കാഞ്ഞങ്ങാട്: നഗരത്തിലെ  നവീകരിച്ച മത്സ്യമാര്‍ക്കറ്റു തദ്ദേശസ്വയം മന്ത്രി കെ.ടി ജലീല്‍ നാളെ നാടിനു സമര്‍പ്പിക്കുമെന്നു ബന്ധപ്പെട്ടവര്‍ വാര്‍ത്താസമ്മേളനത്തില്‍ പറഞ്ഞു. 17 ലക്ഷം രൂപ ചെലവഴിച്ചാണു നഗരസഭ മാര്‍ക്കറ്റു നവീകരിച്ചത്. കാലങ്ങളായി മുന്‍ ഭരണസമിതിയും നഗരസഭ ചെയര്‍മാനും ഏറ്റവും കൂടുതല്‍ പഴി കേള്‍ക്കേണ്ടി വന്നതു നഗരമധ്യത്തിലുള്ള മാലിന്യങ്ങള്‍ കുന്നുകൂടുന്ന  മത്സ്യ മാര്‍ക്കറ്റിന്റെ പേരിലായിരുന്നു.
മലിന ജലം കെട്ടിക്കിടക്കുന്ന മാര്‍ക്കറ്റും പരിസരപ്രദേശങ്ങളും നന്നാക്കണമെന്നാവശ്യപ്പെട്ടു നഗരസഭ ഓഫിസിനു മുന്നില്‍  കച്ചവടക്കാരും മറ്റുള്ളവരും മത്സ്യവില്‍പന സമരം അടക്കം നടത്തിയിരുന്നു.
നഗരസഭയില്‍  കഴിഞ്ഞ പത്തു മാസം മുമ്പ് അധികാരമേറ്റ ഇടതു മുന്നണിയുടെ പ്രകടനപത്രികയിലെ പ്രധാന വാഗ്ദാനങ്ങളിലൊന്നായിരുന്നു നഗരസഭയുടെ കീഴിലുള്ള മത്സ്യ മാര്‍ക്കറ്റു നവീകരണം.
തറയില്‍  ഇപ്പോള്‍ ഇന്റര്‍ലോക്ക് പതിച്ചു വൃത്തിയാക്കിയ മാര്‍ക്കറ്റില്‍ ഫാനും ഇരിപ്പിടങ്ങള്‍ക്കും വില്‍പന മേശകള്‍ക്കും ഗ്രാനൈറ്റും പതിച്ചിട്ടുണ്ട്. എല്ലായിടത്തും സി.സി ടി.വിയും മത്സ്യം എന്നിവ വാങ്ങാന്‍ വരുന്ന ഉപഭോക്താവിന്റെ മനം കുളിര്‍പ്പിക്കാന്‍ ചുവരുകളില്‍ വര്‍ണചിത്രങ്ങളും ഒരുക്കിയിട്ടുണ്ട്.
മാര്‍ക്കറ്റിനു മുകള്‍ നിലയിലുണ്ടായിരുന്ന  കോഴി , മറ്റു ഇറച്ചി സ്റ്റാളുകള്‍ താഴത്തെ ഒഴിഞ്ഞ നിലകളിലേക്കു മാറ്റാനാണു തീരുമാനം.
മാര്‍ക്കറ്റിനു മുന്നിലെ മൊത്ത കച്ചവടത്തിനു രാവിലേയും വൈകുന്നേരവുമായി നിയന്ത്രണമേര്‍പ്പെടുത്തും.
വാര്‍ത്താസമ്മേളനത്തില്‍ എം.പി ജാഫര്‍, ഉണ്ണികൃഷ്ണന്‍, മഹ്മൂദ് മുറിയാനാവി, ഹസൈനാര്‍ കല്ലൂരാവി, എം.എം നാരായണന്‍ എന്നിവര്‍ സംബന്ധിച്ചു.