തിരുവനന്തപുരം: നിയമസഭാ തെരഞ്ഞെടുപ്പില്‍ വട്ടിയൂര്‍കാവ് സീറ്റില്‍ മത്സരം ഉറപ്പിച്ച്  കെ മുരളിധരന്‍. കോണ്‍ഗ്രസ്  നേതൃത്വത്തെ നിലപാട് അറിയിച്ചു. ഇതോടെ വട്ടിയൂര്‍ക്കാവില്‍ ശക്തമായി ത്രികോണ മത്സരം ഉറപ്പായി. വട്ടിയൂര്‍കാവ് തിരിച്ചുപിടിക്കാന്‍ മുരളി തന്നെ ഇറങ്ങണമെന്നാണ് നേതൃത്വത്തിന്റെയും നിലപാട്. അതേസമയം, തിരുവനന്തപുരത്ത് ശബരിനാഥിന്റെയും ശിവകുമാറിന്റെയും പേരുകളും പരിഗണിക്കുന്നുണ്ട്. 

നിയമസഭാ തെരഞ്ഞെടുപ്പ് അടുത്തതോടെ പ്രചാരണ സമിതിയും പ്രകടനപത്രികാ സമിതിയും പ്രഖ്യാപിച്ച് സ്ഥാനാര്‍ഥികളെ തീരുമാനിക്കുന്നതിനുള്ള ചുവടുവയ്പ്പുമായി കോണ്‍ഗ്രസ് അതിവേഗം മുന്നോട്ടു നീങ്ങുകയാണ്. കേന്ദ്ര തെരഞ്ഞെടുപ്പ് സമിതി യോഗം പൂര്‍ത്തിയാക്കി 20ന് ആദ്യഘട്ട സ്ഥാനാര്‍ഥിപട്ടിക പ്രഖ്യാപിക്കാനാണ് ഹൈക്കമാന്‍ഡ് നീക്കം. തെരഞ്ഞെടുപ്പില്‍ കോണ്‍ഗ്രസിന്റെ പ്രചാരണ സമിതി ചെയര്‍മാനായി മുന്‍ പ്രതിപക്ഷ നേതാവ് രമേശ് ചെന്നിത്തലയെയാണ് എ.ഐ.സി.സി നിയോഗിച്ചത്. ശശി തരൂര്‍ എം.പിയാണ് പ്രചാരണ സമിതിയുടെ കോ-ചെയര്‍മാന്‍. ഷാഫി പറമ്പില്‍ എം.പി കണ്‍വീനറാകും. ഹൈബി ഈഡന്‍ എം.പി, എം.എല്‍.എമാരായ റോജി എം. ജോണ്‍, സി.ആര്‍ മഹേഷ്, മാത്യു കുഴല്‍നാടന്‍, രമ്യാ ഹരിദാസ്, എം. ലിജു, ദീപ്തി മേരി വര്‍ഗീസ് എന്നിവര്‍ പ്രചാരണ സമിതി അംഗങ്ങളായിരിക്കും.

ALSO READ: വി.ഡി സതീശനെതിരെ മത്സരം കടുപ്പിക്കാൻ സി.പി.എം; പറവൂർ സീറ്റ് ഏറ്റെടുത്തേക്കും

തെരഞ്ഞെടുപ്പ് പ്രകടനപത്രിക കമ്മിറ്റിയുടെ ചെയര്‍മാനായി ബെന്നി ബഹ്നാന്‍ എം.പിയെയും തീരുമാനിച്ചു. കൊടിക്കുന്നില്‍ സുരേഷ് എംപിയാണ് കോ-ചെയര്‍മാന്‍. എം.പിമാരായ ഡീന്‍ കുര്യാക്കോസ്, ജെബി മേത്തര്‍ എന്നിവരാണ് പ്രകടനപത്രിക കമ്മിറ്റിയിലെ മറ്റ് അംഗങ്ങള്‍. പ്രകടനപത്രിക സമിതിയിലേക്ക് ആന്റോ ആന്റണിയുടെ പേര് ചര്‍ച്ചയിലുണ്ടായിരുന്നെങ്കിലും പോറ്റി വിവാദം വിനയായെന്നാണ് സൂചന. അതേസമയം, കോണ്‍ഗ്രസ് സ്ഥാനാര്‍ഥിപട്ടികക്കൊപ്പം കെ.പി.സി.സിയുടെ താല്‍കാലിക അധ്യക്ഷ ചുമതല ആര്‍ക്കെന്നതിലും തീരുമാനം വന്നേക്കും. സണ്ണി ജോസഫ് മത്സരിക്കാന്‍ ധാരണയായതോടെ ബെന്നി ബഹ്നാന്‍ അടക്കമുള്ളവരുടെ പേരുകളാണ് പരിഗണനയില്‍. കെ.സി ജോസഫ്, എം.എം ഹസന്‍ തുടങ്ങിയ പേരുകളും ചര്‍ച്ചയില്‍ വന്നിരുന്നു. 

16ന് കൊച്ചിയില്‍ ചേരുന്ന കെ.പി.സി.സി യോഗത്തിന് പിന്നാലെ സ്‌ക്രീനിങ് കമ്മിറ്റി, കേന്ദ്ര തെരഞ്ഞെടുപ്പ് സമിതി യോഗങ്ങള്‍ ചേര്‍ന്ന് സ്ഥാനാര്‍ഥിപട്ടികയ്ക്ക് അന്തിമ രൂപം നല്‍കും. 25ന് മുന്‍പ് തെരഞ്ഞെടുപ്പ് സമിതി യോഗം ചേരാനാണ് ആലോചന.

Senior Congress leader K. Muraleedharan has informed the party leadership of his decision to contest from the Vattiyoorkavu constituency in the upcoming Kerala Assembly elections. With this move, a strong triangular contest is expected in the constituency.