റിയാദ്: ലോകഫുട്‌ബോളിലെ പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയുടെ ആഴ്ചതോറുമുള്ള 4 മില്യൺ ഡോളർ ശമ്പളം അത്രയും വലിയ പ്രതിഫലം സഊദി പ്രോ ലീഗിൽ അർഹിക്കുന്ന ഏക വിദേശതാരം അദ്ദേഹം മാത്രമാണ് എന്ന് സഊദി അറേബ്യയുടെ മുൻ കായികമന്ത്രി പ്രിൻസ് അബ്ദുൾ ബിൻ മൊസാദ് പ്രസ്താവിച്ചു.

റൊണാൾഡോയുടെ സാന്നിധ്യം സഊദി പ്രോ ലീഗിന് ആഗോള തലത്തിൽ നൽകിയ പ്രശസ്തിയാണ് ഈ വലിയ ശമ്പളം അർഹിക്കാനുള്ള കാരണം എന്നും അദ്ദേഹം ചൂണ്ടിക്കാട്ടി.

"ലീഗിനും രാജ്യത്തിനും അദ്ദേഹം കൊണ്ടുവന്ന അന്താരാഷ്ട്ര പ്രശസ്തിക്ക് നന്ദി. ശമ്പളം അർഹിക്കുന്ന ഒരേയൊരു വിദേശ കളിക്കാരൻ റൊണാൾഡോ മാത്രമാണ്," പ്രിൻസ് അബ്ദുൾ ബിൻ മൊസാദ് അൽ-അറേബ്യ ചാനലിന് നൽകിയ അഭിമുഖത്തിൽ പറഞ്ഞു.

2014 മുതൽ 2017 വരെ സഊദി കായികമന്ത്രിയായിരുന്ന പ്രിൻസ് ബിൻ മൊസാദ്, രാജ്യത്തിന്റെ സ്പോർട്സ് ഡിപ്ലോമസിയുടെ പ്രധാന ശില്പികളിൽ ഒരാളാണ്.

2023 ജനുവരിയിൽ മാഞ്ചസ്റ്റർ യുണൈറ്റഡുമായുള്ള ബന്ധം അവസാനിപ്പിച്ചാണ് റൊണാൾഡോ അൽ-നാസർ ക്ലബ്ബിൽ ചേർന്നത്. സഊദി ഫുട്ബോളിന്റെ ചരിത്രത്തിലെ ഏറ്റവും വലിയ ട്രാൻസ്ഫറായിരുന്നു ഇത്.

 പുതിയ കരാർ പ്രകാരം പ്രതിവർഷം 1,770 കോടി രൂപയാണ് റൊണാൾഡോയ്ക്ക് ലഭിക്കുന്നത്.അൽ-നാസറുമായുള്ള ആദ്യ കരാർ അവസാനിച്ചതോടെ, 40-കാരനായ റൊണാൾഡോ രണ്ട് വർഷത്തേക്ക് പുതിയ കരാറിൽ ഒപ്പുവച്ചു.

• ആഴ്ചയിലെ വരുമാനം: 4 മില്യൺ ഡോളർ (ഏകദേശം 33 കോടി രൂപ).
• വാർഷിക വരുമാനം: 211 മില്യൺ ഡോളർ (ഏകദേശം 1,770 കോടി രൂപ)).
• മൊത്തം കരാർ തുക: 422 മില്യൺ ഡോളർ (ഏകദേശം ₹ 3,540 കോടി).

ലോകഫുട്ബോളിലെ ഏറ്റവും ഉയർന്ന പ്രതിഫലം വാങ്ങുന്ന കളിക്കാർക്കൊപ്പമാണ് ഈ 'സഊദി സ്വപ്നം' റൊണാൾഡോയെ എത്തിച്ചത്. ഈ ഭീമമായ സാലറി സഊദി ലീഗിനെ ഒരു 'ഗ്ലോബൽ ബ്രാൻഡ്' ആക്കി മാറ്റിയെന്നാണ് മുൻ മന്ത്രിയുടെ വാദം.

 സഊദി ലീഗിന്റെ സ്റ്റാർ സ്ട്രാറ്റജി

റൊണാൾഡോയുടെ വരവിന് പിന്നാലെയാണ് കരീം ബെൻസിമ, ജോവോ ഫെലിക്സ്, സാധിയോ മാനെ തുടങ്ങി യൂറോപ്പിലെ പ്രമുഖ താരങ്ങൾ സഊദി പ്രോ ലീഗിലേക്ക് ഒഴുകിയെത്തിയത്. നെയ്മർ ജൂനിയർ പോലും അൽ-ഹിലാലിന്റെ ഭാഗമായിരുന്നു.എങ്കിലും, റൊണാൾഡോയുടെ 'CR7' ബ്രാൻഡാണ് ലീഗിന് അന്താരാഷ്ട്ര ശ്രദ്ധയും ഗ്ലാമറും നൽകിയത് എന്ന പ്രിൻസിന്റെ വാക്കുകൾ സഊദി ഫുട്‌ബോളിന്റെ 'സൂപ്പർസ്റ്റാർ സ്ട്രാറ്റജി'യുടെ വിജയം എടുത്തു കാണിക്കുന്നു.

സഊദി അറേബ്യയുടെ 'വിഷൻ 2030' പ്രോജക്ടിന്റെ ഭാഗമായി ഫുട്ബോൾ ലീഗിനെ ലോകോത്തര നിലവാരത്തിലേക്ക് ഉയർത്താനുള്ള ശ്രമങ്ങൾ തുടരുകയാണ്. റൊണാൾഡോയുടെ വരവ് മാത്രം ലീഗിന്റെ ടിവി സംപ്രേക്ഷണാവകാശ മൂല്യം 40% വർധിപ്പിച്ചതായും ടൂറിസ്റ്റ് സന്ദർശകരുടെ എണ്ണം ഇരട്ടിയാക്കിയതായും റിപ്പോർട്ടുകൾ സൂചിപ്പിക്കുന്നു.