ഏഷ്യ കപ്പ് സൂപ്പർ ഫോറിലെ ത്രില്ലർ പോരാട്ടത്തിൽ പാകിസ്താനെതിരെ ഇന്ത്യ ആറ് വിക്കറ്റിന്റെ തകർപ്പൻ വിജയമാണ് സ്വന്തമാക്കിയത്. മത്സരത്തിൽ പാകിസ്താൻ ഉയർത്തിയ 171 റൺസിന്റെ വിജയലക്ഷ്യം 18.5 ഓവറിൽ നാല് വിക്കറ്റ് നഷ്ടത്തിൽ സൂര്യകുമാർ യാദവും സംഘവും മറികടക്കുകയായിരുന്നു. 

പാകിസ്താനെതിരെയുള്ള വിജയത്തിന് ശേഷമുള്ള ഇന്ത്യൻ നായകൻ സൂര്യകുമാർ യാദവിന്റെ വാക്കുകളാണ് ഇപ്പോൾ ക്രിക്കറ്റ് ലോകത്ത് ശ്രദ്ധ നേടുന്നത്. ഇന്ത്യ-പാകിസ്താൻ മത്സരത്തെക്കുറിച്ച് പറയുമ്പോൾ ഇനി 'വൈരാഗ്യം' നിറഞ്ഞ മത്സരമെന്ന് വിളിക്കരുതെന്നാണ് സൂര്യകുമാർ യാദവ് പറഞ്ഞത്. പാകിസ്താനെക്കാൾ മികച്ച ക്രിക്കറ്റ് കളിച്ചത് ഇന്ത്യയാണെന്നും സ്‌കൈ അഭിപ്രായപ്പെട്ടു. 

''ഇന്ത്യ-പാകിസ്താൻ മത്സരത്തെക്കുറിച്ച് നിങ്ങൾ ചോദ്യങ്ങൾ ചോദിക്കുന്നത് നിർത്തണം. എന്റെ അഭിപ്രായത്തിൽ രണ്ട് ടീമുകളും 15-20 മത്സരങ്ങൾ കളിക്കുകയും ഇതിന്റെ സ്കോർ ലൈൻ 7-7 അല്ലെങ്കിൽ 8-8 എന്നൊക്കെയാണെങ്കിൽ അതിനെ വൈരാഗ്യം എന്ന് വിളിക്കാം. എന്നാൽ 10-0, 10-1 എന്നിങ്ങനെയുള്ള സ്റ്റാറ്റുകളെ എന്താണ് വിളിക്കേണ്ടതെന്ന് അറിയില്ല. ഇപ്പോൾ ഇത് വൈരാഗ്യമല്ല. ഞങ്ങൾ അവരെക്കാൾ മികച്ച ക്രിക്കറ്റ് കളിച്ചുവെന്ന് ഞാൻ കരുതുന്നു'' സൂര്യകുമാർ യാദവ് മത്സരശേഷം പറഞ്ഞു.

അർദ്ധ സെഞ്ചറി നേടിയ ഓപ്പണർ അഭിഷേക് ശർമ്മയുടെ കരുത്തിലാണ് ഇന്ത്യ വിജയിച്ചു കയറിയത്. 39 പന്തിൽ നിന്നും 74 റൺസാണ് താരം അടിച്ചെടുത്തത്. ആറ് ഫോറുകളും അഞ്ചു കൂറ്റൻ സിക്‌സുകളും അടങ്ങുന്നതായിരുന്നു താരത്തിന്റെ പ്രകടനം. മത്സരത്തിലെ പ്ലയെർ ഓഫ് ദി മാച്ച് അവാർഡും അഭിഷേകാണ് സ്വന്തമാക്കിയത്.  അഭിഷേകിന് പുറമെ 28 പന്തിൽ 47 റൺസ് നേടിയ ശുഭ്മൻ ഗില്ലും ഇന്ത്യയുടെ വിജയത്തിൽ നിർണായക പങ്കുവഹിച്ചു. 

അതേസമയം ഗ്രൂപ്പ് ഘട്ടത്തിലും പാകിസ്താനെതിരെ ഇന്ത്യ വിജയം സ്വന്തമാക്കിയിരുന്നു. പാകിസ്താനെതിരെ ഏഴ് വിക്കറ്റുകൾക്കായിരുന്നു ഇന്ത്യയുടെ വിജയം. മത്സരത്തിൽ ആദ്യം ബാറ്റ് ചെയ്ത പാകിസ്താൻ നിശ്ചിത ഓവറിൽ ഒമ്പത് വിക്കറ്റ് നഷ്ടത്തിൽ 127 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ 15.5 ഓവറിൽ മൂന്ന് വിക്കറ്റ് നഷ്ടത്തിൽ ലക്ഷ്യം അനായാസമായി മറികടക്കുകയായിരുന്നു.

Indian captain Suryakumar Yadav's words after the victory over Pakistan in the Asia Cup Super Four are currently garnering attention in the cricket world.