ഏഷ്യ കപ്പിൽ സൂപ്പർ ഫോറിൽ പാകിസ്താനെതിരെയുള്ള മത്സരത്തിൽ മിന്നും പ്രകടനമാണ് ഇന്ത്യക്കായി ഓപ്പണർ അഭിഷേക് ശർമ്മ നടത്തിയത്. അർദ്ധ സെഞ്ചറി നേടിയാണ് അഭിഷേക് ശർമ്മയു തിളങ്ങിയത്. മത്സരത്തിൽ 39 പന്തിൽ നിന്നും 74 റൺസാണ് സൺറൈസേഴ്‌സ് ഹൈദരാബാദ് താരം അടിച്ചെടുത്തത്. ആറ് ഫോറുകളും അഞ്ചു കൂറ്റൻ സിക്‌സുകളും അടങ്ങുന്നതായിരുന്നു താരത്തിന്റെ പ്രകടനം. ഈ തകർപ്പൻ പ്രകടനനങ്ങൾക്ക് പിന്നാലെ മത്സരത്തിലെ പ്ലയെർ ഓഫ് ദി മാച്ച് അവാർഡും അഭിഷേകാണ് സ്വന്തമാക്കിയത്. 

യുഎഇക്കെതിരെയുള്ള മത്സരത്തിലേതുപോലെ ഇന്നിങ്സിലെ ആദ്യ പന്ത് തന്നെ സിക്സർ പറത്തിയാണ് അഭിഷേക് ശർമ്മ വെടിക്കെട്ടിന് തുടക്കം കുറിച്ചത്. ആദ്യ പന്ത് സിക്സർ നേടിയതോടെ ഒരു ടി-20 ഇന്നിങ്സിലെ ആദ്യ പന്തിൽ സിക്സർ നേടുന്ന താരങ്ങളുടെ പട്ടികയിൽ ആധിപത്യം ഉറപ്പിക്കാനും അഭിഷേകിന് സാധിച്ചു. രണ്ട് തവണ ഒരു ടി-20 മത്സരത്തിലെ ആദ്യ പന്തിൽ തന്നെ സിക്സർ നേടുന്ന ആദ്യ താരം കൂടിയാണ് അഭിഷേക്. യശ്വസി ജെയ്‌സ്വാൾ, രോഹിത് ശർമ്മ, സഞ്ജു സാംസൺ എന്നീ താരങ്ങളാണ് ഇതിനു മുമ്പ് ഒരു ടി-20 ഇന്നിങ്സിലെ ആദ്യ പന്തിൽ സിക്സർ നേടിയിട്ടുള്ളത്. 

ഏഷ്യ കപ്പ് സൂപ്പർ ഫോറിലെ ത്രില്ലർ പോരാട്ടത്തിൽ പാകിസ്താനെതിരെ ഇന്ത്യ ആറ് വിക്കറ്റിന്റെ തകർപ്പൻ വിജയമാണ് സ്വന്തമാക്കിയത്. മത്സരത്തിൽ പാകിസ്താൻ ഉയർത്തിയ 171 റൺസിന്റെ വിജയലക്ഷ്യം ഇന്ത്യ 18.5 ഓവറിൽ നാല് വിക്കറ്റ് നഷ്ടത്തിൽ മറികടന്നു. ടൂർണമെന്റിലെ പാകിസ്താനെതിരെയുള്ള ഇന്ത്യയുടെ രണ്ടാം ജയമായിരുന്നു ഇത്.

Opener Abhishek Sharma had a brilliant performance for India in the Super Four match against Pakistan in the Asia Cup. Abhishek Sharma also shone by scoring a half-century.