ഒരു പുതിയ സ്മാര്‍ട്ട്‌ഫോണ്‍ വാങ്ങുമ്പോള്‍ നമ്മള്‍ പലപ്പോഴും അതിന്റെ വില, ഫീച്ചറുകള്‍, ബാറ്ററി ശേഷി, കാമറ തുടങ്ങിയ കാര്യങ്ങളില്‍ ശ്രദ്ധ കേന്ദ്രീകരിക്കുന്നു. എന്നാല്‍ പലരും സ്മാര്‍ട്ട്‌ഫോണിലെ ഒരു നിര്‍ണായക ഘടകമായ സോഫ്റ്റ്‌വെയര്‍ സപ്പോര്‍ട്ടിനെക്കുറിച്ച് മറക്കുന്നുണ്ട്. ആഗോള ആന്‍ഡ്രോയ്ഡ് ഉപയോക്താക്കളില്‍ 60 ശതമാനത്തിലധികം പേരും ഇപ്പോഴും പഴയ ആന്‍ഡ്രോയ്ഡ് പതിപ്പുകള്‍ (ആന്‍ഡ്രോയ്ഡ് 13 അല്ലെങ്കില്‍ അതിന് മുമ്പുള്ളത് പോലെ) ഉപയോഗിക്കുന്നു എന്നാണ് പുതിയ റിപ്പോര്‍ട്ടുകള്‍. അതായത്, ഏകദേശം ഒരു ബില്യണ്‍ ആളുകള്‍ ഗൂഗിളില്‍ നിന്ന് പുതിയ സുരക്ഷാ പാച്ചുകളോ പരിരക്ഷകളോ ലഭിക്കാത്ത ഡിവൈസുകളാണ് ഇപ്പോഴും ഉപയോഗിക്കുന്നത് എന്നാണ്. ഇത് ഗുരുതരമായ സൈബര്‍ ഭീഷണി ഉയര്‍ത്തുന്നതാണ്.

പ്രതിമാസ അപ്‌ഡേറ്റ് പ്രധാനമായിരിക്കുന്നത് എന്തുകൊണ്ട്?

നിങ്ങളുടെ ഫോണിലേക്ക് നുഴഞ്ഞുകയറാന്‍ ഹാക്കര്‍മാര്‍ ഓരോ ദിവസവും പുതിയ വഴികള്‍ കണ്ടെത്തുകയാണ്. അതുകൊണ്ടുതന്നെ സുരക്ഷാ അപ്‌ഡേറ്റുകളുടെ അഭാവം നിങ്ങളുടെ ഡാറ്റ കവരാന്‍ സാധിക്കുന്ന വിധത്തില്‍ അപകടസാധ്യതകള്‍ സൃഷ്ടിക്കുന്നുവെന്ന് സിമ്പീരിയത്തിന്റെ 2025 ഗ്ലോബല്‍ മൊബൈല്‍ ത്രെറ്റ് റിപ്പോര്‍ട്ട് പറയുന്നു. ഉദാഹരണത്തിന്, 2025 ഡിസംബറില്‍ ആന്‍ഡ്രോയ്ഡിലെ 107 അപകടസാധ്യതകള്‍ പരിഹരിക്കുന്നതിനുള്ള അപ്‌ഡേറ്റുകള്‍ ഗൂഗിള്‍ പുറത്തിറക്കിയിരുന്നു. ഈ 107 അപകടസാധ്യതകളില്‍ 40 ശതമാനവും ഫോണിന്റെ നിയന്ത്രണം മറ്റൊരാള്‍ കൈക്കലാക്കുന്നത് ഉള്‍പ്പെടെ അങ്ങേയറ്റം അപകടകരമായവയായിരുന്നു. എന്നാല്‍ പഴയ ആന്‍ഡ്രോയ്ഡ് ഫോണുകള്‍ ഉപയോഗിക്കുന്നവര്‍ക്ക് ഈ സുരക്ഷാ അപ്‌ഡേറ്റുകള്‍ ലഭിച്ചിട്ടില്ല.

