കൊച്ചി: ഏറെ നീണ്ട ചര്‍ച്ചകള്‍ക്കൊടുവിലാണ് കൊച്ചി മേയര്‍ സ്ഥാനത്തേക്ക് വി.കെ മിനിമോളെ മത്സരിപ്പിക്കാന്‍ കോണ്‍ഗ്രസ് തീരുമാനിച്ചത്. കെ.പി.സി.സി ജനറല്‍ സെക്രട്ടറിയായ ദീപ്തി മേരി വര്‍ഗീസിന്റെ പേരാണ് മേയര്‍ സ്ഥാനത്തേക്ക് നേരത്തെ പരിഗണിക്കപ്പെട്ടിരുന്നത്. എന്നാല്‍, ലത്തീന്‍ രൂപതയുടെ ഇടപെടലില്‍ വി.കെ മിനിമോള്‍ക്ക് നറുക്കുവീഴുകയായിരുന്നു.

മേയര്‍ സ്ഥാനാര്‍ഥിയെ തെരഞ്ഞെടുക്കുന്നതില്‍ കെ.പി.സി.സി മാനദണ്ഡം പാലിച്ചില്ലെന്ന് ദീപ്തി മേരി വര്‍ഗീസ് ആരോപിച്ചു. തീരുമാനത്തിനെതിരെ ദീപ്തി മേരി വര്‍ഗീസ് കെ.പി.സി.സി അധ്യക്ഷന് പരാതി നല്‍കി. കെ.പി.സി.സിയുടെ നിരീക്ഷകന്‍ എത്തി കൗണ്‍സിലര്‍മാരെ കേള്‍ക്കണം എന്നാണ് സര്‍ക്കുലറില്‍ ഉള്ളത്. അതില്‍ കൂടുതല്‍ പേര് അനുകൂലിക്കുന്ന ആളെ മേയര്‍ ആക്കണം എന്നാണ് വ്യവസ്ഥ. ഗ്രൂപ്പ് നേതാക്കളായ ഡൊമിനിക് പ്രസന്റേഷനും എന്‍. വേണുഗോപാലുമാണ് കൗണ്‍സിലര്‍മാരെ കേട്ടത്. അവര്‍ പുറത്ത് പറഞ്ഞ കണക്ക് അവിശ്വസനീയമാണെന്നും ദീപ്തി മേരി വര്‍ഗീസ് പറയുന്നു. എന്നാല്‍ പാര്‍ട്ടിക്ക് ഒപ്പം നില്‍ക്കുമെന്നും മേയര്‍ സ്ഥാനത്തിനായി വ്യക്തിപരമായി താല്‍പര്യമില്ലാതെ മത്സരിച്ചെന്നും ദീപ്തി മാധ്യമങ്ങളോട് പ്രതികരിച്ചത്. അതേസമയം, ദീപ്തിക്ക് മെട്രോപൊളിറ്റന്‍ ആസൂത്രണ സമിതി അധ്യക്ഷ പദവി നല്‍കിയേക്കും. 

ALSO READ: കൊച്ചി കോർപ്പറേഷൻ: വി.കെ മിനിമോളും ഷൈനി മാത്യുവും മേയർ പദവി പങ്കിടും; ഡെപ്യൂട്ടി മേയർ സ്ഥാനത്തും മാറ്റം; ദീപ്തി മേരി വർഗീസിന് അതൃപ്തി

പ്രശ്‌നം പരിഹരിക്കാന്‍ വരുന്ന നിയമസഭാ തെരഞ്ഞെടുപ്പില്‍ എറണാകുളം ജില്ലയില്‍ ദീപ്തിക്ക് സ്ഥാനാര്‍ഥിത്വം വാഗ്ദാനം ചെയ്തതായി അറിയുന്നു. ഡെപൂട്ടി മേയര്‍ സ്ഥാനത്തേക്കുള്ള സ്ഥാനാര്‍ഥിയെ കോണ്‍ഗ്രസ് ഏകപക്ഷീയമായി പ്രഖ്യാപിച്ചതായി കുറ്റപ്പെടുത്തി മുസ് ലിം ലീഗ് രംഗത്തുവന്നിട്ടുണ്ട്. മുന്നണിയിലോ ഉഭയകക്ഷിതലത്തിലോ ചര്‍ച്ച ചെയ്യാതെയാണ് തീരുമാനമെന്ന് കാണിച്ച് യു.ഡി.എഫ് സംസ്ഥാന നേതൃത്വത്തിന് ലീഗ് പരാതി നല്‍കി.

അതേസമയം, മേയറെ നിശ്ചയിക്കാന്‍  ചേര്‍ന്ന കോണ്‍ഗ്രസ് പാര്‍ലമെന്റെ പാര്‍ട്ടി യോഗത്തില്‍ വി.കെ മിനി മോള്‍ക്കും ഷൈനി മാത്യുവിനുമാണ് ഏറ്റവും കൂടുതല്‍ പിന്തുണ ലഭിച്ചത്. വി.കെ മിനി മോള്‍ക്ക് 17 പേര്‍ പിന്തുണ നല്‍കിയപ്പോള്‍ ഷൈനി മാത്യുവിനെ  19 പേരും പിന്തുണച്ചു. ദീപ്തിക്ക് വെറും നാല് പേരുടെ പിന്തുണ മാത്രമാണ് ലഭിച്ചത്. മേയറാകുന്ന മിനി മോളും ഷൈനിയും ഐ ഗ്രൂപ്പ് പ്രതിനിധികളാണ്. ഡെപ്യൂട്ടി മേയറാകുന്ന ദീപക് ജോയി എ ഗ്രൂപ്പുകാരനും രണ്ടാമൂഴം ലഭിക്കുന്ന കൃഷ്ണകുമാര്‍ ഐ ഗ്രൂപ്പ് പ്രതിനിധിയുമാണ്.

എല്ലാത്തരം പരിഗണനകള്‍ക്കും ശേഷമാണ് മേയറെ തീരുമാനിച്ചതെന്നും ദീപ്തി മേരി വര്‍ഗീസിന്റെ പരാതിയെ കുറിച്ച് അറിയില്ലെന്നുമായിരുന്നു ഡി.സി.സി പ്രസിഡന്റ്  മുഹമ്മദ് ഷിയാസ് പ്രതികരിച്ചത്. ഒറ്റക്കെട്ടായി മുന്നോട്ടുപോകുമെന്ന് നിയുക്ത മേയര്‍ മിനിമോളും പ്രതികരിച്ചു.

Congress leader and KPCC General Secretary Deepthi Mary Varghese has expressed strong dissatisfaction over the party’s decision to field V.K. Mini Mol as the Kochi Mayor candidate, stating that the KPCC did not follow its prescribed selection criteria. Deepthi, whose name was earlier considered for the post, has submitted a complaint to the KPCC president challenging the process.