തിരുവനന്തപുരം: പയ്യന്നൂരിലെ ഫണ്ട് വിവാദത്തിന് പിന്നാലെ തിരുവനന്തപുരത്തും സി.പി.എമ്മിനെ പ്രതിരോധത്തിലാക്കി രക്തസാക്ഷി ഫണ്ട് തട്ടിപ്പ് ആരോപണം. 2008ല്‍ കൊല്ലപ്പെട്ട സി.പി.എം പ്രവര്‍ത്തകന്‍ വിഷ്ണുവിന്റെ സഹോദരനും പാര്‍ട്ടി ബ്രാഞ്ച് അംഗവുമായ വിനോദാണ് പാര്‍ട്ടി നേതാക്കള്‍ക്കെതിരെ പരസ്യമായ ആരോപണവുമായി രംഗത്തെത്തിയത്.

2008 ഏപ്രില്‍ ഒന്നിനാണ് വിഷ്ണു കൊല്ലപ്പെട്ടത്. ആര്‍.എസ്.എസ് പ്രവര്‍ത്തകരായിരുന്നു പ്രതികള്‍. വിഷ്ണുവിന്റെ കുടുംബത്തിനായി പിരിച്ചെടുത്ത ഫണ്ടില്‍ നിന്ന് 5 ലക്ഷം രൂപ കേസ് നടത്തിപ്പിനെന്ന പേരില്‍ അന്നത്തെ ഏരിയാ സെക്രട്ടറി രവീന്ദ്രന്‍ നായര്‍ മാറ്റിവച്ചുവെന്നും ഇത് ദുരുപയോഗം ചെയ്തുവെന്നുമാണ് വിനോദിന്റെ പരാതി. ഈ പരാതിയില്‍ മുന്‍പ് നടത്തിയ പാര്‍ട്ടി അന്വേഷണത്തില്‍ രവീന്ദ്രന്‍ നായര്‍ക്ക് വീഴ്ച പറ്റിയെന്ന് കണ്ടെത്തി സസ്‌പെന്‍ഡ് ചെയ്തിരുന്നു. എന്നാല്‍ പിന്നീട് അദ്ദേഹത്തെ സി.ഐ.ടി.യു ജില്ലാ സെക്രട്ടറിയായി നിയമിച്ചത് കുറ്റക്കാരെ സംരക്ഷിക്കുന്നതിന് തുല്യമാണെന്ന് വിനോദ് ആരോപിക്കുന്നു.

 ALSO READ: പാലക്കാട് കായിക അധ്യാപകന്റെ പീഡനം: ഒരു വിദ്യാര്‍ഥി കൂടി പരാതിയുമായി രംഗത്ത്; മൂന്നാമത്തെ കേസെടുത്തു

പാര്‍ട്ടിയുടെ വിശദീകരണം
ആരോപണങ്ങള്‍ അടിസ്ഥാനരഹിതമാണെന്ന് സി.പി.എം ജില്ലാ സെക്രട്ടറി വി. ജോയ് അറിയിച്ചു. ഫണ്ടിന്റെ ഒരു ഭാഗം കുടുംബത്തിന് നല്‍കുകയും ബാക്കി തുക ബാങ്കില്‍ നിക്ഷേപിക്കുകയും ചെയ്തിരുന്നു. അഭിഭാഷകര്‍ക്ക് ഫീസ് നല്‍കാനാണ് ഈ തുക ഉപയോഗിച്ചത്. പാര്‍ട്ടി കമ്മിറ്റികളില്‍ ചര്‍ച്ച ചെയ്യാതെ പണം കൈമാറി എന്ന സാങ്കേതികമായ വീഴ്ച മാത്രമാണ് നേതാവിനുണ്ടായതെന്നും അഴിമതി നടന്നിട്ടില്ലെന്നും പാര്‍ട്ടി വ്യക്തമാക്കുന്നു. ഈ വിവാദത്തെത്തുടര്‍ന്ന് പാര്‍ട്ടിയില്‍ നിന്ന് രാജിവെക്കുകയാണെന്നും വിനോദ് പ്രഖ്യാപിച്ചു. വിഷ്ണുവിന്റെ മറ്റൊരു സഹോദരനായ വിമല്‍ നിലവില്‍ സി.പി.എം ഏരിയാ കമ്മിറ്റി അംഗമാണ്.

Following the Payyannur controversy, a martyr's brother has accused CPM leadership in Thiruvananthapuram of misappropriating ₹5 lakh from the Vishnu martyrs' fund, a claim denied by the party district secretary.