ഭോപാൽ: സ്‌കൂളിൽ വെച്ച് വിദ്യാർഥിനികളെ ലൈംഗികമായി ഉപദ്രവിക്കുകയും അശ്ലീല വിഡിയോകൾ കാണിക്കുകയും ചെയ്ത അധ്യാപകൻ അറസ്റ്റിൽ. മധ്യപ്രദേശിലെ ബിന്ദ് ജില്ലയിലാണ് ഞെട്ടിക്കുന്ന സംഭവം.പ്രതി രമേന്ദ്ര സിങ് കുശ്വാഹ എന്ന അധ്യാപകൻ അറസ്റ്റിലായി.

ദേഹത് പൊലിസ് സ്റ്റേഷനിൽ മൂന്ന് വിദ്യാർഥിനികളാണ് അധ്യാപകനെതിരെ പരാതി നൽകിയത്.ക്ലാസ് റൂമിനുള്ളിൽ വെച്ച് വിദ്യാർഥിനികളോട് അധ്യാപകൻ മോശമായി പെരുമാറുകയും ലൈംഗികമായി സ്പർശിക്കുകയും അശ്ലീല വിഡിയോകൾ കാണിക്കുകയും ചെയ്തു.വിവരം പുറത്തറിയിച്ചാൽ പ്രത്യാഘാതം ഉണ്ടാകുമെന്ന് പറഞ്ഞ് ഇയാൾ വിദ്യാർഥിനികളെ ഭീഷണിപ്പെടുത്തിയിരുന്നു. ഇതേത്തുടർന്ന് ഭയം കാരണം കുട്ടികൾക്ക് സ്‌കൂളിൽ പോകാൻ മടിയായി.കുട്ടികൾ തുടർച്ചയായി ക്ലാസിൽ പോകാതിരുന്നത് ശ്രദ്ധയിൽപ്പെട്ട മാതാപിതാക്കൾ വിശദമായി അന്വേഷിച്ചപ്പോഴാണ് പീഡനവിവരം പുറത്തറിയുന്നത്.

പ്രിൻസിപ്പലിനെ സമീപിച്ച് ആദ്യം മാതാപിതാക്കൾ പരാതി നൽകിയിരുന്നു. എന്നാൽ നടപടിയെടുക്കാൻ പ്രിൻസിപ്പൽ തയ്യാറാകാതിരുന്നതോടെ അവർ പൊലിസിനെ സമീപിക്കുകയായിരുന്നു.രമേന്ദ്ര സിങ് കുശ്വാഹയ്‌ക്കെതിരെ പോക്സോ നിയമം, പട്ടികജാതി-പട്ടികവർഗ (അതിക്രമങ്ങൾ തടയൽ) നിയമം, ഭാരതീയ ന്യായ സംഹിത എന്നിവ പ്രകാരമാണ് കേസെടുത്ത് അറസ്റ്റ് രേഖപ്പെടുത്തിയത്.

വിദ്യാർഥിനികളുടെ വൈദ്യപരിശോധന പൂർത്തിയാക്കിയതായും, സ്കൂൾ ജീവനക്കാരിൽ നിന്നും മാനേജ്‌മെൻ്റിൽ നിന്നും വിവരങ്ങൾ ശേഖരിച്ചതായും പൊലിസ് അറിയിച്ചു.ജില്ലാ വിദ്യാഭ്യാസ ഓഫീസർ പ്രതിയായ അധ്യാപകനെ സസ്പെൻഡ് ചെയ്തു.