ഗോപേശ്വര്‍:  ഉത്തരാഖണ്ഡില്‍ ലോക്കോ ട്രെയിന്‍ ഗുഡ്‌സ് ട്രെയിനുമായി കൂട്ടിയിടിച്ച് 60 പേര്‍ക്കു പരുക്ക്. വിഷ്ണുഗഡ്-പിപല്‍കോടി ജലവൈദ്യുത പദ്ധതിയുടെ ഭാഗമായി തൊഴിലാളികളുമായി പോയ ട്രെയിനാണ് പിപല്‍കോടി തുരങ്കത്തിനുള്ളില്‍ വച്ച് ഗുഡ്‌സ് ട്രെയിനുമായി കൂട്ടിയിടിച്ചത്. 

പരുക്കേറ്റവരില്‍ 10 പേരെ വിദഗ്ധ ചികിത്സയ്ക്കായി ഗോപേശ്വറിലെ ജില്ലാ ആശുപത്രിയിലേക്ക് മാറ്റി.ബാക്കിയുള്ളവരെ പിപല്‍കോടിലെ വിവേകാനന്ദ ആശുപത്രിയിലും പ്രവേശിപ്പിച്ചു.  അഞ്ച് പേര്‍ക്ക് എല്ലുകള്‍ക്ക് പൊട്ടലുണ്ട്. ചൊവ്വാഴ്ച രാത്രിയിലാണ് അപകടമുണ്ടായത്.

അപകട സമയത്ത് 109 ഓളം തൊഴിലാളികളും ഉദ്യോഗസ്ഥരും ട്രെയിനിലുണ്ടായിരുന്നു. ജലവൈദ്യുത പദ്ധതിക്കായുള്ള നിര്‍മാണ സാമഗ്രികളുമായി പോയതായിരുന്നു ഗുഡ്‌സ് ട്രെയിന്‍.  ഉത്തരാഖണ്ഡിലെ അളകനന്ദ നദിയില്‍ 444 മെഗാവാട്ട് ജലവൈദ്യുതി ഉല്‍പാദിപ്പിക്കുന്ന പദ്ധതിയാണിത്. 

അടുത്ത വര്‍ഷം പൂര്‍ത്തിയാകുമെന്ന് പ്രതീക്ഷിക്കുന്ന ഈ പദ്ധതിയില്‍ നാല് ടര്‍ബൈനുകള്‍ വഴി 111 മെഗാവാട്ട് വൈദ്യുതി ഉത്പാദിപ്പിക്കാനാണ് ലക്ഷ്യമിടുന്നത്.