ദുബൈ: ദുബൈ ഇൻവെസ്റ്റ്‌മെന്റ് പാർക്കിൽ (ഡിഐപി) സംഘടിപ്പിക്കുന്ന 'ദുബൈ ഇൻവെസ്റ്റ്‌മെന്റ് ഗ്രീൻ റണ്ണി'ന്റെ ഭാഗമായി ഫെബ്രുവരി 15 ഞായറാഴ്ച വിവിധ റോഡുകളിൽ താൽക്കാലിക ഗതാഗത നിയന്ത്രണം ഏർപ്പെടുത്തുമെന്ന് അധികൃതർ അറിയിച്ചു.

ഞായറാഴ്ച രാവിലെ 6:30 മുതൽ 9:00 വരെ ആയിരിക്കും നിയന്ത്രണങ്ങൾ പ്രാബല്യത്തിൽ ഉണ്ടാവുക. ഈ സമയങ്ങളിൽ ഡിഐപിയിലെ പ്രധാന ആന്തരിക റോഡുകളിലേക്കുള്ള പ്രവേശനം നിയന്ത്രിക്കും.

അടച്ചിടുന്ന റോഡുകൾ

• ദി മാർക്കറ്റ് മാൾ റൗണ്ട്എബൗട്ടിൽ നിന്ന് ഡിഐഎച്ച് റോഡ് വഴി ഫൈസൽ ജാസിം റൗണ്ട്എബൗട്ടിലേക്കുള്ള റോഡ്.
• അൽ യലായിസ് റോഡിൽ നിന്ന് ഡിഐപി 1 ലേക്കുള്ള ഷോപ്പിംഗ് സെന്റർ പ്രവേശന കവാടം.
• ഹംദാൻ ബിൻ സായിദ് റോഡിൽ നിന്ന് എക്‌സ്‌പോ റോഡിലേക്കുള്ള ഭാഗം.

നിയന്ത്രണ സമയത്ത് ഡിഐപിയിലെ ആന്തരിക റോഡുകളിൽ ചെറിയ വാഹനങ്ങൾക്ക് മാത്രമേ പ്രവേശനം അനുവദിക്കൂ. ഭാരമേറിയ വാഹനങ്ങൾക്ക് ഈ സമയങ്ങളിൽ പ്രവേശനമുണ്ടായിരിക്കില്ല. യാത്രക്കാർ ബദൽ മാർഗ്ഗങ്ങൾ ഉപയോഗിക്കണമെന്നും യാത്രാസമയം മുൻകൂട്ടി ക്രമീകരിക്കണമെന്നും നിർദ്ദേശമുണ്ട്.

പരിസ്ഥിതി സൗഹൃദ ജീവിതശൈലി പ്രോത്സാഹിപ്പിക്കുന്നതിനായി സംഘടിപ്പിക്കുന്ന ഈ പരിപാടിയിൽ 3 കിലോമീറ്റർ നടത്തവും 5 കിലോമീറ്റർ മത്സര ഓട്ടവും ഉൾപ്പെടുന്നു. യുഎഇയുടെ കുടുംബവർഷം 2026-നോട് അനുബന്ധിച്ചാണ് പരിപാടി നടക്കുന്നത്. വിജയികൾക്കായി ആകെ 22,000 ദിർഹത്തിന്റെ ക്യാഷ് പ്രൈസുകളും ട്രോഫികളുമാകും ലഭിക്കുക.

traffic restrictions will be in place at dubai investment park due to the upcoming green run event. several roads will remain closed and diversions arranged as authorities advise motorists to plan routes and avoid peak hours.