മേപ്പാടി: കെ.എസ്.യു ജില്ലാ പ്രസിഡന്റ് ജഷീര്‍ പള്ളിവയലിനെ മര്‍ദിച്ചതില്‍ പ്രതിഷേധിച്ച് മേപ്പാടി മൂപ്പൈനാട് പഞ്ചായത്തുകളില്‍ യു.ഡി.എഫ് ആഹ്വാനം ചെയ്ത ഹര്‍ത്താല്‍ പൂര്‍ണം. രാവിലെ ആറ് മുതല്‍ ഉച്ചക്ക് രണ്ട് വരെയായിരുന്നു ഹര്‍ത്താല്‍. വ്യാപാര സ്ഥാപനങ്ങള്‍ അടഞ്ഞുകിടന്നു. ഇരു പഞ്ചായത്തുകളിലെയും വിവിധയിടങ്ങളില്‍ പ്രവര്‍ത്തകര്‍ വാഹനങ്ങള്‍ പൂര്‍ണമായും തടഞ്ഞിട്ടു. ഹര്‍ത്താലിന് ബി.ജെ.പിയുടെ പിന്തുണയും ഉണ്ടായിരുന്നു.
മേപ്പാടി പഞ്ചായത്തിലും മേപ്പാടി ടൗണിലും ചൂരല്‍മലയിലും യു.ഡി.എഫ്, ബി.ജെ.പി പ്രവര്‍ത്തകര്‍ കെ.എസ്.ആര്‍.ടി.സി ബസുകള്‍ ഉള്‍പ്പെടെ തടഞ്ഞിട്ടു. രാവിലെ തടഞ്ഞ വാഹനങ്ങള്‍ ഉച്ചക്ക് പന്ത്രണ്ട് മണിയോടെയാണ് വിട്ടയച്ചത്. ചൂരല്‍മലയില്‍ രാവിലെ എട്ടുമണിയോടെ തന്നെ പ്രവര്‍ത്തകര്‍ ടൗണില്‍ തമ്പടിച്ചിരുന്നു. തുടര്‍ന്ന് മുണ്ടക്കൈ, അട്ടമല എന്നിവിടങ്ങളില്‍ നിന്നുള്ള ബസുകള്‍ തടഞ്ഞിട്ടു.
മേപ്പാടി പൊലിസ് സ്റ്റേഷന്‍ എസ്.ഐ കെ അയ്യപ്പന്റെ നേതൃത്വത്തിലുള്ള പൊലിസ് സംഘമെത്തി സമരക്കാരുമായി ചര്‍ച്ച നടത്തിയതിനെ തുടര്‍ന്ന് ബസുകള്‍ വിട്ടയക്കുകയായിരുന്നു. പൊലിസ് സുരക്ഷയിലാണ് മേപ്പാടി വരെ ബസുകള്‍ സര്‍വിസ് നടത്തിയത്. എന്നാല്‍ മേപ്പാടിയിലും പ്രവര്‍ത്തകര്‍ റോഡ് ഉപരോധിച്ചതോടെ യാത്രക്കാര്‍ മണിക്കൂറുകളോളം റോഡില്‍ കുടുങ്ങി.
വിദ്യാര്‍ഥികളുള്‍പെടെ നിരവധി യാത്രക്കാരാണ് സമരം കാരണം ദുരിതത്തിലായത്. വടുവന്‍ചാല്‍-കല്‍പ്പറ്റ റൂട്ടില്‍ സര്‍വിസ് നടത്തുന്ന സ്വകാര്യ ബസുകളൊന്നും ഇന്നലെ നിരത്തിലിറങ്ങിയിരുന്നില്ല. കൂടാതെ മേപ്പാടി-ചൂരല്‍മല ജീപ്പ് സര്‍വിസും നിലച്ചിരുന്നു.
ഹര്‍ത്താല്‍ സമയം പഞ്ചായത്ത് ഓഫിസ് പ്രവര്‍ത്തിച്ചതില്‍ പ്രതിഷേധിച്ച് യു.ഡി.എഫ്, ബി.ജെ.പി പ്രവര്‍ത്തകര്‍ പഞ്ചായത്ത് ഓഫിസിലേക്ക് മാര്‍ച്ച് നടത്തി. മാര്‍ച്ചിനിടെ ഓഫിസിലെ കസേരകള്‍ തകര്‍ക്കപ്പെട്ടു. സ്റ്റാന്‍ഡിങ് കമ്മിറ്റി ചെയര്‍മാന്‍ ചന്ദ്രശേഖരന്‍ തമ്പിക്ക് മര്‍ദനമേറ്റതായും പരാതിയുണ്ട്. ചന്ദ്രശേഖരന്‍ തമ്പി മേപ്പാടി സാമൂഹികാരോഗ്യ കേന്ദ്രത്തില്‍ ചികിത്സയിലാണ്.
കഴിഞ്ഞ ദിവസം മേപ്പാടി പോളി ടെക്‌നികിലെ തെരഞ്ഞെടുപ്പുമായി ബന്ധപ്പെട്ടാണ് സംഘര്‍ഷം അരങ്ങേറിയത്. ഇതില്‍ ജഷീര്‍ പള്ളിവയലിന് പരുക്കേറ്റിരുന്നു.  തുടര്‍ന്നാണ് യു.ഡി.എഫ് രണ്ടു പഞ്ചായത്തുകളില്‍ ഹര്‍ത്താലിന് ആഹ്വാനം ചെയതത്.