ന്യൂഡൽഹി: രാജ്യസഭയിൽ രാഷ്ട്രീയ അക്രമങ്ങളെക്കുറിച്ചുള്ള ചർച്ചയ്ക്കിടെ അത്യപൂർവവും നാടകീയവുമായ പ്രതിഷേധം. ബിജെപി എംപിയായ സി. സദാനന്ദൻ തന്റെ കൃത്രിമക്കാലുകൾ ഊരിയെടുത്ത് സഭയിലെ ഡെസ്കിൽ വെച്ചാണ് പ്രതിഷേധിച്ചത്. സിപിഎമ്മിന്റെ അക്രമ രാഷ്ട്രീയത്തിന്റെ ഇരയാണ് താനെന്ന് വ്യക്തമാക്കിക്കൊണ്ടായിരുന്നു സദാനന്ദന്റെ ഈ നീക്കം.

സഭയിൽ രാഷ്ട്രീയ അക്രമങ്ങളെക്കുറിച്ച് സംസാരിക്കവേയാണ് സദാനന്ദൻ തന്റെ കൃത്രിമക്കാലുകൾ ഊരിയെടുത്ത് സഭയിലെ ഡെസ്കിൽ വെച്ചത്. 31 വർഷങ്ങൾക്ക് മുൻപ് തന്റെ രണ്ട് കാലുകളും വെട്ടിയെടുത്തത് ഇപ്പോൾ ജനാധിപത്യത്തെക്കുറിച്ച് വാചാലരാകുന്ന സിപിഎമ്മാണെന്ന് അദ്ദേഹം ആരോപിച്ചു. ഇതിന് പിന്നാലെയാണ് തന്റെ കൃത്രിമക്കാലുകൾ ഊരി സഭയുടെ മേശപ്പുറത്ത് വെച്ച് അദ്ദേഹം പ്രതിഷേധം രേഖപ്പെടുത്തിയത്.

ALSO READ: ഇന്ത്യ-യുഎസ് വ്യാപാര കരാർ: ഇറക്കുമതി തീരുവ 18 ശതമാനമായി കുറച്ചു; നിർണായക പ്രഖ്യാപനം നടത്തി ഡൊണാൾഡ് ട്രംപ് 

സദാനന്ദന്റെ നടപടി സഭാ ചട്ടങ്ങൾക്ക് വിരുദ്ധമാണെന്ന് ചൂണ്ടിക്കാട്ടി കേരളത്തിൽ നിന്നുള്ള സിപിഎം എംപി ജോൺ ബ്രിട്ടാസ് ഉടനടി രംഗത്തെത്തി. അംഗങ്ങൾ സഭയ്ക്കുള്ളിൽ ഇത്തരം വസ്തുക്കൾ പ്രദർശിപ്പിക്കുന്നത് ചട്ടലംഘനമാണെന്ന് അദ്ദേഹം സഭാധ്യക്ഷനെ അറിയിച്ചു. ഇതോടെ സഭയിൽ വാഗ്വാദങ്ങൾ അരങ്ങേറി.

അധ്യക്ഷന്റെ ഇടപെടൽ: സഭ നിയന്ത്രിച്ചിരുന്ന ഉപരാഷ്ട്രപതി സി.പി. രാധാകൃഷ്ണൻ വിഷയത്തിൽ ഇടപെടുകയും മേശപ്പുറത്തുവെച്ച കൃത്രിമക്കാലുകൾ മാറ്റാൻ സദാനന്ദനോട് ആവശ്യപ്പെടുകയും ചെയ്തു. ഇതിനെത്തുടർന്ന് അദ്ദേഹം അവ താഴേക്ക് മാറ്റി.

ജോൺ ബ്രിട്ടാസിന്റേത് രാഷ്ട്രീയ അസഹിഷ്ണുതയാണെന്നും അക്രമ രാഷ്ട്രീയത്തെ സിപിഎം ഇപ്പോഴും പ്രോത്സാഹിപ്പിക്കുകയാണെന്നും സദാനന്ദൻ തന്റെ പ്രസംഗത്തിൽ ആവർത്തിച്ചു. സിപിഎം-ബിജെപി അംഗങ്ങൾ തമ്മിലുള്ള രൂക്ഷമായ വാക്പോരിനാണ് ഇന്ന് സഭ സാക്ഷ്യം വഹിച്ചത്. അക്രമ രാഷ്ട്രീയത്തിന്റെ മുറിപ്പാടുകൾ സഭയുടെ നടുത്തളത്തിൽ ചർച്ചയായത് ദേശീയ തലത്തിലും വലിയ ശ്രദ്ധ നേടിയിരിക്കുകയാണ്.

In a dramatic turn of events in the Rajya Sabha, BJP MP C. Sadanandan placed his prosthetic legs on the House desk while speaking about political violence. He recounted how he lost his legs in an attack 31 years ago, allegedly by CPI(M) workers, questioning the party's stance on democracy.