ന്യൂഡൽഹി: ദ്വിദിന സന്ദർശനത്തിനായി ബ്രിട്ടിഷ് പ്രധാനമന്ത്രി കെയ്ർ സ്റ്റാർമർ ഇന്ത്യയിലെത്തി. ഇന്നലെ പുലർച്ചെ മുംബൈ വിമാനത്താവളത്തിലെത്തിയ സ്റ്റാർമറെ മഹാരാഷ്ട്ര ഗവർണർ ആചാര്യ, മുഖ്യമന്ത്രി ദേവേന്ദ്ര ഫഡ്‌നാവിസ്, ഉപമുഖ്യമന്ത്രിമാരായ ഏക്‌നാഥ് ഷിൻഡെ, അജിത് പവാർ എന്നിവർ ചേർന്ന് സ്വീകരിച്ചു. 

2024ൽ പ്രധാനമന്ത്രി പദത്തിലെത്തിയശേഷമുള്ള സ്റ്റാർമറിന്റെ ആദ്യ ഇന്ത്യാ സന്ദർശനമാണിത്. ഇന്ത്യക്കെതിരായ ട്രംപിന്റെ പ്രതികാര തീരുവയുടെ പശ്ചാത്തലത്തിൽ ബ്രിട്ടിഷ് പ്രധാനമന്ത്രിയുടെ സന്ദർശനത്തിന് വൻ പ്രാധാന്യമുണ്ട്. ഇന്ന് ഡൽഹിയിൽവച്ച് പ്രധാനമന്ത്രി നരേന്ദ്രമോദിയുമായി അദ്ദേഹം കൂടിക്കാഴ്ച നടത്തും. 

ജൂലൈയിൽ ഒപ്പുവച്ച ഇന്ത്യ- ബ്രിട്ടൻ വ്യാപാര കരാറിന്റെ തുടർചർച്ചകൾ സന്ദർശനത്തിന്റെ പ്രധാന ലക്ഷ്യങ്ങളിലൊന്നാണ്. വ്യാപാരം, നിക്ഷേപം, സാങ്കേതികവിദ്യ, പ്രതിരോധം, സുരക്ഷ, കാലാവസ്ഥാ വ്യതിയാനം, ഊർജം, ആരോഗ്യം ഉൾപ്പെടെ വ്യത്യസ്ത വിഷയങ്ങളിൽ നിലവിൽ ലോകത്തെ അഞ്ചാമത്തെയും ആറാമത്തെയും വലിയ സമ്പദ് ശക്തികളുടെ നേതാക്കൾ ചർച്ച നടത്തും. ഗസ്സ, റഷ്യ- ഉക്രെയ്ൻ യുദ്ധം ഉൾപ്പെടെയുള്ള രാജ്യാന്തര വിഷയങ്ങളും ചർച്ചയാകും. ഇതോടൊപ്പം പ്രമുഖ വ്യവസായികളെയും സ്റ്റാർമർ കാണുന്നുണ്ട്. മുബൈയിൽ നടക്കുന്ന ആറാമത് ഗ്ലോബൽ ഫിൻടെക് ഫെസ്റ്റിൽ മുഖ്യ പ്രഭാഷകനായി സ്റ്റാർമാർ പങ്കെടുത്തു. 

ലോകത്തെ ഏറ്റവും വലിയ മൂന്നാമത്തെ സമ്പദ്‌വ്യവസ്ഥയാകാൻ പോകുന്ന ഇന്ത്യയുമായുള്ള വ്യാപാരം എളുപ്പമാകുമെന്ന് സ്റ്റാർമർ പറഞ്ഞു. ഞങ്ങൾ സമഗ്ര സാമ്പത്തിക വ്യാപാര കരാറിൽ ഒപ്പുവച്ചു. എന്നാൽ അതോടെ എല്ലാം അവസാനിക്കുന്നില്ല. വ്യാപാര കരാർ വെറും പേപ്പർ കഷ്ണങ്ങളല്ല, വളർച്ചയ്ക്കുള്ള തുടക്കം കൂടിയാണ്. കരാർ നിലവിൽവന്നതോടെ ഇനി വരാനിരിക്കുന്ന അവസരങ്ങൾ സമാനതകളില്ലാത്തതാണെന്നും സന്ദർശനത്തോടനുബന്ധിച്ച് സ്റ്റാർമർ ട്വീറ്റ്‌ചെയ്തു.