ദുബൈ: യു.എ.ഇക്ക് പുറത്തുള്ള മയക്കുമരുന്ന് കടത്തുകാരന്റെ നിര്‍ദേശ പ്രകാരം എമിറേറ്റില്‍ മയക്കു മരുന്ന് പ്രോത്സാഹിപ്പിച്ചതായി ആരോപിക്കപ്പെടുന്ന ഏഴംഗ ഏഷ്യന്‍ സംഘത്തെ ദുബൈ പൊലിസ് അറസ്റ്റ് ചെയ്തു. തങ്ങളുടെ പ്രവര്‍ത്തനങ്ങള്‍ മറച്ചു വയ്ക്കാനും കണ്ടെത്തല്‍ ഒഴിവാക്കാനും പ്രതികള്‍ നഗരത്തിലുടനീളം ഒന്നിലധികം ഡ്രോപ്ഓഫ് സൈറ്റുകള്‍ ഉപയോഗിച്ചു.

പ്രതികളുടെ നീക്കങ്ങളും ആശയ വിനിമയങ്ങളും നിരീക്ഷിച്ച വിപുലമായ ഫീല്‍ഡ് നിരീക്ഷണത്തിനും ഏകോപിത തിരച്ചിലുകള്‍ക്കും ശേഷമാണ് അറസ്റ്റ് നടന്നതെന്ന് ജനറല്‍ ഡിപാര്‍ട്‌മെന്റ് ഓഫ് ആന്റിനാര്‍കോട്ടിക്‌സ് ഡയരക്ടര്‍ ബ്രിഗേഡിയര്‍ ഖാലിദ് ബിന്‍ മുയിസ പറഞ്ഞു.

വീട്ടില്‍ ക്രിസ്റ്റല്‍ മെത്ത് കൈവശം വച്ചതിന്റെ പേരില്‍ ഒന്നാം പ്രതിയെ പിടികൂടി. രണ്ട് വ്യത്യസ്ത സ്ഥലങ്ങളില്‍ ഒരു കിലോ മയക്കുമരുന്ന് വിതരണം ചെയ്യാന്‍ വിദേശത്ത് നിന്ന് ഇയാള്‍ക്ക് നിര്‍ദേശം ലഭിച്ചതായും അന്വേഷണത്തില്‍ കണ്ടെത്തി.

തുടര്‍ന്ന്, ശ്രദ്ധാപൂര്‍വം ആസൂത്രണം ചെയ്ത ദുബൈ പൊലിസ് ഓപറേഷനില്‍, രണ്ട് സ്ഥലങ്ങളിലായി മയക്കുമരുന്ന് ഒളിപ്പിച്ചവരും അവ ശേഖരിക്കാന്‍ വന്നവരും ഉള്‍പ്പെടെ, സംഘത്തിലെ മറ്റ് ആറ് പേരെ അറസ്റ്റ് ചെയ്തു.

ഉദ്യോഗസ്ഥര്‍ മൊത്തം 26 കിലോ മയക്കുമരുന്നും 27,913 ട്രമഡോള്‍ ഗുളികകളും ഇവരില്‍ നിന്നും പിടിച്ചെടുത്തു. ക്രിസ്റ്റല്‍ മെത്ത്, ഹഷീഷ്, ഹെറോയിന്‍, മരിജ്വാന എന്നിവ പിടിച്ചെടുത്തതില്‍ ഉള്‍പ്പെടുന്നു. യു.എ.ഇയില്‍ മയക്കുമരുന്ന് കടത്തുന്നതിനും പ്രോത്സാഹിപ്പിക്കുന്നതിനുമായി അന്താരാഷ്ട്ര ശൃംഖലയുമായി സംഘം പ്രവര്‍ത്തിക്കുന്നുണ്ടെന്ന് ബ്രിഗേഡിയര്‍ ബിന്‍ മുയിസ പറഞ്ഞു.

