തിരുവനന്തപുരം: തമ്പാനൂരിലെ ലോഡ്ജില്‍ യുവതിയെ ഷാള്‍ കഴുത്തില്‍ കുരുക്കി കൊലപ്പെടുത്തിയ കേസില്‍ പ്രതിക്ക് ജീവപര്യന്തം കഠിനതടവുശിക്ഷയും ഒരു ലക്ഷം രൂപ പിഴയും. കാട്ടാക്കട സ്വദേശിനി ഗായത്രി(25)യെ കൊല്ലപ്പെടുത്തിയ സംഭവത്തില്‍ കൊല്ലം സ്വദേശി പ്രവീണിനാണ് തിരുവനന്തപുരം അഞ്ചാം അഡീഷനല്‍ സെഷന്‍സ് കോടതി ജഡ്ജി സിജു ഷെയ്ക്ക് ശിക്ഷ വിധിച്ചത്. 

2022 മാര്‍ച്ച് അഞ്ചിനായിരുന്നു കേസിനാസ്പദമായ സംഭവം. വിവാഹിതനും രണ്ട് കുട്ടികളുടെ പിതാവുമായ പ്രവീണും ഗായത്രിയും തിരുവനന്തപുരത്തെ ഒരു സ്വര്‍ണക്കടയിലായിരുന്നു ജോലി ചെയ്തിരുന്നത്. ഇരുവരും അടുപ്പത്തിലായതോടെ പ്രവീണിന്റെ ഭാര്യ ഇക്കാര്യം അറിഞ്ഞ് സ്വര്‍ണക്കടയില്‍ വന്ന് പ്രശ്‌നമുണ്ടാക്കിയിരുന്നു. ഗായത്രിക്ക് മുന്‍ വിവാഹബന്ധം വേര്‍പെടുത്താമെന്ന് പ്രവീണ്‍ വാക്കുനല്‍കുകയും  2021ല്‍ വെട്ടുകാട് പള്ളിയില്‍ വെച്ച് പ്രവീണ്‍ ഗായത്രിയെ വിവാഹം കഴിക്കുകയും ചെയ്തു. എന്നാല്‍ പിന്നീട് ഗായത്രിയെ ഒഴിവാക്കാന്‍ തീരുമാനമെടുത്തു. 2022 മാര്‍ച്ച് 5 ന് തമ്പാനൂര്‍ അരിസ്റ്റോ ജങ്ഷന് സമീപമുള്ള ഹോട്ടലില്‍ പ്രവീണ്‍ മുറിയെടുത്ത് ഗായത്രിയെ അങ്ങോട്ട് കൊണ്ടുവന്നു. വൈകീട്ട് മുറിക്കുള്ളില്‍ വച്ച് ഗായത്രിയെ ധരിച്ചിരുന്ന ചുരിദാറിന്റെ ഷാള്‍ ഉപയോഗിച്ച് കഴുത്തുമുറുക്കി ശ്വാസം മുട്ടിച്ചു കൊലപ്പെടുത്തുകയായിരുന്നു. 

മരണം ആത്മഹത്യയാക്കി മാറ്റാനുള്ള ശ്രമങ്ങളും പ്രതി നടത്തി. എന്നാല്‍ ഗായത്രിയുടെ കഴുത്തിലുണ്ടായിരുന്ന മുറിവുകള്‍ ആത്മഹത്യാശ്രമത്തിന്റെ ഭാഗമായി ഉണ്ടായതല്ലെന്ന പോസ്റ്റ്‌മോര്‍ട്ടം റിപ്പോര്‍ട്ട് പ്രവീണിന് തിരിച്ചടിയായി. ഇതോടെ ഇയാള്‍ പൊലിസില്‍ കീഴടങ്ങുകയായിരുന്നു.