വെസ്റ്റ് ഇൻഡീസിനെതിരായ ടെസ്റ്റ് പരമ്പരയിലെ അവസാന ടെസ്റ്റ് മത്സരവും വിജയിച്ചുകൊണ്ട് ഗില്ലും സംഘവും പരമ്പര സ്വന്തമാക്കിയിരുന്നു. വിൻഡീസ് ഉയർത്തിയ 121 റൺസ് വിജയലക്ഷ്യം ഇന്ത്യ മൂന്ന് വിക്കറ്റ് നഷ്ടത്തിൽ അനായാസം മറികടന്നു. മത്സര ശേഷം മിന്നും പ്രകടനം പുറത്തെടുത്ത ഇന്ത്യൻ സ്പിന്നർ കുൽദീപ് യാദവിനെ ക്യാപ്റ്റൻ ഗിൽ പ്രശംസിച്ചിരുന്നു. കുൽദീപ് യാദവിനെ 'സ്ട്രൈക്ക് ബൗളർ എന്നാണ് ഗിൽ പ്രശംസിച്ചത്. 

കുൽദീപിന്റെ പ്രകടനത്തിൽ ഞാൻ വളരെ സന്തുഷ്ടനാണ്. അദ്ദേഹം എപ്പോഴും ഞങ്ങൾക്ക് സ്ട്രൈക്ക് ബൗളറാണ്. ഏത് സാഹചര്യത്തിൽ ആയാലും ഒരു റിസ്റ്റ് സ്പിന്നർ  പ്രത്യേകിച്ച് കുൽദീപ് യാദവിനെ പോലുള്ള ഒരു താരത്തെ കളിപ്പിക്കാൻ ഇപ്പോഴും ആഗ്രഹിക്കും. ടീമിനെ ഇപ്പോഴും കളിയിൽ നിലനിർത്തുന്ന താരമാണ് അദ്ദേഹം'' ഗിൽ പറഞ്ഞു. 

വെസ്റ്റ് ഇൻഡീസിനെതിരായ പരമ്പരയിൽ 12 വിക്കറ്റുകളാണ്‌ കുൽദീപ് നേടിയത്. രണ്ടാം ടെസ്റ്റിൽ രണ്ട് ഇന്നിങ്‌സുകളിലുമായി ഒരു ഫൈഫർ അടക്കം എട്ട് വിക്കറ്റുകളും താരം സ്വന്തമാക്കി. ഈ തകർപ്പൻ പ്രകടനങ്ങൾക്ക് പിന്നാലെ പരമ്പരയിലെ പ്ലെയർ ഓഫ് ദി മാച്ച് അവാർഡും കുൽദീപാണ് സ്വന്തമാക്കിയത്. 

അടുത്തിടെ അവസാനിച്ച ഏഷ്യ കപ്പിലും താരം തകർപ്പൻ പ്രകടനമാണ് പുറത്തെടുത്തത്. ഏഷ്യ കപ്പ് ഫൈനൽ പോരാട്ടത്തിൽ ഇന്ത്യൻ ബൗളിങ്ങിൽ കുൽദീപ് യാദവാണ് മിന്നും പ്രകടനം പുറത്തെടുത്തത്. മത്സരത്തിൽ മികച്ച തുടക്കം ലഭിച്ച പാകിസ്താൻ ബാറ്റിംഗ് നിരയെ കുൽദീപ് യാദവ് കറക്കി വീഴ്ത്തുകയായിരുന്നു. മത്സരത്തിൽ നാല് വിക്കറ്റുകൾ വീഴ്ത്തിയാണ് താരം തിളങ്ങിയത്. ടൂർണമെന്റിൽ ഇന്ത്യക്കായി 17 വിക്കറ്റുകളാണ്‌ ഏഴ് മത്സരങ്ങളിൽ നിന്നും കുൽദീപ് നേടിയത്.

ഇതോടെ ഏഷ്യ കപ്പിന്റെ ഒരു എഡിഷനിൽ ഏറ്റവും കൂടുതൽ വിക്കറ്റുകൾ നേടുന്ന താരമായി മാറാനും കുൽദീപിന് സാധിച്ചു. 17 വിക്കറ്റുകൾ നേടിയ മുൻ ശ്രീലങ്ക താരം അജന്ത മെൻഡീസിന്റെ നേട്ടത്തിനൊപ്പം എത്താനും ഇന്ത്യൻ സ്പിന്നർക്ക് സാധിച്ചു. 2007 ഏഷ്യ കപ്പിലാണ് അജന്ത മെൻഡീസ്‌ 17 വിക്കറ്റുകൾ നേടിയത്. 

Indian Captain Shubhman Gill had praised Indian spinner Kuldeep Yadav for his brilliant performance in the Test series against West Indies. Gill praised Kuldeep Yadav as a 'strike bowler'.