ആലപ്പുഴ: ആലപ്പുഴ വണ്ടാനം ഗവൺമെന്റ് ഡെന്റൽ ആശുപത്രിയിൽ സീലിങ് അടർന്ന് രോഗിയുടെ ദേഹത്ത് വീണു. എക്സ്റേ റൂമിന് മുന്നിലുള്ള ജി ബോർഡ് സീലിങ്ങാണ് വീണത്. സംഭവത്തിൽ ആറാട്ടുപുഴ തറയിൽ കടവ് സ്വദേശിയായ ഹരിതക്കാണ് പരുക്ക് പറ്റിയത്. എക്സ്റേ എടുക്കാൻ എത്തിയപ്പോഴാണ് അപകടം നടന്നത്. പരുക്കേറ്റ യുവതിയെ വണ്ടാനം മെഡിക്കൽ കോളേജ് ആശുപത്രയിൽ പ്രവേശിപ്പിച്ചു. ഇവരുടെ പരുക്ക് ഗുരുതരമല്ല.

മൂന്ന് മാസങ്ങൾക്ക് മുമ്പാണ് ഇവിടെ സീലിങ് ഘടിപ്പിച്ചത്. നേരത്തെ പഴയ കെട്ടിടത്തിൽ പ്രവർത്തിച്ച ആശുപത്രി കുറച്ചു മാസങ്ങൾക്ക് മുമ്പാണ് പുതിയ കെട്ടിടത്തിലേക്ക് മാറ്റിയത്. സീലിങ് അടർന്നു വീണ സംഭവത്തിൽ അന്വേഷണം നടത്തുമെന്നും സൂപ്രണ്ട് വ്യക്തമാക്കി.