ഉയര്‍ന്ന പരിശീലനം സിദ്ധിച്ച ഉദ്യോഗസ്ഥരുമായി നിര്‍മിത ബുദ്ധി ഉപകരണങ്ങള്‍ സംയോജിപ്പിക്കുന്ന ദുബൈ പൊലിസിന്റെ കുറ്റകൃത്യങ്ങള്‍ക്കെതിരായ നൂതന പോരാട്ട സംവിധാനത്തെ ഈ പ്രവര്‍ത്തനം പ്രതിഫലിപ്പിക്കുന്നുവെന്ന് അദ്ദേഹം ഊന്നിപ്പറഞ്ഞു.

''പൊതു സുരക്ഷയെ അപകടപ്പെടുത്താന്‍ ശ്രമിക്കുന്ന ആരെയും ദുബൈ പൊലിസ് ഉരുക്കു മുഷ്ടി ഉപയോഗിച്ച് നേരിടും. വിദേശത്ത് നിന്ന് പ്രവര്‍ത്തിക്കുന്നവരായാലും കടത്തുകാരുടെ ശൃംഖലകള്‍ ഞങ്ങള്‍ തകര്‍ക്കുക തന്നെ ചെയ്യും'' ബ്രിഗേഡിയര്‍ ബിന്‍ മുയിസ പറഞ്ഞു.

'കൂടുതല്‍ അന്വേഷണങ്ങളില്‍, മയക്കുമരുന്ന് കൈമാറ്റം ചെയ്യുന്നതിനോ ഉപയോക്താക്കള്‍ക്ക് എത്തിക്കുന്നതിനോ വേണ്ടി സംഘം വിവിധ സ്ഥലങ്ങളില്‍ മയക്കുമരുന്ന് വിതരണം ചെയ്യുന്നതിനെ ആശ്രയിച്ചിരുന്നുവെന്ന് കണ്ടെത്തി. യു.എ.ഇക്ക് പുറത്തുള്ള അന്താരാഷ്ട്ര സിന്‍ഡിക്കേറ്റുമായി ചേര്‍ന്ന് അവര്‍ വ്യാപാരം നടത്തുകയും പ്രോത്സാഹിപ്പിക്കുകയും സമൂഹത്തെ ദോഷകരമായി ബാധിക്കുകയും ചെയ്തു'' അദ്ദേഹം കൂട്ടിച്ചേര്‍ത്തു.

കഴിഞ്ഞ മാസം, 'ടോക്‌സിക് ബട്ടണുകള്‍' പേരിലുള്ള പ്രധാന ഓപറേഷനില്‍ ഒളിപ്പിച്ച വസ്ത്ര ബട്ടണുകളില്‍ കാപ്റ്റഗണ്‍ ഗുളികകള്‍ കടത്താനുള്ള ശ്രമം ദുബൈ പൊലിസ് പരാജയപ്പെടുത്തിയിരുന്നു.

18.93 കിലോ ഭാരവും 4.4 മില്യണ്‍ ദിര്‍ഹം വിലമതിക്കുന്നതുമായ മയക്കുമരുന്നുകള്‍ വിദേശത്തേക്ക് കടത്തുന്നതിന് മുമ്പ് പിടിച്ചെടുത്തു.

സംശയാസ്പദമായ പെരുമാറ്റമോ പ്രവര്‍ത്തനങ്ങളോ ശ്രദ്ധയില്‍ വരുന്ന പക്ഷം പൊതുജനങ്ങള്‍ സന്ദേശങ്ങളായോ, അല്ലെങ്കില്‍ 901ലേയ്ക്ക് ഡയല്‍ ചെയ്തു കൊണ്ടോ, ദുബൈ പൊലിസ് സ്മാര്‍ട്ട് ആപ്പിലെ പോലിസ് ഐ ഫീച്ചര്‍ ഉപയോഗിച്ചോ റിപ്പോര്‍ട്ട് ചെയ്യാന്‍ ദുബൈ പൊലിസ് പൊതുജനങ്ങളോട് ആവശ്യപ്പെട്ടു.

Major anti-drugs operation was successfully carried out by Dubai Police, leading to the arrest of seven suspects who were working under the directions of an overseas trafficker.