കുവൈത്ത് സിറ്റി: കുവൈത്തിലെ ഗതാഗത നിയമലംഘനങ്ങൾ, അഞ്ച് ദിവസത്തിനുള്ളിൽ 55 ശതമാനത്തിലധികം കുറഞ്ഞതായി റിപ്പോർട്ടുകൾ. ഓവർടേക്കിങ്ങ്, മനഃപൂർവ്വം ഗതാഗതതടസം സൃഷ്ടിക്കുക എന്നിവയുമായി ബന്ധപ്പെട്ട നിയമലംഘനങ്ങളാണ് കുറഞ്ഞിരിക്കുന്നത്. ആഭ്യന്തര മന്ത്രാലയം സ്വീകരിച്ച കർശന നടപടികളുടെയും പൊതുജന ബോധവൽക്കരണ കാമ്പയിനുകളുടെയും ഫലമാണ് ഇത്.

പുതുതലമുറ ട്രാഫിക് മോണിറ്ററിംഗ് ക്യാമറകളും നിയമം നടപ്പിലാക്കുന്നതിൽ ട്രാഫിക് ഉദ്യോഗസ്ഥർ സ്വീകരിച്ച കടുത്ത നിലപാടും കുവൈത്തിലെ റോഡുകളിൽ ​ഗതാ​ഗത ലം​ഘനങ്ങൾ കുറയുന്നതിന് കാരണമായെന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്. ഒക്ടോബർ 20 ന് 823 നിയമലംഘനങ്ങളാണ് രേഖപ്പെടുത്തിയത്. എന്നാൽ, ഒക്ടോബർ 25 ആയപ്പോഴേക്കും ഇത് 365 നിയമലംഘനങ്ങളായി കുറഞ്ഞു. ഇത് ഉദ്യോഗസ്ഥരുടെ കാര്യക്ഷമതയും പ്രൊഫഷണലിസവും എടുത്തു കാണിക്കുന്ന ഒരു നേട്ടമാണെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

ALSO READ: ഖത്തർ : ഇന്ത്യന്‍ എംബസി ഓപണ്‍ ഹൗസ് വ്യാഴാഴ്ച

അശ്രദ്ധമായ ഓവർടേക്കിംഗ്, ​ഗതാ​ഗതം തടസ്സപ്പെടുത്തൽ തുടങ്ങിയ നിയമലംഘനങ്ങൾ ഒഴിവാക്കാൻ പൗരന്മാരെയും താമസക്കാരെയും പ്രോത്സാഹിപ്പിച്ച മന്ത്രാലയത്തിന്റെ ബോധവൽക്കരണ ശ്രമങ്ങളുടെ ഭാ​ഗമാണ് നിയമലംഘനങ്ങൾ കുറയാൻ കാരണമെന്ന് അധികൃതർ ചൂണ്ടിക്കാട്ടി.

കർശനമായ ശിക്ഷാ നടപടികൾ

ഓവർടേക്കിംഗ്, ഗതാഗതം തടസ്സപ്പെടുത്തൽ, നിരോധിത സ്ഥലങ്ങളിലെ പാർക്കിംഗ് തുടങ്ങിയ നിയമലംഘനങ്ങൾക്ക് 60 ദിവസം വരെ വാഹനങ്ങൾ പിടിച്ചെടുക്കുന്നതടക്കമുള്ള കർശനമായ ശിക്ഷാ നടപടികളും മന്ത്രാലയം ശക്തമാക്കിയിട്ടുണ്ട്. 

ഗതാഗത നിയമങ്ങൾ ശക്തിപ്പെടുത്തുന്നതിന്റെ ഭാഗമായി രാജ്യത്തെ ആശുപത്രി പ്രദേശങ്ങൾ കേന്ദ്രീകരിച്ച് ഉദ്യോഗസ്ഥർ വലിയ തോതിലുള്ള പരിശോധന നടത്തി. ഒറ്റ ദിവസം കൊണ്ട് ​ഗതാ​ഗതം തടസ്സപ്പെടുത്തൽ, അനധികൃത പാർക്കിംഗ് എന്നിവയ്ക്ക് 222 നിയമലംഘനങ്ങൾ രേഖപ്പെടുത്തി. അതേസമയം, ജാബർ ഹോസ്പിറ്റലിന് സമീപം ഗുരുതരമായ നിയമലംഘനങ്ങൾ നടത്തിയ രണ്ട് വാഹനങ്ങൾ പിടിച്ചെടുത്തു.

പൊതു സുരക്ഷ ഉറപ്പാക്കുന്നതിനും, റോഡുകളിലെ അശ്രദ്ധമായ പെരുമാറ്റം കുറയ്ക്കുന്നതിനും, കർശനമായ നിയമ നിർവ്വഹണവും തുടർച്ചയായ നിരീക്ഷണവും തുടരുമെന്ന് മന്ത്രാലയം വ്യക്തമാക്കി. 

Reports indicate a significant drop in traffic violations in Kuwait, with a decrease of over 55% within just five days. The violations related to overtaking and intentional obstruction of traffic flow have seen a considerable decline.