ദുബൈ: ദുബൈയിലെ മരുഭൂമിയിൽ അലഞ്ഞുതിരിയുന്ന വിചിത്ര രൂപമുള്ള ഒരു കൂട്ടം മൃഗങ്ങളുടെ വീഡിയോ സോഷ്യൽ മീഡിയയിൽ തരംഗമാകുന്നു. ഓസ്‌ട്രേലിയൻ സ്വദേശിയായ ലൂയിസ് സ്റ്റാർക്കി പകർത്തിയ ദൃശ്യങ്ങളാണ് ദശലക്ഷക്കണക്കിന് ആളുകൾ കണ്ടിരിക്കുന്നത്. മുയലിന്റെയും മാനിന്റെയും നായയുടെയും സങ്കരയിനം പോലെ തോന്നിക്കുന്ന ഈ ജീവികൾ ഏതാണെന്ന ചർച്ചയിലാണ് ഇപ്പോൾ സൈബർ ലോകം.

ദുബൈയിലെ പ്രശസ്തമായ ക്രസന്റ് മൂൺ ലേക്കിന് (Crescent Moon Lake) സമീപം ബാർബിക്യൂവിന് പോയപ്പോഴാണ് ലൂയിസ് ഈ മൃഗങ്ങളെ കണ്ടത്. "എന്താണിത്? ദൈവമേ, ഇതൊരു മുയലാണോ?" എന്ന് വീഡിയോയിൽ ഒരാൾ അത്ഭുതപ്പെടുന്നത് കേൾക്കാം. "ഹാരി പോട്ടറിലെ മിശ്രിത വർഗ്ഗമാണോ ഇത്? അതോ ബണ്ണി-മാൻ-നായ ആണോ?" എന്ന അടിക്കുറിപ്പോടെയാണ് അവർ ഇൻസ്റ്റാഗ്രാമിൽ വീഡിയോ പങ്കുവെച്ചത്.

ALSO READ: യുഎഇയിലെ പുതിയ സ്കൂൾ പ്രവേശന നിയമം; പ്രായപരിധി കുറച്ചത് കൊണ്ട് മാത്രം സ്കൂൾ പ്രവേശനം ഉറപ്പുനൽകാനാകില്ലെന്ന് വിദ്യാഭ്യാസ മന്ത്രാലയം 

നിഗൂഢത നീക്കി സോഷ്യൽ മീഡിയ

വീഡിയോ വൈറലായതോടെ ഈ ജീവി ഏതാണെന്ന കാര്യത്തിൽ വ്യക്തതയുമായി നിരവധി പേർ രംഗത്തെത്തി. ഇത് അർജന്റീനയിൽ കണ്ടുവരുന്ന 'പാറ്റഗോണിയൻ മാര' (Patagonian Mara) എന്ന വലിയ കാട്ടു എലി വർഗ്ഗത്തിൽപ്പെട്ട മൃഗമാണെന്ന് ഉപയോക്താക്കൾ തിരിച്ചറിഞ്ഞു. കാഴ്ചയിൽ നീളമുള്ള ചെവികളും ചെറിയ മാനിന്റേതു പോലുള്ള കാലുകളുമാണ് ഇവയ്ക്കുള്ളത്. സസ്യഭുക്കുകളായ ഇവ തികച്ചും നിരുപദ്രവകാരികളാണ്. ദുബൈയിലെ അൽ ഖുദ്ര, അൽ മർമൂം മരുഭൂമി സംരക്ഷണ മേഖലകളിൽ ഇവയെ ധാരാളമായി കാണാറുണ്ട്.

ദുബൈയിൽ ഇവ എങ്ങനെ എത്തി?

അർജന്റീനയിൽ നിന്നുള്ള ഈ മൃഗങ്ങൾ എങ്ങനെ ദുബൈയിൽ എത്തി എന്നതിനെക്കുറിച്ച് ഔദ്യോഗിക സ്ഥിരീകരണമില്ല. എങ്കിലും, വളർത്തുമൃഗങ്ങളായി കൊണ്ടുവന്നവയെ ഉടമകൾ ഉപേക്ഷിച്ചതാകാം എന്നും പിന്നീട് അവ വംശവർദ്ധനവ് നടത്തി മരുഭൂമിയിൽ വ്യാപിച്ചതാകാം എന്നുമാണ് കരുതപ്പെടുന്നത്. നിലവിൽ ഏകദേശം ഇരുന്നൂറോളം പാറ്റഗോണിയൻ മാരകൾ അൽ മർമൂം മേഖലയിൽ ഉണ്ടെന്നാണ് പറയപ്പെടുന്നത്.
2020 മുതൽ അൽ ഖുദ്ര തടാകങ്ങൾക്ക് സമീപം ഇവയെ കണ്ടുവരുന്നുണ്ടെങ്കിലും, ഈ വീഡിയോയിലൂടെയാണ് ഇവ വീണ്ടും ആഗോള ശ്രദ്ധ നേടിയത്. വന്യമൃഗങ്ങളായതിനാൽ ഇവയെ ദൂരെ നിന്ന് മാത്രം നിരീക്ഷിക്കാനാണ് വിദഗ്ധർ നിർദ്ദേശിക്കുന്നത്.

viral video from dubai desert shows a strange animal resembling a rabbit and a deer confusing viewers experts debate whether it is rare wildlife genetic mutation or clever camera illusion shared widely across social media platforms around the world today