ആപ്പിളും ആന്‍ഡ്രോയ്ഡും തമ്മിലുള്ള വലിയ സുരക്ഷാ വിടവ്

സുരക്ഷയുടെ കാര്യത്തില്‍ ആപ്പിളിന്റെ സംവിധാനങ്ങള്‍ ശക്തമാണെന്ന് നിലവില്‍ തെളിയിക്കപ്പെട്ടിട്ടുണ്ട്. ലോകത്തിലെ സജീവമായ ഐഫോണുകളില്‍ ഏകദേശം 90 ശതമാനവും എപ്പോഴും ഏറ്റവും പുതിയ സോഫ്റ്റ്‌വെയറും സുരക്ഷാ അപ്‌ഡേറ്റുകളും കൊണ്ട് സജ്ജീകരിച്ചിട്ടുണ്ടെന്നതാണ് സ്ഥിതിവിവരക്കണക്കുകള്‍ സൂചിപ്പിക്കുന്നത്. ആപ്പിള്‍ വര്‍ഷങ്ങളായി അതിന്റെ പഴയ മോഡലുകള്‍ പോലും അപ്‌ഡേറ്റ് ചെയ്യുന്നത് തുടരുന്നു.

 ALSO READ: കോട്ടണ്‍ വസ്ത്രങ്ങള്‍ കഴുകുമ്പോള്‍ നിറം മങ്ങിപ്പോകുന്നുണ്ടോ...? വെള്ളത്തില്‍ ഈ രണ്ട് കാര്യങ്ങള്‍ ചെയ്താല്‍ മതി, ഒരിക്കലും നിറം മങ്ങില്ല 

പുതിയ ഫോണ്‍ വാങ്ങുമ്പോള്‍ ഈ കാര്യങ്ങള്‍ ശ്രദ്ധിക്കുക

നിങ്ങള്‍ ഒരു പുതിയ ആന്‍ഡ്രോയ്ഡ് ഫോണ്‍ വാങ്ങുന്നത് പരിഗണിക്കുകയാണെങ്കില്‍, ഫോണുകളുടെ ആകര്‍ഷകമായ ഫീച്ചറുകള്‍ മാത്രം നോക്കി വാങ്ങരുത്. കുറഞ്ഞത് മൂന്ന് മുതല്‍ നാല് വര്‍ഷത്തെ സുരക്ഷാ അപ്‌ഡേറ്റുകളും കുറഞ്ഞത് രണ്ട് വര്‍ഷത്തെ ഓപ്പറേറ്റിങ് സിസ്റ്റം അപ്‌ഗ്രേഡുകളും കമ്പനി വാഗ്ദാനം ചെയ്യുന്നുണ്ടോ എന്ന് ഉറപ്പാക്കുക. ബാങ്കിങ് മുതല്‍ വ്യക്തിഗത വിവരങ്ങള്‍ വരെ എല്ലാം സ്മാര്‍ട്ട് ഫോണുകളില്‍ സൂക്ഷിക്കുന്ന ഈ ഡിജിറ്റല്‍ യുഗത്തില്‍ സുരക്ഷ ഒരു ആഡംബരമല്ല, മറിച്ച് ഒരു ആവശ്യകതയാണെന്ന കാര്യം മറക്കാതിരിക്കുക.

അപകടം ഒഴിവാക്കാന്‍ ചെയ്യേണ്ടത്

 നിങ്ങളുടെ ആന്‍ഡ്രോയ്ഡ് ഫോണിന്റെ സെറ്റിങ്‌സില്‍ പോയി ഒഎസ് പതിപ്പ് അപ്‌ഡേറ്റ് ചെയ്യാന്‍ ശ്രമിക്കുക

 ഫോണിന്റെ പുതിയ ഒഎസ് പതിപ്പ് ലഭ്യമാണെങ്കില്‍, കാലതാമസം കൂടാതെ അത് അപ്‌ഡേറ്റ് ചെയ്യുക.

 നിങ്ങളുടെ ഫോണില്‍ പ്ലേ സ്റ്റോറിന് പുറത്തുനിന്നുള്ള ഒരു ആപ്പ് ഇന്‍സ്റ്റാള്‍ ചെയ്തിട്ടുണ്ടെങ്കില്‍ അത് ഉടന്‍ നീക്കം ചെയ്യുക.

When buying a new smartphone, many users focus on price, features, battery, and camera, but often overlook software support, which is critical for security. Recent reports show that over 60% of Android users worldwide still use older versions like Android 13 or earlier, leaving nearly one billion devices without the latest security patches and exposed to cyber threats. Monthly security updates are essential as hackers constantly find new vulnerabilities, and older phones often miss these fixes. In contrast, Apple maintains stronger software support, with around 90% of active iPhones running the latest updates. Experts advise that when purchasing a new Android phone, buyers should ensure the brand offers at least 3–4 years of security updates and a minimum of 2 years of operating system upgrades to stay safe in today’s digital world.