ശബരിമല: അയ്യപ്പ സന്നിധി ഇന്ന് മകരജ്യോതി പ്രഭയില്‍ അലിയും. ലക്ഷക്കണക്കിന് ഭക്തര്‍ സാക്ഷ്യം വഹിക്കുന്ന മകരവിളക്ക് ദര്‍ശനത്തിനായി സന്നിധാനവും പരിസരവും പൂര്‍ണമായും സജ്ജമായിക്കഴിഞ്ഞു. ഭക്തിനിര്‍ഭരമായ ചടങ്ങുകളോടെയാണ് മലയരയന്റെ മണ്ണില്‍ ഇന്ന് സംക്രമപൂജയും ജ്യോതി ദര്‍ശനവും നടക്കുക.

മകരസംക്രമ പൂജ ഉച്ചകഴിഞ്ഞ് 3.08ന്. തിരുവാഭരണ ഘോഷയാത്ര, വൈകിട്ട് 6.25ന് സന്നിധാനത്ത് എത്തും. ദീപാരാധന തിരുവാഭരണം ചാര്‍ത്തിയുള്ള മഹാ ദീപാരാധന 6.30ഓടെ നടക്കും.  ദീപാരാധന സമയത്ത് വാനില്‍ മകരനക്ഷത്രവും തുടര്‍ന്ന് പൊന്നമ്പലമേട്ടില്‍ മകരജ്യോതിയും തെളിയും.

തിരക്ക് നിയന്ത്രിക്കുന്നതിനായി ദേവസ്വം ബോര്‍ഡും പൊലീസും കര്‍ശനമായ സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. ക്ഷേത്രമുറ്റത്തും ഫ്‌ലൈ ഓവറുകളിലും നിന്ന് ജ്യോതി ദര്‍ശിക്കുന്നതിന് ദേവസ്വം ബോര്‍ഡിന്റെ ഫോട്ടോ പതിച്ച തിരിച്ചറിയല്‍ പാസ് നിര്‍ബന്ധമാണ്.

പന്തളം കൊട്ടാരത്തില്‍ നിന്നും പുറപ്പെട്ട തിരുവാഭരണ ഘോഷയാത്രയെ തന്ത്രി കണ്ഠര് മഹേഷ് മോഹനരും മേല്‍ശാന്തി ഇ.ഡി പ്രസാദ് നമ്പൂതിരിയും ചേര്‍ന്ന് സോപാനത്തില്‍ സ്വീകരിക്കും. മകരവിളക്കിനായുള്ള എല്ലാ ഒരുക്കങ്ങളും പൂര്‍ത്തിയായതായി ദേവസ്വം ബോര്‍ഡ് പ്രസിഡന്റ് കെ. ജയകുമാര്‍ അറിയിച്ചു.

Sabarimala is fully prepared for the Makara Jyothi and Makara Sankranti rituals today, with lakhs of devotees expected to witness the sacred Makara Vilakku following the Tiruvabharanam procession and special pujas under tight security arrangements.