തിരുവനന്തപുരം: തലസ്ഥാനത്തെ നഗരൂരിൽ പൊലിസ് ഉദ്യോഗസ്ഥർക്ക് നേരെ ആക്രമണം. നഗരൂർ എസ്.ഐ അൻസറിനെയാണ് പള്ളിക്കൽ സ്റ്റേഷനിലെ സി.പി.ഒ ചന്ദുവും സംഘവും ചേർന്ന് മർദ്ദിച്ചത്. സംഭവവുമായി ബന്ധപ്പെട്ട് സി.പി.ഒ ചന്ദു, ഇയാളുടെ സഹോദരൻ, മറ്റൊരു നാട്ടുകാരൻ എന്നിവരെ പൊലിസ് കസ്റ്റഡിയിലെടുത്തു.

സംഭവം ഇങ്ങനെ:

നഗരൂരിലെ ഒരു ക്ഷേത്ര ഉത്സവത്തോടനുബന്ധിച്ച് നടന്ന ഗാനമേളയ്ക്കിടെയാണ് അക്രമസംഭവങ്ങൾ തുടങ്ങുന്നത്.ഉത്സവസ്ഥലത്ത് മദ്യപിച്ചെത്തിയ സി.പി.ഒ ചന്ദുവും സംഘവും ബഹളമുണ്ടാക്കിയതിനെത്തുടർന്ന് ഡ്യൂട്ടിയിലുണ്ടായിരുന്ന പൊലിസ് സംഘം ഇവരെ തടയുകയും അവിടെനിന്ന് പിടിച്ചുമാറ്റുകയും ചെയ്തിരുന്നു.

ഗാനമേള അവസാനിച്ചതിന് പിന്നാലെ പ്രതികൾ സംഘം ചേർന്ന് പൊലിസിനെ ആക്രമിക്കുകയായിരുന്നു. എസ്.ഐ അൻസറിനെ പ്രതികൾ ഓടയിലേക്ക് തള്ളിയിടുകയും മർദ്ദിക്കുകയും ചെയ്തു. ആക്രമണത്തിൽ എസ്.ഐയ്ക്ക് പരിക്കേറ്റിട്ടുണ്ട്.

നിയമനടപടി:

സംഭവസ്ഥലത്തുനിന്ന് തന്നെ സി.പി.ഒ ചന്ദുവിനെയും കൂടെയുണ്ടായിരുന്നവരെയും പൊലിസ് പിടികൂടി. ഔദ്യോഗിക കൃത്യനിർവഹണം തടസ്സപ്പെടുത്തുക, പൊലിസ് ഉദ്യോഗസ്ഥരെ ആക്രമിക്കുക തുടങ്ങിയ ഗുരുതരമായ വകുപ്പുകൾ ചുമത്തിയാണ് ഇവർക്കെതിരെ കേസെടുത്തിരിക്കുന്നത്. സഹപ്രവർത്തകനെ തന്നെ ആക്രമിച്ച കേസിൽ സി.പി.ഒ ചന്ദുവിനെതിരെ ശക്തമായ വകുപ്പുതല നടപടികളും ഉണ്ടായേക്കും.