ന്യൂഡൽഹി: ഇന്ത്യക്കാരുൾപ്പെടെയുള്ള വിദേശ പ്രൊഫഷണലുകളെ യു.എസിൽ ജോലി ചെയ്യാൻ അനുവദിക്കുന്നവർക്കുള്ള പെർമിറ്റായ എച്ച്1ബി വിസയുടെ ഫീസ് കുത്തനെ കൂട്ടിയതോടെ ജോലി നിഷ്ടമാകുന്നതടക്കമുള്ള കനത്ത പ്രതിസന്ധിയിൽ ഇന്ത്യൻ ടെക്കികൾ. കുടിയേറ്റത്തിനെതിരായ അമേരിക്കൻ പ്രസിഡന്റ് ഡൊണാഡ് ട്രംപിന്റെ നടപടികളുടെ ഭാഗമായി എച്ച്1ബി വിസയ്ക്ക് ഒരുലക്ഷം യു.എസ് ഡോളർ (86 ലക്ഷം രൂപ) ചുമത്തിയതോടെയാണിത്. പുതിയ നീക്കത്തോടെ പെട്ടെന്ന് തിരിച്ചെത്താൻ ആമസോൺ, മൈക്രോസോഫ്റ്റ് തുടങ്ങിയ വൻകിട ടെക് കമ്പനികൾ ജീവനക്കാരോട് ആവശ്യപ്പെട്ടത് പരിഭ്രാന്തി കൂട്ടി. ഇതോടെ മുൻകൂട്ടി നിശ്ചയിച്ച യാത്രയും പരിപാടികളുമെല്ലാം റദ്ദാക്കി ജീവനക്കാർ തിരിച്ചുപറക്കാൻ നിർബന്ധിതരായി.

നിർദേശം ലഭിക്കുമ്പോൾ സ്വന്തം വിവാഹചടങ്ങിനായി പോകുന്നവരും മറ്റ് അടിയന്തര പരിപാടികൾ ഷെഡ്യൂൾ ചെയ്തവരും ഉൾപ്പെടെ വിമാനത്താവളങ്ങളിൽ ബോർഡിങ് ഗെയിറ്റിൽ വരിനിൽക്കുന്നുണ്ടായിരുന്നു. നിർദേശം ഇവരിലെല്ലാം പരിഭ്രാന്തിയുണ്ടാക്കി. വിമാനത്താവളങ്ങളിൽ വച്ച് കോൾ വന്നതോടെ ചിലർ യാത്ര റദ്ദാക്കി. ബോർഡിങ് പാസ് ലഭിച്ച് വിമാനത്തിൽ കയറിയ ശേഷം സന്ദേശം ലഭിച്ചോടെ തിരികെ വിമാനത്തിൽനിന്നിറങ്ങി യാത്ര റദ്ദാക്കിയവരും ഉണ്ട്. ഇത്തരത്തിൽ വിമാനത്തിൽനിന്ന് ആളുകൾ ഇറങ്ങുന്നതിന്റെ വിഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്.

പുതിയ നിയമം പ്രാബല്യത്തിൽ വന്നാൽ തിരികെ ജോലിയിൽ പ്രവേശിക്കാൻ കഴിയില്ലെന്ന് ഭയന്ന് സാൻ ഫ്രാൻസിസ്‌കോ വിമാനത്താവളത്തിലെ നിരവധി ഇന്ത്യക്കാർ അവധിക്കാലം വെട്ടിക്കുറച്ചതായി യു.എസ് മാധ്യമങ്ങൾ റിപ്പോർട്ട്‌ചെയ്തു. 

ഇന്ത്യക്കാർ കൂടുതലായി യു.എസിലേക്ക് പോകാൻ ശ്രമിച്ചത് ഇന്ത്യയിൽനിന്ന് യു.എസിലേക്കുള്ള വിമാനയാത്രയിൽ വൻ തിരക്കിനും കാരണമായി. പിഴ ഒഴിവാക്കാൻ പലരും ബുക്കിങ്ങുകൾ വേഗത്തിലാക്കിയത് നിരക്ക് കുത്തനെ കൂടാനിടയാക്കി. 40,000 രൂപയിൽ നിന്ന് ഒറ്റയടിക്ക് 80,000 രൂപയും അതിന് മുകളിലേക്കും വിമാന നിരക്ക് ഉയർന്നു. 

ട്രംപിന്റെ ഉത്തരവ് പുതിയ അപേക്ഷകർക്ക് മാത്രമേ ബാധകമാകൂവെന്നും നിലവിലുള്ള വിസ കൈവശമുള്ളവർക്കോ പുതുക്കൽ തേടുന്നവർക്കോ അല്ലെന്നുമുള്ള വൈറ്റ് ഹൗസിന്റെ വിശദീകരണം വന്നതോടെയാണ് പലർക്കും ആശ്വസമായത്. അതേസമയം, ആശയക്കുഴപ്പത്തെ തുടർന്ന് ജോലി രാജിവച്ചവരും ഉണ്ട്. 

എച്ച്1 ബി വിസയുടെ പ്രധാന ഗുണഭോക്താക്കൾ ഇന്ത്യക്കാരായതിനാലാണ്, പുതിയ നീക്കംമൂലം ഏറ്റവും തിരിച്ചടി നേരിട്ട വിഭാഗമായി ഇന്ത്യക്കാർ മാറിയത്. വിദേശരാജ്യങ്ങളിൽ നഴ്‌സിങ് ജോലിയിൽ മലയാളികൾക്ക് മേൽക്കൈ ഉള്ളതുപോലെ യു.എസിലെ ഐ.ടി, ടെക്ക് മേഖലകളിലെ പ്രധാനസമൂഹമാണ് ഇന്ത്യക്കാർ.