വിരുദ്ധ യൂട്യൂബ് ചാനല്‍ തുടങ്ങിവച്ച്, യുഡിഎഫ് അനുകൂല സമൂഹമാധ്യമങ്ങള്‍ ഏറ്റുപിടിച്ച വ്യാജപ്രചാരണത്തിനെതിരെയാണ് ഷൈന്‍ ടീച്ചര്‍ നിയമനടപടി ആരംഭിച്ചത്. തനിക്കും കുടുംബത്തിനും എതിരെ നടക്കുന്ന അപവാദ പ്രചരണങ്ങളെ നിയമപരമായി നേരിടുമെന്ന് ഷൈന്‍ ടീച്ചര്‍ ഫേസ്ബുക്ക് കുറിപ്പിലൂടെ അറിയിച്ചിരുന്നു.

ജീര്‍ണ്ണത മൂലം തലയുയര്‍ത്താനാവാത്ത വലതു രാഷ്ട്രീയത്തെ രക്ഷിക്കാനായി തന്നെയും കുടുംബത്തെയും ചിലര്‍ കരുവാക്കുകയായിരുന്നു. അപവാദപ്രചരണം നേരിടുന്നവരെ മാത്രമല്ല കൂടെയുള്ള ജീവിതപങ്കാളിയെയും മക്കളെയും അത് ബാധിക്കുമെന്ന് ഇത്തരക്കാര്‍ ഓര്‍ക്കണമെന്നും ഷൈന്‍ ടീച്ചര്‍ ഫേസ്ബുക്കില്‍ കുറിച്ചു.

'എനിക്കെതിരെ ഒരു ബോംബ് വരുമെന്ന് സുഹൃത്തായ കോണ്‍ഗ്രസ് നേതാവ് പറഞ്ഞു. ധൈര്യമായിരിക്കണം, പതറരുതെന്ന് പറഞ്ഞു. ഇത്തരത്തിലുള്ള ആക്രമണം ആദ്യമായാണ്. സ്ത്രീകളെക്കുറിച്ച് പറയുമ്പോള്‍ ആത്മരതിയില്‍ ആറാടുന്ന മാനസികാവസ്ഥയുള്ളയാളുകളുണ്ട്. മുതിര്‍ന്ന കോണ്‍ഗ്രസ് നേതാക്കള്‍ അറിയാതെ ഒന്നും സംഭവിക്കില്ല. പൊതുരംഗത്ത് നില്‍ക്കുന്ന സ്ത്രീകള്‍ ഇതെല്ലാം പ്രതീക്ഷിക്കണം', - ഷൈന്‍ പ്രതികരിച്ചു.