ദുബൈ: ശൈത്യകാല അവധിക്കാലം പ്രമാണിച്ച് യാത്രക്കാരുടെ എണ്ണം വർദ്ധിച്ചതോടെ, വിമാനയാത്രയിൽ പവർ ബാങ്കുകളും മറ്റ് ലിഥിയം ബാറ്ററികളും കൊണ്ടുപോകുന്നതുമായി ബന്ധപ്പെട്ട് കർശന മുന്നറിയിപ്പുമായി ദുബൈ വിമാനത്താവള അധികൃതർ. ഇന്റർനാഷണൽ എയർ ട്രാൻസ്പോർട്ട് അസോസിയേഷന്റെ (IATA) സുരക്ഷാ കാമ്പെയ്‌നിന്റെ ഭാഗമായാണ് യാത്രക്കാർ പാലിക്കേണ്ട ഏഴ് നിർണ്ണായക നിയമങ്ങൾ അധികൃതർ വീണ്ടും ഓർമ്മിപ്പിച്ചത്. ഫോണുകൾ, ലാപ്‌ടോപ്പുകൾ, പവർ ബാങ്കുകൾ എന്നിവയിലെ ലിഥിയം ബാറ്ററികൾ ശരിയായ രീതിയിൽ പായ്ക്ക് ചെയ്തില്ലെങ്കിൽ തീപിടുത്തത്തിന് കാരണമാകുമെന്നതിനാലാണ് അധികൃതരുടെ ജാഗ്രതാ നിർദ്ദേശം.

ലിഥിയം ബാറ്ററികൾ ഉപയോഗിക്കുന്ന ഉപകരണങ്ങൾ കൈകാര്യം ചെയ്യുന്നതിൽ യാത്രക്കാർ അതീവ ശ്രദ്ധ പുലർത്തണം. സ്മാർട്ട് ഫോണുകൾ, ലാപ്‌ടോപ്പുകൾ, ക്യാമറകൾ, പവർ ബാങ്കുകൾ എന്നിവ ഒരു കാരണവശാലും ചെക്ക്-ഇൻ ബാഗേജിൽ വെക്കാൻ പാടില്ല. പകരം ഇവ ഹാൻഡ് ലഗേജിൽ തന്നെ സൂക്ഷിക്കണം.

സ്പെയർ ബാറ്ററികൾ കൊണ്ടുപോകുന്നുണ്ടെങ്കിൽ അവയുടെ ടെർമിനലുകൾ ഷോർട്ട് സർക്യൂട്ട് ഉണ്ടാകാത്ത വിധം ടേപ്പ് ഉപയോഗിച്ച് മറയ്ക്കണം. കൂടാതെ, 100 Wh-ൽ കൂടുതൽ ശേഷിയുള്ള ബാറ്ററികൾ കൊണ്ടുപോകാൻ വിമാനക്കമ്പനിയുടെ പ്രത്യേക അനുമതി ആവശ്യമാണ്. വിമാനത്തിനുള്ളിൽ വെച്ച് പവർ ബാങ്ക് ചൂടാകുകയോ പുകയുകയോ ചെയ്താൽ ഉടൻ തന്നെ വിമാന ജീവനക്കാരെ വിവരമറിയിക്കണമെന്നും അധികൃതർ നിർദ്ദേശിക്കുന്നു.

ALSO READ: മസ്കിനെ കൂട്ടി ഷെയ്ഖ് ഹംദാന്റെ ഡ്രൈവ്; ദുബൈയിൽ വിപ്ലവകരമായ മാറ്റങ്ങൾ ലക്ഷ്യമിട്ട് നിർണ്ണായക കൂടിക്കാഴ്ച 

ദുബൈയിലെ പ്രമുഖ വിമാനക്കമ്പനികളായ എമിറേറ്റ്‌സും ഫ്ലൈദുബൈയും തങ്ങളുടെ പവർ ബാങ്ക് നയങ്ങളിൽ നേരത്തെ തന്നെ മാറ്റം വരുത്തിയിരുന്നു. ഒരാൾക്ക് 100 Wh-ൽ താഴെയുള്ള ഒരു പവർ ബാങ്ക് മാത്രമേ കൈവശം വെക്കാൻ അനുവാദമുള്ളൂ. ഇവ വിമാനത്തിനുള്ളിൽ വെച്ച് ചാർജ് ചെയ്യാനോ ഓവർഹെഡ് ബിന്നുകളിൽ സൂക്ഷിക്കാനോ പാടില്ല. യാത്രക്കാർ ഇവ സീറ്റിനടിയിൽ തന്നെ സൂക്ഷിക്കേണ്ടതാണ്. ഇ-സിഗരറ്റുകൾക്കും സമാനമായ നിയന്ത്രണങ്ങൾ ബാധകമാണ്. ഇവ കൈവശം വെക്കാമെങ്കിലും വിമാനത്തിനുള്ളിൽ ഉപയോഗിക്കാനോ ചാർജ് ചെയ്യാനോ അനുമതിയില്ല.

സ്മാർട്ട് ലഗേജുകൾ ഉപയോഗിക്കുന്നവരും ശ്രദ്ധിക്കണം. നീക്കം ചെയ്യാൻ കഴിയുന്ന ബാറ്ററികൾ മാത്രമുള്ള ലഗേജുകൾക്കേ വിമാനത്തിൽ അനുമതിയുള്ളൂ. യാത്രക്കാർ ബാഗുകൾ വിമാനത്തിന്റെ ഗേറ്റിൽ വെച്ച് ചെക്ക്-ഇൻ ചെയ്യുന്ന സാഹചര്യമുണ്ടായാൽ അതിനുള്ളിലെ പവർ ബാങ്കുകളും ലിഥിയം ഉപകരണങ്ങളും നിർബന്ധമായും പുറത്തെടുത്ത് കൈവശം വെക്കണം.

കാർഗോ ഹോൾഡിൽ ഇത്തരം ഉപകരണങ്ങൾ അമിതമായി ചൂടാകുന്നത് നിയന്ത്രിക്കാൻ ബുദ്ധിമുട്ടായതിനാലാണ് ഹാൻഡ് ലഗേജിൽ മാത്രം ഇവ അനുവദിക്കുന്നത്. യാത്രയ്ക്ക് മുൻപായി അതത് വിമാനക്കമ്പനികളുടെ വെബ്‌സൈറ്റുകൾ പരിശോധിച്ച് കൃത്യമായ നിയമങ്ങൾ മനസ്സിലാക്കണമെന്ന് ദുബൈ വിമാനത്താവള അധികൃതർ അഭ്യർത്ഥിച്ചു.

dubai airport authorities warn passengers about risks of carrying power banks during air travel safety guidelines highlight battery limits proper storage and restrictions to prevent fire hazards ensure passenger safety and smooth security checks at airports across the emirate and international flights