മനാമ: രാജ്യത്തെ തെരുവ് കച്ചവടക്കാര്‍ക്കും സഞ്ചരിക്കുന്ന ഭക്ഷണശാലകള്‍ക്കുമുള്ള (Mobile Food Vendors) നിയമങ്ങളും നിബന്ധനകളും വ്യക്തമാക്കി ബഹ്‌റൈന്‍ മുനിസിപ്പാലിറ്റി കാര്യ, കൃഷി മന്ത്രി വഈല്‍ അല്‍ മുബാറക്. ചെറുകിട സംരംഭങ്ങളെയും യുവജന നേതൃത്വം നല്‍കുന്ന ദേശീയ പദ്ധതികളെയും മുനിസിപ്പാലിറ്റികള്‍ പിന്തുണയ്ക്കുന്ന സാഹചര്യത്തിലാണ് മന്ത്രിയുടെ വിശദീകരണം. പാര്‍ലമെന്റില്‍ ലൈസന്‍സുമായി ബന്ധപ്പെട്ട ജലാല്‍ ഖാദം അല്‍ മഹ്ഫൂദ് എംപിയുടെ ചോദ്യത്തിന് മറുപടിയായാണ് മുനിസിപ്പാലിറ്റി കാര്യകൃഷി മന്ത്രി വാഇല്‍ അല്‍ മുബാറക് നിലപാട് വ്യക്തമാക്കിയത്.
രാജ്യത്തിന്റെ സാംസ്‌കാരികവും നാഗരികവുമായ പ്രതിച്ഛായ ഉയര്‍ത്തുന്നതിനും പൗരന്‍മാര്‍ക്കും താമസക്കാര്‍ക്കും മികച്ച സേവനങ്ങള്‍ ഉറപ്പാക്കുന്നതിനും പൊതു സേവനങ്ങള്‍ക്കും സൗകര്യങ്ങള്‍ക്കും മന്ത്രാലയം വലിയ പ്രാധാന്യം നല്‍കുന്നുവെന്ന് മന്ത്രി പറഞ്ഞു. 2006 മുതല്‍ മുനിസിപ്പല്‍ കൗണ്‍സിലുകളുടെ തീരുമാനങ്ങളിലൂടെ തെരുവ് വ്യാപാര പ്രവര്‍ത്തനം നിയന്ത്രണവിധേയമാണെന്നും, ഔദ്യോഗിക ഗസറ്റില്‍ പ്രസിദ്ധീകരിച്ച ഏകീകൃത മാനദണ്ഡങ്ങളാണ് എല്ലാ ഗവര്‍ണറേറ്റുകളിലും ബാധകമെന്നും അദ്ദേഹം വ്യക്തമാക്കി.

ഈ ചട്ടങ്ങള്‍ വഴി ഈ തൊഴില്‍ ബഹ്‌റൈന്‍ പൗരന്‍മാര്‍ക്ക് മാത്രമായി പരിമിതപ്പെടുത്തുക, അവര്‍ക്ക് സാമ്പത്തിക പിന്തുണ ഉറപ്പാക്കുക, പൊതുജനാരോഗ്യസുരക്ഷ മാനദണ്ഡങ്ങള്‍ പാലിപ്പിക്കുക, പ്രവര്‍ത്തനം അനുവദിച്ചിരിക്കുന്ന ഇടങ്ങള്‍ ക്രമീകരിക്കുക എന്നിവയാണ് ലക്ഷ്യമെന്ന് മന്ത്രി പറഞ്ഞു. ഇതുപ്രകാരം 18 വയസ് പൂര്‍ത്തിയായ, ആരോഗ്യപരമായി യോഗ്യരായ, പകര്‍ച്ചവ്യാധികളില്ലാത്ത ബഹ്‌റൈന്‍ പൗരന്‍മാര്‍ക്കാണ് തെരുവ് വ്യാപാര ലൈസന്‍സ് അനുവദിക്കുക.

പ്രധാന നിയമങ്ങള്‍ ഇവയാണ്:

* ലൈസന്‍സ് ബഹ്‌റൈനികള്‍ക്ക് മാത്രം: തെരുവ് കച്ചവട ലൈസന്‍സ് സ്വദേശികള്‍ക്ക് മാത്രമായി പരിമിതപ്പെടുത്തിയിരിക്കുന്നു. 
* പ്രായപരിധി: അപേക്ഷകര്‍ക്ക് 18 വയസ്സോ അതില്‍ കൂടുതലോ ഉണ്ടായിരിക്കണം.
* ആരോഗ്യം: അപേക്ഷകര്‍ പകര്‍ച്ചവ്യാധികള്‍ ഇല്ലാത്തവരും ഫിസിക്കലി ഫിറ്റ്‌നസും ഉള്ളവരകണം.
*  മറ്റ് തൊഴിലുകള്‍ പാടില്ല: സര്‍ക്കാര്‍, സ്വകാര്യ മേഖലകളില്‍ ജോലി ചെയ്യുന്നവര്‍ക്കോ പേരില്‍ കൊമേഴ്‌സ്യല്‍ രജിസ്‌ട്രേഷന്‍ (CR) ഉള്ളവര്‍ക്കോ ലൈസന്‍സ് ലഭിക്കില്ല.
* ലൈസന്‍സ് കൈമാറരുത്: ലൈസന്‍സ് അനുവദിക്കുന്നത് അപേക്ഷിച്ച വ്യക്തികള്‍ക്കാണ്. ഇത് മറ്റൊരാള്‍ക്ക് കൈമാറാന്‍ അനുവാദമില്ല.
* ഒരാള്‍ക്ക് ഒരു ലൈസന്‍സ് മാത്രം: അപേക്ഷിച്ച ആള്‍ക്ക്എല്ലാ മുനിസിപ്പാലിറ്റികളിലുമായി ഒരു ലൈസന്‍സ് മാത്രമേ അനുവദിക്കൂ. അപേക്ഷ ഇലക്ട്രോണിക് സംവിധാനം വഴി ആയതിനാല്‍ ഒരേ വ്യക്തിക്ക് ഒന്നിലധികം അപേക്ഷകള്‍ നല്‍കാനാകില്ല.
* കാലാവധി: ഒരു വര്‍ഷത്തേക്കാണ് ലൈസന്‍സ് അനുവദിക്കുന്നത്. കാലാവധി അവസാനിക്കുന്നതിന് ഒരു മാസം മുമ്പ് ഇത് പുതുക്കേണ്ടതുണ്ട്. 

ALSO READ: സര്‍ഗാത്മകത പ്രോത്സാഹിപ്പിക്കാന്‍ ഖത്തര്‍ മ്യൂസിയംസും റിലയന്‍സ് ഫൗണ്ടേഷനും ഒന്നിച്ചു

Bahrain's Minister of Municipal Affairs and Agriculture, Wael Al Mubarak, has clarified the rules and regulations for street vendors and mobile food vendors in the country.