കൊല്ലം: ദേശീയപാത നിര്‍മ്മാണം നടക്കുന്ന കൊല്ലം ബൈപ്പാസില്‍ ഇതരസംസ്ഥാന തൊഴിലാളിക്ക് ദാരുണാന്ത്യം. ബിഹാര്‍ സ്വദേശി മുഹമ്മദ് ജുബ്രായില്‍ (42) ആണ് മരിച്ചത്. കുരീപ്പുഴ പാലത്തിന് സമീപം മണ്ണിനടിയില്‍ ചതഞ്ഞരഞ്ഞ നിലയിലാണ് മൃതദേഹം കണ്ടെത്തിയത്. 

നിര്‍മ്മാണ ജോലികള്‍ ചെയ്യവേ മണ്ണിനടിയില്‍ അകപ്പെട്ടുവെന്നാണ് സംശയിക്കുന്നത്. ഇന്ന് പുലര്‍ച്ചെ ഗ്ലൈഡര്‍ ഉപയോഗിച്ച് മണ്ണ് നീക്കുന്നതിനിടെ മൃതദേഹ ഭാഗം കണ്ടെത്തുകയായിരുന്നു. 

സംഭവത്തില്‍ അഞ്ചാലുംമൂട് പൊലിസ് കേസെടുത്തു. അസ്വഭാവിക മരണത്തിനാണ് കേസെടുത്തത്. സംഭവത്തില്‍ ഇന്‍ക്വസ്റ്റ് നടപടികള്‍ക്കുശേഷം മൃതദേഹം പോസ്റ്റ്‌മോര്‍ട്ടത്തിനായി കൊണ്ടുപോകും. മരണകാരണമടക്കം വ്യക്തമല്ല.

English summary: A migrant worker from Bihar, identified as Mohammad Jubrail (42), met a tragic end at a national highway construction site in Kollam, Kerala. The body was found crushed and buried under soil near the Kureepuzha Bridge on the Kollam bypass.