മനാമ: സാമ്പത്തിക ബാധ്യതകള്‍ തീര്‍ക്കാതെ രാജ്യം വിടുന്ന പ്രവാസികള്‍ക്കെതിരെ കര്‍ശന നടപടികള്‍  വരുന്നു. തട്ടിപ്പുകാർക്കെതിരെ കടുത്ത നടപടി സ്വീകരിക്കാന്‍ നിയമഭേദഗതി വേണമെന്ന ആവശ്യത്തിന് പാര്‍ലമെന്റ് പിന്തുണ ലഭിച്ചു. വിദേശ നിക്ഷേപകര്‍, വാണിജ്യ രജിസ്‌ട്രേഷനുകളുടെ വിദേശ ഉടമകള്‍, ഫ്‌ലെക്‌സി വിസ സംവിധാനത്തിന് കീഴില്‍ രജിസ്റ്റര്‍ ചെയ്ത തൊഴിലാളികള്‍ എന്നിവര്‍ സാമ്പത്തിക ബാധ്യതകള്‍ തീര്‍ക്കാതെ രാജ്യം വിടുന്നത് തടയാന്‍ നിലവിലുള്ള നിയമത്തില്‍ ഭേദഗതി വരുത്തണമെന്നു  സ്ട്രാറ്റജിക് തിങ്കിങ് ബ്ലോക്കിലെ അംഗം ഖാലിദ് ബു അനകിന്റെ നേതൃത്വത്തിലുള്ള എംപിമാര്‍ ആവശ്യപ്പെട്ടു.

പരിഹരിക്കപ്പെടാത്ത കടങ്ങൾ സമ്പദ്വ്യവസ്ഥയെ ഇല്ലാതാക്കുകയും നിക്ഷേപ കാലാവസ്ഥയെ ദുർബലപ്പെടുത്തുകയും ആയിരക്കണക്കിന് പ്രാദേശിക ബിസിനസുകളെ പ്രതികൂലമായി ബാധിക്കുകയും ചെയ്യുന്നുവെന്ന് വാദിച്ചു എംപിമാർ ഈ നീക്കത്തിന്റെ പ്രാധാന്യം പാർലമെന്റിനെ ബോധ്യപ്പെടുത്തി.

ഖാലിദ് ബു അനകിന്റെ നേതൃത്വത്തിലുള്ള അഞ്ച് അംഗങ്ങളുടെ നിർദ്ദേശം അവലോകനത്തിനായി ഔദ്യോഗികമായി മന്ത്രിസഭയിലേക്ക് അയച്ചു. നിർദ്ദേശത്തോടൊപ്പം ചേർത്തിട്ടുള്ള ഒരു വിശദീകരണക്കുറിപ്പിൽ ഈ പ്രശ്നത്തെ ദേശീയ സമ്പദ്വ്യവസ്ഥയുടെ മേൽ നിഴൽ വീഴ്ത്തുന്ന 'വളരുന്ന പ്രതിഭാസം' എന്നാണ് വിശേഷിപ്പിക്കുന്നത്.

 കടങ്ങള്‍ തീര്‍ക്കാതെ രാജ്യം വിടുന്നത് രാജ്യത്ത് വര്‍ധിച്ചു വരുന്നുണ്ടെന്നും ബാങ്ക് വായ്പ തിരിച്ചടവുകള്‍, വാടക കുടിശ്ശിക, മറ്റ് പിഴകള്‍ എന്നിവ അടയ്ക്കാതെയാണ് പലരും രാജ്യം വിടുന്നതെന്നും ഇത് രാജ്യത്തിന് വലിയ സാമ്പത്തിക നഷ്ടം ഉണ്ടാക്കുകയും നിക്ഷേപകരിലുള്ള വിശ്വാസം ഇല്ലാതാക്കുകയും ചെയ്യുമെന്ന് എംപിമാര്‍ ചൂണ്ടിക്കാട്ടി.

കഴിഞ്ഞ ആഴ്ചത്തെ സെഷനില്‍ വോട്ടെടുപ്പ് മാറ്റിവച്ചതിനെത്തുടര്‍ന്നാണ് ഇപ്പോള്‍ വോട്ടെടുപ്പ് നടന്നത്. എംപിമാര്‍ എല്ലാം ഈ ഭേദഗതിയെ പിന്തുണച്ചു.

A proposal to impose strict legal controls on foreign investors and flexible-visa workers – ensuring they do not leave Bahrain permanently without settling outstanding debts – has been approved by Parliament.