കൊല്ലം: പുനലൂരില്‍ ഭാര്യയെ ഭര്‍ത്താവ് വെട്ടിക്കൊലപ്പെടുത്തി. കലയനാട് ചരുവിള വീട്ടില്‍ ശാലിനിയാണ് കൊല്ലപ്പെട്ടത്. തിങ്കളാഴ്ച്ച രാവിലെ ആറരയോടെയാണ് സംഭവം. കൊലപാതകത്തിന് ശേഷം വിവരം പ്രതി ഐസക് ഫേസ്ബുക്ക് ലൈവില്‍ പങ്കുവെച്ചു. 

ശാലിനിയുടെ നിലവിളി കേട്ട് അയല്‍വാസികള്‍ ഓടിയെത്തുകയായിരുന്നു. ആഡംബര ജീവിതം നയിക്കുന്നുവെന്നും താനറിയാത്ത ബന്ധങ്ങള്‍ ശാലിനിക്കുണ്ടെന്നും ഇയാള്‍ ആരോപിക്കുന്നു. ഫേസ്ബുക്ക് ലൈവിന് ശേഷം രാവിലെ ഒന്‍പത് മണിയോടെ ഐസക് കൊല്ലൂര്‍ പൊലിസില്‍ കീഴടങ്ങി. 

കുടുംബ പ്രശ്നങ്ങള്‍ കാരണം ശാലിനി കുറേക്കാലമായി സ്വന്തം വീട്ടിലാണ് കഴിഞ്ഞിരുന്നത്. അവിടെ നിന്ന് ശാലിനി ജോലിക്ക് പോയിരുന്നു. ഇവര്‍ക്ക് രണ്ട് ആണ്‍മക്കളാണുള്ളത്. ഇതില്‍ ഒരു കുട്ടി അര്‍ബുദ രോഗിയാണ്. ഈ കുട്ടിയുടെ കാര്യങ്ങളൊന്നും ശാലിനി നോക്കുന്നില്ലെന്നും ഐസക് ആരോപിക്കുന്നുണ്ട്. ശാലിനിയുടെ മൃതദേഹം കൊല്ലൂര്‍ താലൂക്ക് ആശുപത്രി മോര്‍ച്ചറിയിലേക്ക് മാറ്റി.